REGİONLAR
BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, ötən bazar günü Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkada alıcılara Sabirabad, Salyan, Gədəbəy, Tovuz, Hacıqabul və digər rayonlardan gətirilmiş məhsullar təklif olunurdu.
Kənd Təsərrüfatı Nazirliyi mətbuat xidmətinin rəhbəri Murtuzəli Hacıyevin verdiyi məlumata görə, bazar günü burada əhaliyə 12,2 ton məhsul, o cümlədən 2 ton ət, 4 ton tərəvəz, 3 ton kartof, 3 ton meyvə, 8 min ədəd yumurta təklif olunmuş, ümumiyyətlə, şənbə və bazar günləri 32,5 ton məhsul satılmışdır.
Metronun “Əhmədli” stansiyasının yaxınlığında, Sarayevo küçəsində, “Bakı” kiçik müəssisəsinin “Azər” ticarət mərkəzindəki yarmarkada Salyan, Kürdəmir, Quba, Şəmkir, Ağcabədi, Qax, Biləsuvar, Qəbələ və Şəki rayonlarından gətirilən məhsulların çeşidinin çoxluğu diqqəti cəlb edirdi.
İşçi qrupunun qərargahından verilən məlumata görə, şənbə və bazar günləri bu yarmarkada 45 ton kartof, 73,3 ton meyvə, 87,2 ton tərəvəz, min ədəd yumurta, 15,4 ton ət və digər məhsullar satılmışdır.
Şəhər sakinləri keyfiyyətli məhsulları həvəslə alır, qiymətlərin bazarlardan xeyli ucuz olduğuna görə fermerlərə minnətdarlıq edirdilər.
Suraxanıda “Günəş” ticarət mərkəzindəki yarmarkaya Qobustan, Balakən, Samux, Daşkəsən, Cəlilabad, Salyan və Biləsuvar rayonlarının fermerləri satışa 15 tondan çox məhsul gətirmişdilər.
Kənd Təsərrüfatı Nazirliyinin nümayəndəsi Mustafa Rüstəmov dedi ki, yarmarkalarda satılan məhsulların qiymətləri bazardakından 25-30 faizə qədər ucuzdur. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə şənbə və bazar günləri 5 tondan çox məhsul satılmışdır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Qazax və Ağsu rayonlarının fermerləri müxtəlif çeşiddə meyvə-tərəvəz və heyvandarlıq məhsulları satırdılar. Burada şəhər sakinləri qiymətləri bazardakından ucuz olan kələmi, almanı, lobyanı, narı, kartofu və digər məhsulları həvəslə alırdılar.
Qazax Rayon İcra Hakimiyyətinin nümayəndəsi İman Məmmədov bildirmişdir ki, şənbə və bazar günləri yarmarkada, ümumilikdə, 25 tonadək kənd təsərrüfatı məhsulları satılmışdır. Həmin məhsulların arasında kələm, soğan və kartof daha çox olmuşdur.
Binəqədi rayonunun 6 nömrəli Bakı Texniki Peşə Liseyinin qarşısındakı yarmarkada Bərdə, Goranboy və Ağstafa rayonlarından gətirilmiş kənd təsərrüfatı məhsulları şəhər sakinlərinə ucuz qiymətlərə təklif olunurdu. Burada iki gün ərzində 26 tonadək məhsul satılmışdır.
Nərimanov rayonundakı Keşlə ticarət mərkəzində təşkil olunmuş yarmarkada Xaçmaz, İmişli, Tovuz, Astara, Salyan, Neftçala, Oğuz, Qobustan və Tərtər fermerləri bakılılara 98,53 ton meyvə-tərəvəz təklif edirdilər.
Kənd Təsərrüfatı Nazirliyinin nümayəndəsi Savalan Seyfəddinov bildirmişdir ki, bazar günü Giləzi broyler fabrikindən yarmarkaya 12 min ədəd yumurta da gətirilmişdi.