QAN YADDAŞI
Bu gün ölkəmizin müstəqilliyi uğrunda canlarından keçmiş bütün şəhidlərin ruhu şaddır
Bakı, 20 yanvar, AZƏRTAC
Dövlət Sərhəd Xidmətinin (DSX) bütün hərbi hissə və bölmələrində Azərbaycan Respublikasının suverenliyi, müstəqilliyi və ərazi bütövlüyü uğrunda mübarizənin rəmzi kimi yaddaşlara həkk olunmuş 20 Yanvar faciəsinin 33-cü ildönümü ilə əlaqədar silsilə tədbirlər keçirilir.
DSX-nin mətbuat mərkəzindən AZƏRTAC-a bildirilib ki, yanvarın 20-də general-polkovnik Elçin Quliyevin rəhbərliyi ilə Xidmətin rəhbər heyəti Şəhidlər xiyabanını ziyarət edib, şəhidlərin əziz xatirəsini dərin ehtiramla yad edərək məzarları üzərinə güllər düzüblər.
Dövlət Sərhəd Xidmətinin aparatında davam edən anım tədbirində iştirakçılar əvvəlcə faciənin 33-cü ildönümü münasibətilə hazırlanmış fotosərgiyə baxış keçirilib.
Azərbaycan Respublikasının Dövlət Himninin səsləndirilməsindən sonra şəhidlərin unudulmaz xatirəsi bir dəqiqəlik sükutla anılıb.
Tədbirdə 33 il əvvəl sovet qoşunlarının Azərbaycanda törətdiyi qanlı qırğın nəticəsində xalqımızın azadlığı, suverenliyi uğrunda Vətən fədailərinin canlarından keçərək şəhidlik zirvəsinə ucaldıqları, həmin müdhiş gecədən uzun illər keçməsinə baxmayaraq, şəhidlərin fədakarlığının hər zaman minnətdarlıqla və ehtiramla anıldığı, 20 Yanvar faciəsinin xalqımızın tarixinə, qan yaddaşına təkcə hüzn deyil, həm də cəsurluq, milli ruhun sarsılmazlığının təzahürü kimi daxil olduğu qeyd edilib.
Qanlı faciədən sonra Ulu Öndər Heydər Əliyevin ailə üzvləri ilə birlikdə Azərbaycanın Moskvadakı daimi nümayəndəliyinə gələrək qanlı qırğın törədənləri pisləyən kəskin bəyanatla çıxış etdiyi, xalqımızın başına gətirilən müsibəti dünyaya çatdırdığı vurğulanıb.
Bu gün ölkəmizin müstəqilliyi və ərazi bütövlüyü uğrunda canlarından keçmiş bütün şəhidlərin ruhunun şad olduğu, onların qanlarının yerdə qalmadığı, Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə Vətən müharibəsində 30 illik torpaq həsrətinə son qoyularaq ərazilərimizin erməni işğalından azad edildiyi, dəmir yumruğun düşməni darmadağın etməsi qeyd olunub.
Sonda 20 Yanvar faciəsinə həsr olunmuş “Şəhidliyin zirvəsi” sənədli filmi nümayiş etdirilib.