İyunun 15-də Ümumçin Xalq Nümayəndələri Məclisi Daimi Komitəsi sədrinin müavini Timur Davamat başda olmaqla Çin parlamentinin nümayəndə heyəti ölkəmizə gəlmişdir. 

Azərbaycanın Gürcüstanla sərhədində - Qırmızı körpüdə qonaqları Milli Məclis sədrinin müavini Ziyafət Əsgərov, Çinin Azərbaycandakı səfiri Çjan Siyun və digər rəsmi şəxslər qarşılamışlar.

İyunun 16-da Çin parlamentinin üzvləri Azərbaycan paytaxtına gəzintiyə çıxmış, Bakının görməli yerləri – Nizami meydanı, Şirvanşahlar sarayı ilə tanış olmuş, İçərişəhərə baxmışlar. Qonaqlar Azərbaycan Dövlət İncəsənət Muzeyinə də getmişlər. Muzeydə müxtəlif eksponatlarla yanaşı, Çinin orta əsrlərə aid çini qablarının nümunələri də nümayiş etdirilir.

X X X

ŞƏHİDLƏR XİYABANINI ZİYARƏT

İyunun 17-də Çin parlamenti üzvlərinin səfər proqramı Şəhidlər xiyabanını ziyarətlə başlamışdır. Qonaqlar ölkəmizin azadlığı, suverenliyi və ərazi bütövlüyü naminə canlarını qurban vermiş Azərbaycan övladlarının xatirəsini yad etdilər.

Nümayəndə heyətinin rəhbəri Timur Davamat şəhidlərin xatirəsinə ehtiram əlaməti olaraq “Əbədi məşəl” abidəsinin önünə əklil qoymuş, fəxri qonaqlar kitabına ürək sözlərini yazmışdır.

Şəhidlər xiyabanını ziyarət zamanı qonaqları Milli Məclisin deputatı, Azərbaycan-Çin parlamentlərarası dostluq qrupunun rəhbəri Əli Əhmədov, Çinin Azərbaycandakı səfiri Çjan Siyun müşaiyət etmişlər.

X X X

PARLAMENTLƏRARASI DOSTLUQ QRUPUNUN ÜZVLƏRİ İLƏ GÖRÜŞ

Ümumçin Xalq Nümayəndələri Məclisi nümayəndə heyətinin üzvləri Şəhidlər xiyabanını ziyarət etdikdən sonra Milli Məclisdə Azərbaycan-Çin parlamentlərarası dostluq qrupunun üzvləri ilə görüşmüşlər.

Dostluq qrupunun rəhbəri Əli Əhmədov səmimi şəraitdə keçən görüşdə xüsusi vurğulamışdır ki, Çin ilə Azərbaycan arasında siyasi, iqtisadi və mədəni əlaqələr yüksək səviyyədədir. İldən ilə möhkəmlənən əlaqələrin mühüm tərkib hissəsi parlamentlərarası münasibətlərdir. Ümumçin Xalq Nümayəndələri Məclisi Daimi Komitəsinin sədri Li Penin Azərbaycana rəsmi səfəri və Milli Məclisin sədri Murtuz Ələsgərovun bu yaxınlarda Çinə səfəri parlamentlərarası əlaqələrin inkişafında böyük rol oynamışdır. Əli Əhmədov razılıqla bildirmişdir ki, Ermənistan-Azərbaycan Dağlıq Qarabağ münaqişəsinin nizama salınmasında məsələsində Çin ölkəmizin ədalətli mövqeyini daim dəstəkləyən dövlətlər sırasındadır.

Çin nümayəndə heyətinin rəhbəri Timur Davamat qonaqpərvərliyə görə təşəkkür edərək, Tibet və Tayvan ətrafında problemlərin həllində onun ölkəsinin mövqeyini dəstəklədiyi üçün Azərbaycan tərəfinə minnətdarlığının bildirmişdir. O, ikitərəfli münasibətlərin yüksək səviyyəsi barədə deyilənlərlə razılaşaraq vurğulamışdır ki, Çin Azərbaycanla əlaqələrin möhkəmlənməsinə böyük əhəmiyyət verir. Qonaq parlamentlərarası münasibətlərin inkişafına toxunaraq demişdir ki, nümayəndə heyətinin tərkibinə Azərbaycanın regionları ilə əməkdaşlığa maraq göstərən böyük əyalətlərinin təmsilçiləri daxildirlər.

Görüşdə Milli Məclis aparatının rəhbəri Səfa Mirzəyev, Çinin Azərbaycandakı səfiri Çjan Siyun iştirak edirdilər.

X X X

MİLLİ MƏCLİSDƏ QƏBUL

Elə həmin gün Milli Məclisin sədri Murtuz Ələsgərov Ümumçin Xalq Nümayəndələri Məclisi Daimi Komitəsi sədrinin müavini Timur Davamat başda olmaqla Çin parlamentinin nümayəndə heyətini qəbul etmişdir.

Murtuz Ələsgərov qonaqları səmimiyyətlə salamlayaraq xatırlatmışdır ki, onların ölkəmizə səfəri və Timur Davamatın doğum günü Azərbaycanın ümumxalq bayramına – Milli Qurtuluş gününə təsadüf etmişdir. O, Timur Davamatı təbrik edərək, əmin olduğunu bildirmişdir ki, Çin parlamenti üzvlərinin səfəri Azərbaycan Prezidenti Heydər Əliyevin 1994-cü ildə Çinə rəsmi səfəri zamanı əsası qoyulmuş qarşılıqlı surətdə faydalı ikitərəfli münasibətlərin möhkəmlənməsinə kömək göstərəcəkdir. Dövlətimizin başçısının həmin səfər zamanı ÇXR-in sədri Tszyan Tszeminlə və ölkənin digər rəhbərləri ilə görüşləri nəticəsində onlarca sənəd, o cümlədən əməkdaşlıq haqqında birgə rəsmi məlumat imzalanmışdır.

Murtuz Ələsgərov vurğulamışdır ki, diplomatik münasibətlər yaradıldıqdan sonra, ümumdövlət əlaqələrinin ayrılmaz tərkib hissəsi olan parlamentlərarası əlaqələr intensiv inkişaf etməyə başlamışdır. Ümumçin Xalq Nümayəndələri Məclisi Daimi Komitəsinin sədri Li Penin 2000-ci ildə respublikamıza rəsmi səfəri, onun Azərbaycan Prezidenti Heydər Əliyev ilə, ölkə parlamenti və hökumətinin rəhbərləri ilə görüşləri Azərbaycan-Çin münasibətlərinin daha da inkişaf etməsinə yeni təkan vermişdir. Milli Məclisin nümayəndə heyətinin Çinə bu yaxınlardakı səfəri parlamentlərarası əlaqələrin möhkəmlənməsində mühüm rol oynamışdır. Azərbaycan parlamentinin üzvləri eyni zamanda Sülh Naminə Asiya Parlamentlərarası Assosiasiyası III Baş assambleyasının işində də iştirak etmişlər.

Milli Məclisin sədri ikitərəfli münasibətlərin perspektivlərindən danışaraq demişdir ki, ÇXR beynəlxalq aləmdə baş verən hadisələrə güclü təsir göstərən iri dövlətlərdən biridir. Ona görə də Çin ilə qarşılıqlı münasibətlər Azərbaycanın xarici siyasətində öncül yer tutur. O, qonaqlara Ermənistan-Azərbaycan, Dağlıq Qarabağ münaqişəsinin nizama salınmasına dair danışıqlar prosesi barədə də məlumat vermiş, ölkəmizin ədalətli mövqeyini daim dəstəklədiyinə görə Çin hökumətinə təşəkkürünü bildirmişdir. Murtuz Ələsgərov xüsusi vurğulamışdır ki, “Ermənistanın yeritdiyi separatçılıq və təcavüzkar millətçilik siyasəti beynəlxalq prinsiplərə ziddir”.

Timur Davamat Azərbaycan-Çin münasibətlərinin yüksək səviyyədə olması fikri ilə razılaşaraq bildirmişdir ki, ölkəmizdə olduğu günlərdə o, Azərbaycanın tərəqqi və iqtisadi inkişaf yoluna qədəm qoyduğunu yəqin etmişdir. ÇXR-in sədri Tszyan Tszemin və parlamentin sədri Li Pen Azəbaycanla münasibətlərin inkişafına böyük əhəmiyyət verirlər.

Nümayəndə heyətinin rəhbəri Çin parlamenti sədrinin salamını Murtuz Ələsgərova yetirərək xatırlatmışdır ki, Li Pen gəncliyində Mingəçevir SES-in tikintisində iştirak etmişdir.

Qonaq vurğulamışdır ki, dövlətlər arasındakı bütün münaqişələr, o cümlədən Dağlıq Qarabağ problemi beynəlxalq hüquq çərçivəsində və sərhədlərin toxunulmazlığı, ərazi bütövlüyü prinsiplərinə riayət olunmaqla həll edilməlidir. O, Tayvan və Tibet məsələlərində Çinin mövqeyini dəstəklədiyinə görə Azərbaycan rəhbərliyinə minnətdarlığını bildirmişdir.

Daha sonra Timur Davamat üç min deputatı olan Çin parlamentinin fəaliyyəti haqqında məlumat vermişdir. O, həmçinin bildirmişdir ki, onun ölkəsi bu yaxınlarda Dünya Ticarət Təşkilatının üzvü olmuşdur, bu isə Çin parlamentindən qanunvericiliyi beynəlxalq standartlara uyğunlaşdırmağı tələb edir.

Qəbulda Milli Məclis sədrinin müavini Ziyafət Əsgərov, Çinin Azərbaycandakı səfiri Çjan Siyun iştirak edirdilər.

YAZIÇILAR BİRLİYİNDƏ GÖRÜŞ

Günün sonunda Çin parlamentinin deputatları Azərbaycan Yazıçılar Birliyində olmuşlar.

Yazıçılar Birliyinin sədri, Milli Məclisinin deputatı Anar başçılıq etdiyi təşkilatın tarixi və bu günü barədə qonaqlara ətraflı məlumat vermişdir.

Nümayəndə heyətinin rəhbəri Timur Davamat dövlət təşkilatı olan Çin Yazıçılar Birliyinin strukturundan və fəaliyyətindən danışmış, özünün də bu birliyin üzvü kimi fəal ədəbi yaradıcılıqla məşğul olduğunu

bildirmişdir.

Səmimilik şəraitində keçən görüşdə ölkələrimizin ədibləri arasında sıx əlaqələr qurulmasının zəruriliyi vurğulanmışdır.