İQTİSADİYYAT
Bakıda "WorldFood Azerbaijan 2016" və "CaspianAgro 2016" sərgiləri keçirilir
Bakı, 19 may, Ramiz Quliyev, Elvin Camalov, AZƏRTAC
Mayın 19-da Bakı Ekspo Mərkəzində XXII Azərbaycan Beynəlxalq Qida Sənayesi "WorldFood Azerbaijan 2016" və X Yubiley Azərbaycan Beynəlxalq Kənd Təsərrüfatı "CaspianAgro 2016" sərgilərinin açılışı olub.
AZƏRTAC xəbər verir ki, açılış mərasimində çıxış edən kənd təsərrüfatı naziri Heydər Əsədov belə nüfuzlu sərgilərdə Azərbaycan istehsalı olan məhsulların daha geniş miqyasda tanındığını, eyni zamanda dünya ölkələri və qonşu ölkələrdə istehsal edilən məhsulların, istifadə olunan yeni texnologiyaların nümayiş etdirildiyini bildirib. "Son illər dövlət başçısı qeyri-neft sektorunun, xüsusilə də kənd təsərrüfatı sahəsinin inkişafı üçün çox mühüm qərarlar verib. Məhz bunun nəticəsidir ki, artıq bir neçə ildir aqrar sektorda yeni münasibətlər formalaşıb. Nəticə olaraq ölkədə istehsal edilən məhsulların rəqabətədavamlılığı artıb, ixrac imkanları genişlənib. Bu da bütövlükdə milli miqyasda ölkənin ərzaq təhlükəsizliyi ilə təmin edilməsi ilə bərabər qlobal miqyasda da ərzaq təhlükəsizliyinin təmin edilməsinə bir töhfə rolunu oynayıb. Əldə olunan nailiyyətlərin nümayiş etdirilməsi, ictimaiyyətə və beynəlxalq işgüzar dairələrə çatdırılmasında belə sərgilərin təşkil olunması böyük əhəmiyyət kəsb edir. Təcrübə mübadiləsi baxımından da çox əhəmiyyətli olan bu sərgi vasitəsilə şirkətlər arasında əlaqələr qurulur, xarici tərəfdaşlar seçilir və qeyri-neft sektorunun inkişafı üçün sağlam addımlar atılır”, - deyə Heydər Əsədov bildirib.
Nazir qeyd edib ki, builki sərginin fərqli cəhətlərindən biri pambıqçılığın inkişafı məqsədilə qarşımızda qoyulan işlərə uyğun olaraq bir sıra texnikanın, mineral gübrələrin və bu sahədə inkişafa səbəb olacaq digər vasitələrin nümayişidir: "Yerli əhali tərəfindən bu informasiyanın mənimsənilməsi və öyrənilməsi, yerlərə ötürülməsi üçün 22 regionun bu sərgiyə səfəri təşkil olunması da nəzərdə tutulur. İlk dəfə olaraq Kənd Təsərrüfatı Nazirliyi elektron kənd təsərrüfatı xidmətlərinin imkanlarını da pavilyonda nümayiş etdirir. Bu il sərgidə dünyanın 34 ölkəsini təmsil edən 313 şirkət iştirak edir ki, onun da 67 faizini xarici şirkətlərdir", - deyə nazir vurğulayıb.
"İteca Caspian" şirkətinin icraçı direktoru Fərid Məmmədov son illər Azərbaycanda kənd təsərrüfatı sektorunda mühüm islahatların aparıldığını, bunun sərgilərdə də öz əksini tapdığını diqqətə çatdırıb.
F.Məmmədov həmçinin bildirib ki, Bakı Ekspo Mərkəzində keçirilən builki sərgi şirkətlərin sayı baxımından ötənilkindən 11 faiz çoxdur. O, Azərbaycan Respublikası Kənd Təsərrüfatı Nazirliyinin “WorldFood Azerbaijan” sərgisinə yaxından dəstək göstərdiyinə görə, nazir Heydər Əsədova minnətdarlığını ifadə edib.
Sərginin ümumi ekspozisiyasında balıq, mal, qoyun və quş əti, çay və qəhvə, süd məhsulları, dondurulmuş qidalar, quru meyvələr, baqqaliyyə, qənnadı və un məmulatları, meyvə-tərəvəz məhsulları, konservlər, soyuducu sistemlər, çörəkxanalar üçün avadanlıqlar, qablaşdırma avadanlıqları və digər məhsullar təqdim olunur.
Artıq bir neçə ildir keçirilən “WorldFood Azerbaijan” sərgisi ilə eyni vaxtda Xəzər Beynəlxalq Qablaşdırma, Tara, Etiket və Poliqrafiya” “Ipack Caspian 2016” sərgisi “qablaşdırma” sektorunu təqdim edir. Bu il Azərbaycan, Belarus, BƏƏ, Türkiyə, Almaniya, Hindistan, İspaniya, İtaliya, Rusiya, Qazaxıstan və digər ölkələrin şirkətləri qablaşdırmanın istehsalı üçün lazımi dəzgah və avadanlıqları, habelə qablaşdırma materialları və hazır məhsulları, eləcə də etiketləmə məhsullarını təqdim edirlər. Onların arasında respublikamızın qida sənayesi üzrə aparıcı şirkətlərindən "Azərsun Holdinq", "Atena", "Gilan Holdinq", "Metak" da yer alıb. Ziyarətçilər Azərbaycanın "Amoris", “Buta Group" və "Modern Group" şirkətlərinin istehsalı olan süd və şirniyyat məhsulları, içkilər, soyuducu sistemlərlə də yaxından tanış olurlar.
Sərgidə eləcə də qablaşdırma istehsalı üçün qablaşdırma maşınları və avadanlıqları, məhsulların qablaşdırılması üçün texnoloji xətlər, qablaşdırma məmulatlarının istehsalı və layihə tərtibatı (dizaynı) üzrə maşın və avadanlıqlar, qablaşdırma və tara istehsalı üçün xammal və yarımfabrikatlar, qablaşdırma materialları və hazır məmulatlar, xidmət avadanlığı, komplektləşdirici hissələr və avtomatlaşdırma vasitələri və s. nümayiş olunur.
Sərgi çərçivəsində ilk dəfə olaraq qida məhsulları təchizatçılarının ticarət şəbəkələri və distribüterlərlə ikitərəfli görüşləri həyata keçiriləcək. Bu cür ikitərəfli görüşlər, istehsal şirkətlərinin rəhbərləri və pərakəndə satış nümayəndələri arasında şəxsi işgüzar əlaqələrin qurulmasına və ikitərəfli müqavilələrin imzalanmasına mühüm imkanlar yaradacaq.
Beynəlxalq sərgidə Ukraynanın "Vetropack" şirkəti də qablaşdırma materiallarını nümayiş etdirir. Şirkətin meneceri İrina Pinşuk AZƏRTAC-a müsahibəsində təmsil etdiyi qurumun fəaliyyətindən danışıb. Bildirib ki, yerli bazardan əlavə, Avropa ölkələri, eləcə də Azərbaycan şirkətləri ilə əməkdaşlıq edən "Vetropack" artıq 100 ildir bu sahə ilə məşğul olur. Şirkətin sutkalıq istehsal gücü 820 ton şüşə butulka təşkil edir. Bunlar əsasən pivə, araq, şampan və çaxır butulkalarıdır.
Menecer onu da əlavə edib ki, sərgidə iştirak etməkdə məqsəd Azərbaycan şirkətləri ilə tərəfdaşlıq əlaqələrini daha da genişləndirməkdir.
Sərgiyə Belarusdan gəlmiş "Neman" tütün fabrikinin məhsulları da ziyarətçilərin marağına səbəb olub. Fabrikin baş direktorun müavini Aleksandr Şaqun istehsal etdikləri məhsulun heç də xarici analoqlarından geri qalmadığını deyib.
Onun sözlərinə görə, fabrik istehsal etdiyi məhsulun keyfiyyətinə xüsusi önəm verir. Bu baxımdan "Neman"ın tütün məhsulları xarici ölkələrə də ixrac olunur. A.Şaqun bildirib ki, artıq sərginin fəaliyyət göstərdiyi ilk gün ərzində Azərbaycan və digər ölkələrlə tütünün ixracı ilə bağlı 6 razılaşma əldə edilib. Xammalı isə fabrik Azərbaycanla yanaşı, həm də tütün istehsal edən digər ölkələrdən alır.
Yerli şirkətlərdən olan “Azərsun Holding” şirkəti sərgidə böyük stendə malikdir. Azərbaycan alıcılarına yaxşı tanış olan bu məhsullar böyük çeşiddə stendin rəflərini bəzəyir. Holdingin meneceri Bəhruz Hüseynov şirkətin istehsal etdiyi konservləşdirilmiş məhsullarla bağlı bildirib ki, nar şirələri, cemlər, kompot, tomat pastaları, müxtəlif salatlar, turşular, yağlar və s. təbii və konservantsızdır, "Azərsun"un öz tarlalarında becərilən meyvə və tərəvəzlərdən hazırlanır. Şirkətin təmsilçisinin sözlərinə görə, bu məhsullar yerli bazardan başqa, dünyanın bir sıra ölkələrinə də göndərilir, təbii və sağlam qida olduğuna görə, böyük tələbata malikdir.
“WorldFood Azerbaijan" və "CaspianAgro" sərgiləri mayın 21-dək davam edəcək.