Bakı, 14 dekabr, AZƏRTAC

Dövlət Gömrük Komitəsinin Tibbi Xidmət İdarəsinin təşkilatçılığı ilə dekabrın 14-də ümummilli lider Heydər Əliyevin anım gününə həsr edilmiş “Anadangəlmə ürək-damar xəstəliklərinin müalicəsində müasir yanaşmalar” mövzusunda elmi-praktik konfrans keçirilib.

AZƏRTAC xəbər verir ki, konfrans iştirakçıları əvvəlcə Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad edib, məzarı önünə gül dəstələri qoyub.

Dövlət Gömrük Komitəsi Tibb Xidmət İdarəsinin rəisi, Əməkdar həkim, tibb üzrə fəlsəfə doktoru Ceyhun Məmmədov konfransı açaraq ulu öndər Heydər Əliyevin müstəqil Azərbaycanda əhaliyə göstərilən səhiyyə xidmətinin səviyyəsinin yüksəldilməsi üçün göstərdiyi diqqət və qayğıdan danışıb. Prezident İlham Əliyevin səhiyyə müəssisələrinin maddi-texniki bazasının möhkəmləndirimləsi və yeni tibbi avadanlıqlarla təchizatı ilə əlaqədar gördüyü işlər, səhiyyənin vacib sahələrindən olan kardiologiya və ürək-damar cərrahiyyəsi sahəsində son illər əldə edilən uğurlardan, həmçinin Birinci vitse-prezident Mehriban Əliyevanın rəhbərlik etdiyi Heydər Əliyev Fondunun qayğısı və dəstəyi nəticəsində ürək-damar xəstəliklərindən əziyyət çəkən xəstələrin, xüsusılə ürək qüsurlu uşaqlar üzərində unikal cərrahi əməliyyatların həyata keçirilərək onların çox ciddi xəstəliklərdən qurtularaq sağlamlığına qovuşduqlarından bəhs edib.

K.Fərəcova adına Elmi-Tədqiqat Pediatriya İnstitutunun direktoru, tibb elmləri doktoru Nəsib Quliyev öz çıxışında yenidoğulanların 0,8-1 faizə qədərində ürək-damar xəstəlikləri müşahidə edilir. Ölkəmizdə il ərzində dünyaya gələn 150-170 min körpənin 1200-1500-də həmin xəstəliklə üzləşmək olur və yenidoğulmuşlar arasında əlillik və ölüm hallarının sayına görə həmin xəstəlik birinci yerdədir. O, məhz bu səbəblərdən belə bir konfransın keçirilməsinin vacibliyini bildirib.

Türkiyə Ürək və Sağlamlıq Fondunun prezidenti, professor Öztəkin Oto ürək-damar xəstəliklərinin yeni müalicə metodlarına həsr olunmuş konfransın əhəmiyyətindən danışıb.

Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin rəisi, tibb elmləri doktoru, Əməkdar həkim Rəşad Mahmudov öz çıxışında diqqəti daha çox hiperlipidemiyaya- qan yağları adlanan məsələyə çəkib. Ürək-damar xəstəlikləri arasında çox geniş yayılan həmin xəstəliyin də konfransın müzakirə edəcəyi mövzular sırasında olacağını qeyd edib. O, elmi-praktik konfransın əsas məqsədinın yerli və beynəlxalq tibbi kadrların iştirakı ilə ölkəmizin səhiyyə sistemində yüksək texnologiyalar və innovasiyaların tətbiqi ilə əlaqədar uğurları təbliğ etmək və təcrübə mübadiləsi aparmaq olduğunu vurğulayıb.

Ölkəmizin mütəxəssisləri ilə yanaşı Türkiyə, Almaniya, İran və İtaliyanın nüfuzlu tibbi ekspertlərinin də iştirak etdiyi beynəlxalq konfransda anadangəlmə ürək-damar xəstəliklərinin diaqnostikası, müasir müalicə üsulları və metodları, bu xəstəliklərin profilaktikasında müasir yanaşmalar müzakirə olunub.

Konfransda Dövlət Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin rəisi Rəşad Mahmudov “Minimal invaziv cərrahiyyə”, Türkiyənin Florence Nightingale Xəstəxanalar Qrupundan professor Yalım Yalçın “Anadangəlmə ürək qüsurlarının müalicəsində invaziv kardioloji metodların rolu”, uşaq kardiocərrahı professor Bülent Polat “Fallo tetradasinın ümumi korreksiyasında 20 illik təcrübə”, pediatr-neonatoloq Ozan Uzunhan “Yenidoğulmuşlarda kritik anadangəlmə ürək xəstəliklərinin erkən diaqnozunda pulsoksimetriyanın rolu”, İtaliyanın Boloniya Universitetinin kardiologiya kafedrasının dosenti, kardioloq Franko Nakarella “Müasir uşaq kardiologiyasında klinik və genetik konsultasiyalar”, Almaniyanın Yunq Ştillinq Klinikasının kardioloqu Cohannes Riks “Mitral və triksupidal qapaq çatışmazlıqlarında intervensiyon yenilikləri”, həmin klinikanın professoru Gündüz Dursun “Aorta qapağı dəyişimində və koronar revaskulyarizasiyada olan yeniliklər”, İranın Genetik Mühəndislik və Biotexnologiya üzrə Milli İnstitutun həkim-genetiki Saber Siamak “Ürək qüsurları və genetik xəstəliklər arasında əlaqə” mövzularında və digər yüksək ixtisaslı mütəxəssislər müxtəlif məruzələrlə çıxış ediblər.