İQTİSADİYYAT
BAZARLARDA KƏND TƏSƏRRÜFATI MƏHSULLARININ QİYMƏTLƏRİNİN SÜNİ ARTIMININ QARŞISI ALINIR
NOYABRIN 19-DA BAKININ RAYONLARINDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC-ın müxbirləri satış yarmarkalarında olmuş, reportajlar hazırlamışlar.
NƏSİMİ RAYONU
Mərdanov qardaşları küçəsi, 137, “Maşzavod” SC-nin (Olimpik idman kompleksinin yanı) həyətindəki yarmarkada satışa Sabirabad, Gədəbəy, Salyan, Ağdaş, Lerik rayonlarından gətirilmiş məhsullar çıxarılımışdı.
Kənd Təsərrüfatı Nazirliyinin şöbə müdiri İslam İbrahimov qeyd etdi ki, iki gün ərzində bu rayondakı yarmarkalarda 67,6 ton kənd təsərrüfatı məhsulları satılmışdır. Şəhər sakinlərinin tələbatına uyğun olan keyfiyyətli, ekoloji cəhətdən təmiz məhsulların qiyməti bazarlardakından 20-30 faiz aşağıdır.
C.Məmmədquluzadə küçəsi, 101, “Bakı Tikiş Sənaye” ASC-nin həyətində təşkil olunmuş yarmarkada Ağdaş və Lerik rayonlarının kəndli-fermerləri məhsullarını təklif edirdilər. Həmişə olduğu kimi, Ağdaşın “Orelay” şirkəti satışa 1,5 ton qənnadı məhsulu çıxarmışdı. Burada 7,3 ton badımcan, kartof, kələm, soğan, mal əti və digər məhsullar bazarlardakından 20-25 faiz ucuz satılırdı.
NİZAMİ RAYONU
Metronun “M.Əzizbəyov” stansiyasının ərazisindəki “Ankara” istehsalat-kommersiya firmasındakı yarmarkada bakılılara Tovuz, Lənkəran, Şəki, Daşkəsən və Oğuz rayonlarından gətirilmiş məhsullar təklif olunurdu.
Kənd Təsərrüfatı Nazirliyinin şöbə müdiri Əhliman Nəsirov dedi ki, bu gün satışa 18 ton meyvə-tərəvəz, ağartı, bostan məhsulları, müxtəlif şirniyyat məmulatı, mürəbbə, şirə, konserv məhsulları və s. çıxarılmışdır.
Daşkəsəndən Arzu Tanrıquliyev 300 kiloqram kartof, 100 kiloqram ağartı məhsulları, 500 kiloqram kələm, Tovuzdan Xaliq Hüseynov 3 ton kələm gətirmişlər. Alıcılar onların məhsullarının keyfiyyətindən razılıq edirdilər.
NƏRİMANOV RAYONU
Metronun “N.Nərimanov” stansiyası yaxınlığında, Ə.Əliyev küçəsi, 26 ünvanında, “Bakı Taxıl“ Açıq Səhmdar Cəmiyyətinin ərazisindəki yarmarkada müştərilər Naxçıvandan, Xaçmaz, Qobustan, Neftçala, İmişli, Tovuz, Salyan, Beyləqan və Astara rayonlarından gətirilmiş məhsulları həvəslə alırdılar.
Xaçmaz Rayon İcra Hakimiyyətinin nümayəndəsi Salmanşah Pənahov dedi ki, bu gün satışa 12 ton 800 kiloqramdan çox meyvə-tərəvəz və konserv məhsulları çıxarmışıq. Prezidentin təşəbbüsünü ilk gündən dəstəkləyən fermerlərimiz indiyədək keçirilən 34 yarmarkanın hamısında iştirak etmişlər.
Nərimanov Rayon İcra Hakimiyyəti başçısının birinci müavini Hafiz Məmmədov bildirdi ki, bu gün yarmarkaya 9 rayondan 60 tona yaxın kənd təsərrüfatı məhsulları gətirilmişdir.
YASAMAL RAYONU
Şərifzadə küçəsi, 194, metronun “İnşaatçılar” stansiyasının 200 metrliyindəki sahədə təşkil olunmuş yarmarkada paytaxt sakinləri Salyan və Dəvəçidən gətirilmiş mal, qoyun, quş ətini, Qusar, Xanlar, Xaçmaz, Astara və Gədəbəy fermerlərinin təklif etdikləri meyvə-tərəvəzi həvəslə alırdılar.
Kənd Təsərrüfatı Nazirliyinin nümayəndəsi Gülağa Mustafayev bildirdi ki, 2 gün ərzində burada 50 tondan çox məhsul satılmışdır.
Yarmarkada mal ətinin kiloqramı 3 manat 40 qəpiyə, qoyun əti 4 manata, bal 8-10 manata, kartof 20-40, soğan 36, nar 40-60, kələm 20, yer kökü 40, alma 30, naringi 50-60 qəpiyə təklif olunurdu.
Arif Rzayev Gədəbəydən bal, Elmin Qasımov Astaradan 2 tondan artıq naringi gətirmişlər. Onlar təsərrüfatlarının məhsulunu satmaq üçün yaradılmış əlverişli şəraitə görə ölkəmizin rəhbərliyinə minnətdarlıqlarını bildirdilər.
Salyanlı Elmir Həmzəyev deyir ki, yarmarkalar təşkil ediləndən bəri burada 100 tona yaxın nar satmışdır. Qəbələli Əlövsət Alıyev ilk dəfədir ki, yarmarkaya məhsul gətirmişdir. Sakinlər onun təklif etdiyi şabalıdı və fındığı həvəslə alırdılar.
SURAXANI RAYONU
Əmircan qəsəbəsi, S.Bəhlulzadə küçəsi, 2, “Suraxanı Maşınqayırma Zavodu” ATSC-nin ərazisində satışa Cəlilabad və Göyçay rayonlarından gətirilmiş məhsullar çıxarılmışdı.
Cəlilabad Rayon İcra Hakimiyyəti başçısının aqrar məsələlər üzrə müavini Nazim Səlimov bildirdi ki, bu gün də fermerlərimiz məhsullarını bazarlardakından xeyli ucuz satırlar. Məhsulların keyfiyyəti də alıcıları razı salır.
Qaraçuxur qəsəbəsinin Yeni Günəşli yaşayış sahəsindəki “Günəş” ticarət mərkəzində təşkil edilmiş yarmarkada, əsasən, alıcılara Balakən və Biləsuvardan gətirilmiş geniş çeşiddə kənd təsərrüfatı məhsulları təklif edilirdi.
Yarmarkada alıcıların və satıcıların rahatlığı üçün hər cür şərait yaradılmışdır.
BİNƏQƏDİ RAYONU
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada şənbə və bazar günləri Ağsu və Qazax rayonlarından gətirilən 20 tona yaxın müxtəlif növ kənd təsərrüfatı məhsulları satılmışdır. Müştərilər böyük həvəslə bazarlıq etmişlər.
Biləcəri qəsəbəsinin sakini Nadir Qafarov dedi ki, yarmarkanın daimi müştərisidir. Burada malların təzəliyi və qiymətlərin ucuzluğu məni qane edir. Yarmarkanın təşkili əhalinin aztəminatlı təbəqəsi üçün böyük qayğıdır.
Dərnəgül yaşayış sahəsində, K.Rəhimov küçəsində yerləşən 6 nömrəli peşə liseyinin qarşısındakı avtomobil yolunun kənarında təşkil edilmiş yarmarkada Qazax, Bərdə, Ağsu, Ağstafa, Zərdab və Goranboy rayonlarından gətirilən kənd təsərrüfatı məhsulları satılırdı.
Burada xiyar, badımcan, kartof, kələm, nar, pomidor, lobya 20 qəpiyə, soğan 25 qəpiyə, mal əti 3 manat 35 qəpiyə, qoyun əti 3 manat 60 qəpiyə təklif olununurdu. Müştərilər emal sənayesində istehsal olunmuş qida məhsullarını da topdanşatış qiymətlərinə alırdılar.
Hər iki yarmarkada ət baytar yoxlamasından keçirilmişdir.
XƏTAİ RAYONU
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində bazar günü də kənd təsərrüfatı məhsullarının satış yarmarkası fəaliyyətini davam etdirmişdir. Şəhər əhalisi bu dəfə də satışa çıxarılan kənd təsərrüfatı məhsullarının bolluğundan razılıq edirdilər.
İşçi qrupunun qərargahından verilən məlumata görə, şənbə və bazar günlərində təşkil edilən yarmarkada 190 tonadək kənd təsərrüfatı məhsulları satılmışdır.
Qax rayonunun Turaclı kəndindən gəlmiş Vilayət Həsənov dedi ki, 30 kiloqram bal, 20 kiloqram qoz, 30 kiloqram fındıq gətirmişəm. Öz təsərrüfatımın məhsuludur. Balın klioqramını 12 manata, qozu 1 manat 60, fındığı isə 1manat 40 qəpiyə təklif edirəm.
Salyanın “Hacı Camalxan” kəndli fermer təsərrüfatının nümayəndəsi Ayaz İsmayılov bildirdi ki, yarmarkaya əhalini cəlb edən məhsulun keyfiyyəti və qiymətlərinin ucuzluğudur. Bu səbəbdəndir ki, şəhər sakinləri gətirdiyimiz pendiri, qaymağı və müxtəlif turşuları həvəslə alırlar.