MƏDƏNİYYƏT


Bakıda “Mədəniyyət naminə sülh” qlobal kampaniyasının Tərəfdaşlar Forumu işə başlayıb VİDEO

Bakı, 2 dekabr, AZƏRTAC

Dekabrın 2-də ADA Universitetində “Mədəniyyət naminə sülh” qlobal kampaniyasının Tərəfdaşlar Forumu (“Peace4Culture” Partners Forum) işə başlayıb.

AZƏRTAC xəbər verir ki, BMT-nin Sivilizasiyalar Alyansı, İslam Dünyası Təhsil, Elm və Mədəniyyət Təşkilatı (ICESCO), ADA Universiteti və Azərbaycan Respublikası Mədəniyyət Nazirliyinin birgə təşkilatçılığı ilə reallaşan tədbirdə dövlət rəsmiləri, bir sıra beynəlxalq təşkilatların və sülhün təşviqi üzrə ixtisaslaşmış institutların, diplomatik korpusun rəhbər şəxsləri və nümayəndələri iştirak edirlər.

Tədbirdə əvvəlcə ADA Universitetinin akademik işlər üzrə prorektoru Vəfa Kazdal universitetin rektoru Hafiz Paşayev adından forum iştirakçıları salamlayıb və tədbirin işinə uğurlar arzulayıb.

Sonra Mədəniyyət Nazirliyinin Aparat rəhbəri, “Mədəniyyət naminə sülh” qlobal kampaniyasının İşçi Qrupunun rəhbəri Vasif Eyvazzadənin moderatorluğu ilə forumun “Yalnız mədəniyyətin sülh üçün nə edə biləcəyini deyil, sülhün də mədəniyyət üçün nə edə biləcəyini düşünək” mövzusuna həsr olunan ilk panel iclası başlayıb.

Qırx dörd gün davam edən müharibə nəticəsində Azərbaycanın qalib gələrək Cənubi Qafqazda böyük imkanlar açdığını söyləyən Azərbaycan Respublikası Prezidentinin köməkçisi–Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib: “Prezident İlham Əliyev məsələni sülh yolu ilə həll etmək istəyirdi. Bizim əsas məqsədimiz dayanıqlı sülhü təmin etməkdir. Elə ekosistem yaratmaq istəyirik ki, bizə müxtəlif əməkdaşlıq formatları imkanı versin. Cənubi Qafqazda nəqliyyat, ticarət yolları, marşrutlar açıla bilər”.

İşğaldan azad edilmiş ərazilərimizdə mədəniyyət nümunələri ilə bağlı vəziyyətə toxunan Hikmət Hacıyev həmin torpaqlarda Azərbaycanın mədəni abidələrinin dağıdıldığını vurğulayıb.

Prezidentin köməkçisi deyib ki, mədəniyyətlər arasında əməkdaşlıqlar olmalıdır. Bu, konsepsiyalarda da öz əksini tapıb. Sülh konsepsiyasının Cənubi Qafqazın hüdudlarından çıxmasını istəyirik. Məqsəd Azərbaycanda əsrlərlə yaradılan mühiti, Azərbaycan xalqının digər xalqlara olan münasibəti, hörməti sahəsindəki təcrübəsini paylaşmaqdır.

“Ölkənin sülh konsepsiyası və xalqların birgə yaşaması üçün sülh çox vacibdir”, - deyə Hikmət Hacıyev əlavə edib.

İclasda mədəniyyət naziri Anar Kərimov çıxış edərək forumun əhəmiyyətindən danışıb. Bildirib ki, bizə dayanıqlı sülh lazımdır, işğal dövründə ermənilərin törətdikləri dağıntılar insanların ürəyində nifrət hissi yaradıb. “Sülh konsepsiyası bu ilin yanvarında yarandı. Biz işğaldan azad olunmuş ərazilərə getdik və burada dağıntıları gördük. Buranı canlandırmaq üçün bizə sülh lazımdır. Burada təkcə fiziki bərpadan söz getmir, həmçinin insanlar arasında sülhü təşviq etmək lazımdır. Azərbaycan 2008-ci ildə “Bakı Prosesi”nə başladı. Bu təşəbbüsün başlamasından artıq 13 il keçib. Bu böyük bir qlobal platformaya çevrilmişdir. Bu, ölkəmizin uzunmüddətli sülh prosesinin qurulmasına hazır olduğunun göstəricisidir. Bu təşəbbüsün nəticələr verməsi üçün biz artıq praktiki fəaliyyətlər barədə düşünmüşük. Sülh və mədəniyyət bizim dayanıqlı inkişafımız üçün çox vacib elementdir.

Qeyd edilib ki, 44 günlük Vətən müharibəsi nəticəsində torpaqlarımızın işğaldan azad edilməsindən sonra dövlət başçımızın elan etdiyi “Böyük Qayıdış” çərçivəsində həyata keçirilən bərpa və yenidənqurma işləri və həmin ərazilərdə maddi və mənəvi canlanma dünya üçün bir nümunədir. Bu fəaliyyətlərin qlobal sülh prosesində mühüm əhəmiyyətini və beynəlxalq miqyasda nümunəvi model olaraq təbliğ edilməsi, eyni zamanda, sülhün mədəniyyət və irsin qorunması, bərpası və inkişafı üçün nə qədər vacib olduğunu dünyaya nümayiş etdirmək məqsədilə cari il iyunun 23-də Azərbaycan Respublikasının Prezidenti İlham Əliyevin dəstəyi ilə BMT-nin Sivilizasiyalar Alyansı və ICESCO ilə birgə “Mədəniyyət naminə sülh” (Peace4Culture) Qlobal Çağırışı elan edilib.

Bildirilib ki, dekabrın 2-si, eyni zamanda, digər bir qlobal təşəbbüsün təsis olunduğu gündür. Belə ki, Azərbaycan Respublikasının Prezidenti İlham Əliyevin təşəbbüsü ilə məhz 2008-ci il dekabrın 2-də “Bakı Prosesi”nin əsası qoyulub. Bu qlobal hərəkat ölkəmizin beynəlxalq miqyasda mədəniyyətlərin və dinlərin dialoq mərkəzinə çevrilməsinə töhfə verib, nəticə etibarilə “Bakı Prosesi” və onun əsas platforması Ümumdünya Mədəniyyətlərarası Dialoq Forumu BMT Baş katibi tərəfindən təşkilatın mədəniyyətlərarası və dinlərarası dialoq üzrə əsas qlobal platforması elan edilib.

Tədbirdə BMT-nin Sivilizasiyalar Alyansı üzrə ali nümayəndəsi Migel Angel Moratinos və ICESCO-nun baş direktoru Salim Məhəmməd Əl-Malikin videomüraciətləri yayımlanıb.

Qeyd edək ki, Forum çərçivəsində “Sülhsevər cəmiyyətləri və beynəlxalq sülh sistemini dayanıqlı şəkildə necə gücləndirə bilərik?”, “Sülh və təhlükəsizlik çağırışları: çoxtərəfli əməkdaşlığın qurulması” mövzularında plenar sessiyalar keçiriləcəkdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.