Bakı-Gürcüstan avtomobil yolunun 96-cı kilometrində hərəkət məhdudlaşdırılacaq

Bakı, 14 dekabr, AZƏRTAC

Təmir-bərpa işləri ilə əlaqədar dekabrın 14-dən Bakı-Ələt-Qazax-Gürcüstan ilə dövlət sərhədi avtomobil yolunun 96-cı kilometrində, magistralın Hacıqabul rayonunun Navahi qəsəbəsi ərazisindən keçən hissəsində Bakı şəhəri istiqaməti üzrə hərəkət qismən məhdudlaşdırılacaq. Məhdudlaşma təmir-bərpa işləri yekunlaşanadək qüvvədə olacaq.

Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsindən AZƏRTAC-a verilən məlumata görə, təmir müddəti ərzində avtonəqliyyat vasitələrinin hərəkəti iki tərəfli olmaqla magistralın əks istiqaməti üzrə təşkil ediləcək.

Sürücülərdən aparılan işlərə anlayışla yanaşmaları, yol hərəkəti qaydalarına və yol nişanlarının tələblərinə riayət etmələri xahiş olunur.