CƏMİYYƏT


“Biz birlikdə güclüyük” devizi altında Əcnəbi Tələbələrin III Forumu keçirilib  YENİLƏNİB

Bakı, 23 may, AZƏRTAC 

Mayın 23-də Azərbaycan Tibb Universitetində (ATU) Bakı Beynəlxalq Tələbə Klubunun təşkilatçılığı və Azərbaycan Gənclər Fondunun maliyyə dəstəyi ilə Əcnəbi Tələbələrin III Forumu keçirilib.

AZƏRTAC xəbər verir ki, “Biz birlikdə güclüyük” devizi altında keçirilən tədbirdə Türkiyə, Ukrayna, İran, İraq, İtaliya, Mərakeş, Fələstin, İordaniya, Sudan, Türkmənistanın Azərbaycandakı səfirliklərinin nümayəndələri, 10-dan çox universitetdə təhsil alan müxtəlif ölkələrdən olan tələbələr, ümumilikdə, 400-ə yaxın şəxs iştirak edib.

Forumda çıxış edən universitetin rektoru, professor Gəray Gəraybəyli tədbirin Azərbaycanda tibb fakültəsinin yaranmasının 100 illik yubileyinə təsadüf etdiyini bildirib: “ATU bu 100 il ərzində ölkəmizin inkişafında müstəsna xidmətlər göstərib, Azərbaycan elminə, xüsusilə səhiyyə sisteminin inkişafına xüsusi töhfələr verib və millətimizə neçə-neçə dəyərli kadrlar bəxş edib. ATU-nun beynəlxalq səviyyədə nüfuzunu xarakterizə edən göstəricilərdən biri də hələ 1970-ci illərdən başlayaraq universitetimizdə əcnəbi tələbələrin təhsil almasıdır. Hələ o dövrdə ulu öndər Heydər Əliyevin bu sahəyə göstərdiyi diqqət və qayğı sayəsində ölkəyə əcnəbilərin axınının təməli qoyulub. Həmin siyasi kursun layiqli davamçısı Prezident İlham Əliyevin həyata keçirdiyi uğurlu və beynəlxalq təcrübəyə əsaslanmış islahatlar bu prosesi daha da aktivləşdirib”.

Rektor xarici tələbə sayına görə ATU-nun ölkəmizdə lider olduğunu qeyd edib: “Hazırda universitetdə 32 ölkədən 2000-ə yaxın tələbə təhsil alır. Ölkə başçısının müvafiq Sərəncamı ilə təsdiq edilmiş “2019-2023-cü illər üçün ali təhsil sisteminin beynəlxalq rəqabətliliyinin artırılması üzrə Dövlət Proqramı”nın əsas prioritetlərindən biri də universitetlərin dünyada reytinqinin artırılmasıdır. Həmin prosesdə ölkəmizdə təhsil alan əcnəbi tələbələrin sayı önəmli meyarlardan biridir”.

Rektor əcnəbi tələbələrin Azərbaycan həqiqətlərinin dünyaya çatdırılmasında rolunun olduğunu deyib və onların ölkələr arasında əlaqələrin inkişafına töhfə verdiyini qeyd edib.

Gənclər Fondunun icraçı direktoru Fərid Cəfərov, Milli Məclisin deputatı Şahin İsmayılov ölkəmizdə gənclərə göstərilən diqqət və qayğıdan danışıb, forumun davamlı olmasını diləyiblər. Çıxış edənlər forumun ölkəmizdə təhsil alan əcnəbi tələbələrin vahid şəbəkəsini yaradaraq Bakı Beynəlxalq Tələbə Klubunun platformasında onları daha da möhkəmləndirmək, Azərbaycan həqiqətlərinin, mədəniyyətinin, tarixinin, turizm imkanlarının, xüsusilə Qarabağla bağlı obyektiv məlumatın dünya ictimaiyyətinin diqqətinə çatdırılmasında əcnəbi tələbələrin fəaliyyətini istiqamətləndirmək, onların təşəbbüslərinə dəstək vermək, problemlərinin həllinə yardımçı olmaq məqsədi daşıdığını vurğulayıblar.

Forum bədii hissə ilə davam etdirilib. Bədii hissədə Azərbaycanın fərqli universitetlərində təhsil alan əcnəbi tələbələr öz xalqlarının mədəniyyətini təbliğ edən mahnı və rəqslər təqdim ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.