Bakı, 25 yanvar (AZƏRTAC). Ötən ilin dekabrında Azərbaycanın dəmir yolu nəqliyyatında 10 ton yükün 1 kilometr məsafəyə daşınmasının orta tarifi ixrac üzrə 0,4 faiz ucuzlaşmış, tranzit üzrə 13,8 faiz, yerli əlaqə üzrə 2,5 faiz, idxal üzrə isə 2,1 faiz bahalaşmışdır. Sərnişindaşıma tarifləri beynəlxalq əlaqə üzrə ay ərzində 5,9 faiz qalxmışdır.

Dövlət Statistika Komitəsindən AZƏRTAC-a bildirmişlər ki, hava nəqliyyatında MDB ölkələrinə və digər xarici ölkələrə sərnişindaşıma tarifləri uyğun olaraq 11,2 faiz və 6,7 faiz ucuzlaşmış, Birlik ölkələrinə yükdaşıma tarifləri isə 0,6 faiz bahalaşmışdır.

Boru kəməri nəqliyyatında, həmçinin dəniz nəqliyyatı vasitəsilə yükdaşıma və sərnişindaşıma tariflərində heç bir dəyişiklik olmamışdır.

Avtomobil nəqliyyatında şəhərlərarası sərnişindaşıma tarifləri 1,5 faiz ucuzlaşmışdır.