REGİONLAR
Bölgələrdə bayraq meydanları və muzeylərinin inşası xalqımızın dövlət bayrağına olan sevgi və hörmətinin təcəssümüdür
Qusar, 8 noyabr, Elxan Yusifli, AZƏRTAC
Dövlət Bayrağı Günü respublikamızın hər yerində olduğu kimi, şimal bölgəsində də təntənəli şəkildə qeyd edilir.
AZƏRTAC-ın bölgə müxbiri xəbər verir ki, Qusar şəhərindəki general Mahmud Əbilov adına meydanda təşkil olunan bayram tədbirində Yeni Azərbaycan Partiyası rayon təşkilatının sədri David İbramxəlilov çıxış edərək, Prezident İlham Əliyevin Sərəncamı ilə hər il noyabrın 9-nun ölkəmizdə Dövlət Bayrağı Günü kimi qeyd olunmasından və bu günün əhəmiyyətindən danışıb.
Bildirilib ki, hər bir Azərbaycan vətəndaşı dövlət bayrağımıza ehtiram göstərməyi özünün müqəddəs borcu hesab edir. Qusar şəhərinin girəcəyində dəniz səviyyəsindən 689 metr yüksəklikdə yerləşən meydanda 65 metr hündürlükdə Azərbaycan bayrağı dalğalanır. Ölkəmizin bütün bölgələrində bayraq meydanlarının və muzeylərinin inşa edilməsi xalqımızın dövlət bayrağına olan sevgi və hörmətinin təcəssümüdür.
Bayram tədbirində tanınmış müğənnilərin və folklor qruplarının konsert proqramı təqdim olunub.
X X X
Xaçmaz şəhərindəki Bayraq Meydanında keçirilən bayram tədbiri də coşqulu anlarla yadda qalıb.
Rayon icra hakimiyyəti başçısının müavini İlhamə Nəzərova bayrağımızın tarixin keşməkeşli yollarından keçərək illərin sınağından çıxdığını, müstəqillik uğrunda mübarizələrdə şəhid olmuş minlərlə oğul və qızlarımızın qanına boyandığını bildirib. Bu bayraq hər bir azərbaycanlı üçün müqəddəsdir.
Bildirilib ki, Xaçmazda 2015-ci ildə Bayraq Meydanı və Bayraq Muzeyi inşa olunub. Ümumi ərazisi bir hektar olan Bayraq Meydanında hündürlüyü 85 metr olan bayraq dirəyi ucaldılıb. Muzeydə isə tariximizin ayrı-ayrı dövrlərinə aid eksponatlar, bayraqlar, xəritələr, konstitusiyalar, orden və medallar, bir sözlə, müxtəlif dövlət rəmzləri qorunur.
Çıxışlardan sonra yerli incəsənət nümayəndələrinin, eləcə də məktəblilərin ifasında bayrağımıza həsr olunmuş mahnı, şeir və ədəbi kompozisiyalar səslənib.
X X X
Qubada keçirilən bayram tədbirində rayon icra hakimiyyətinin başçısı Ziyəddin Əliyev çıxış edərək bildirib ki, Azərbaycanın şanlı bayrağının daim yüksəklərdə dalğalanması üçün ulu öndər Heydər Əliyev tarixi işlər görüb. Məhz Ümummilli Liderin səyləri nəticəsində bayrağımız ikinci dəfə 1990-cı il noyabrın 17-də Naxçıvan Muxtar Respublikası Ali Məclisinin qərarı ilə bərpa edilərək muxtar respublikanın dövlət bayrağı kimi təsdiqlənib. Prezident İlham Əliyev də dövlət atributlarına xüsusi diqqətlə yanaşır. Təsadüfi deyil ki, bu gün ölkəmizdə həyata keçirilən dövlət siyasətində gənc nəslin vətənpərvərlik ruhunda tərbiyəsi xüsusi yer tutur. Bu baxımdan paytaxtla yanaşı, bölgələrimizdə də müvafiq tədbirlər görülür. Belə işlər arasında Bayraq meydanları və muzeylərinin yaradılmasının böyük əhəmiyyəti var. Qubada yaradılan Bayraq Muzeyi də bu mənada xüsusi önəm daşıyır.
Çıxışlardan sonra tədbir bayram konserti ilə davam etdirilib.
Dövlət Bayrağı Günü münasibətilə bayram tədbirləri Şabran, Siyəzən və Xızı rayonlarında da təşkil olunub.