REGİONLAR
BAZARLARDA KƏND TƏSƏRRÜFATI MƏHSULLARININ QİYMƏTLƏRİNİN SÜNİ ARTIMININ QARŞISI ALINIR
MARTIN 31-DƏ BAKININ RAYONLARINDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Martın 31-də Bakı şəhərinin rayonlarında əvvəlcədən müəyyən edilmiş ərazilərdə kənd təsərrüfatı məhsullarının növbəti satış yarmarkaları keçirilmişdir. Bu dəfə də qiymətlər bazarlardakından xeyli ucuz olmuşdur.
AZƏRTAC-ın müxbirləri satış yarmarkalarında olmuş, reportajlar hazırlamışlar.
NƏSİMİ RAYONU
“Təzə bazar” MMC-nin (S.Vurğun küçəsi, 73) həyətindəki yarmarkada Sabirabad, Gədəbəy, Salyan, Tovuz, Hacıqabul rayonlarından gətirilmiş müxtəlif çeşiddə kənd təsərrüfatı məhsulları təklif olunurdu.
Səhər tezdən alıcılar həvəslə bazarlıq edirdilər.
Kənd Təsərrüfatı Nazirliyinin şöbə müdiri İslam İbrahimovun sözlərinə görə, bü gün satışa 15,8 ton məhsul, o cümlədən 5,2 ton ət, 3,3 ton tərəvəz, 6,0 ton kartof, 1,1 ton meyvə, 0,2 ton ağartı məhsulları, 145,1 min ədəd yumurta və s. çıxarılmışdır.
NƏRİMANOV RAYONU
Metronun “N.Nərimanov” stansiyasının yaxınlığında, “Bakı Taxıl” Açıq Səhmdar Cəmiyyətinin ərazisindəki yarmarkaya Xaçmaz, İmişli, Tovuz, Astara, Salyan, Neftçala və Qobustan rayonlarından 21,9 ton məhsul gətirilmişdi.
Burada alıcılara 2,5 ton ət, 3,2 ton balıq, 3 ton kartof, 3,4 ton konserv, 4 ton tərəvəz, 5,4 ton meyvə və s. təklif olunmuşdur.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri məhsulların qiymətinə və keyfiyyətinə nəzarət edirdilər.
BİNƏQƏDİ RAYONU
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada satışa Qazax rayonundan gətirilmiş müxtəlif növ meyvə-tərəvəz çıxarılmışdı.
Məhsullar bazarlardakından xeyli ucuz qiymətə satılırdı.
Yeddinci mikrorayondakı “Bolluq” bazarının yanında təşkil edilmiş yarmarkada Ağstafa və Bərdə rayonlarından gətirilmiş müxtəlif növ kənd təsərrüfatı məhsulları satılırdı. Burada kələm və soğanın kiloqramı 60 qəpiyə, kartof 50 qəpiyə təklif olunurdu. Mal ətinin kiloqramı 3 manat 40 qəpiyə, qoyun əti 4 manata, pendir 2 manata satılırdı.
SURAXANI RAYONU
Qaraçuxur qəsəbəsi, Yeni Günəşli yaşayış massivi “Günəş” ticarət mərkəzində təşkil olunmuş yarmarkada Qobustan, Şəki və Samux rayonlarından gətirilmiş kənd təsərrüfatı məhsulları satılırdı.
Kənd Təsərrüfatı Nazirliyinin nümayəndəsi Fariz Əliyev bildirdi ki, fermerlər bu gün satışa 4 tondan artıq çuğundur, soğan, kələm, kartof, kök, alma, 1 ton 600 kiloqram ət və digər məhsullar çıxarmışlar.
Satılan məhsulların qiymətləri bazarlardakından 25-30 faiz ucuz olduğuna görə şəhər sakinləri onları çox həvəslə alırdılar.
Əmircan qəsəbəsinin S.Bəhlulzadə küçəsində, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad fermerləri əhaliyə 3 tondan artıq ət, noxud, buğda, lobya, arpa və digər kənd təsərrüfatı məhsulları təklif edirdilər.
Yarmarkalarda məhsulların həm qiymətlərinə, həm də keyfiyyətinə nəzarət olunurdu.
XƏTAİ RAYONU
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzindəki yarmarkada şəhər əhalisinə Kürdəmir, Salyan, Quba, Qəbələ, Qax, Şəmkir, Ağcabədi, Gədəbəy, Hacıqabul və Astara rayonlarından gətirilmiş meyvə-tərəvəz və digər məhsullar təklif olunurdu.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, bu gün rayonun ərazisində fəaliyyət göstərən iki yarmarkada satışa 76,4 ton kənd təsərrüfatı məhsulu çıxarılmışdır.
General Şıxlinski küçəsi, 37, metronun “Həzi Aslanov” stansiyasının yaxınlığındakı “Ordubad” kiçik müəssisəsinin ticarət mərkəzində də bu gün meyvə-tərəvəz, bostan, konserv və ağartı məhsulları, ət, yumurta, bal və s. satılırdı.
YASAMAL RAYONU
A.Şərifzadə küçəsi, 194, metronun “İnşaatçılar” stansiyasının 200 metrliyindəki yarmarkada satışa Dəvəçi, Qusar, Şəki, Salyan və Oğuzdan gətirilmiş 40 tona yaxın kənd təsərrüfatı məhsulu ilə yanaşı, Buzovnadakı “İnkişaf” quşçuluq müəssisəsindən 10 min ədəd yumurta da çıxarılmışdı. Şəkililərin təklif etdiyi şirə və turşulara, şirniyyat məhsullarına növbə daha çox idi.
Qusardan kartof gətirmiş Xanlar Budaqov bildirdi ki, təşkil edilmiş bu yarmarkalar istehsalçılara, fermerlərə geniş imkanlar yaratmış və onlar öz məhsullarını sərbəst şəkildə satırlar. Onun sözlərinə görə, yarmarkalar təşkil ediləndən bəri 70 tona yaxın müxtəlif məhsullar satmışdır.
Alıcılardan Qəmər Bayramova məhsulların qiymətinin bazarlardakından ucuz olduğunu razılıqla qeyd etdi və bu işi təşkil edənlərə minnətdarlığını bildirdi.
SƏBAİL RAYONU
Badamdar qəsəbəsinin mərkəzində 9, 7 və 5 mərtəbəli binaların həyəti, 239 nömrəli məktəbin yaxınlığındakı yarmarkada Kənd Təsərrüfatı Nazirliyinin nümayəndələri ilə Səbail Rayon İcra Hakimiyyətinin nümayəndələri məhsulların keyfiyyətinə və qiymətlərinə ciddi nəzarət etməklə yanaşı, əhalinin tələbatına uyğun məhsulların gətirilməsi üçün də yerli fermerlərlə məsləhətləşmələr aparırdılar.
Satışa Ağdaşdan 1 ton kartof, soğan, 1 ton kələm, 500 kiloqram mal əti, Salyandan 200 kiloqram ət və 300 kiloqrama yaxın ağartı məhsulları çıxarılmışdı.
Ağdaşdan kartof və soğan gətirmiş Miri Miriyev dedi ki, yarmarkada əlverişli şərait yaradıldığı üçün yetişdirdiyi məhsulun çox hissəsini burada satmışdır.
Alıcılardan Xanım Babayeva və Fikrət Qarayev bildirdilər ki, yazın gəlişi ilə əlaqədar satışa çıxarılan məhsulların çeşidindən, keyfiyyətindən, qiymətlərin ucuzluğundan razılıq edirdilər.