Bakı, 26 oktyabr, AZƏRTAC

Sərsəm bəyanatlar verərək Dağlıq Qarabağ münaqişəsi üzrə aparılan danışıqlara son qoyan Ermənistanın “başsız” baş naziri Nikol Paşinyan müharibə başladıqdan sonra Azərbaycan dövlətinin, onun Ordusunun və Prezident İlham Əliyevin qarşısında aciz vəziyyətə qalaraq böyük dövlətlərə və bir sıra liderlərə yalvarmağa başladı. Hər qapıdan sülh dilənən bu bitkin insan Azərbaycanın ona verdiyi son şansdan istifadə etmək əvəzinə, xislətinə sadiq qalaraq humanitar atəşkəs dövründə mövqelərimizə hücuma keçdi, mülki vətəndaşlarımızın ölümünə səbəb oldu.

Bu fikirləri AZƏRTAC-a açıqlamasında Milli Məclisin deputatı Şahin İsmayılov söyləyib.

“Təbii ki, Azərbaycan Ordusu onların qarşısını layiqincə aldı və döyüş meydanında əsl qəhrəmanlıq göstərdi. İqtisadiyyatı çökən, ordusu pərən-pərən olan, işğal altındakı ərzilərimizi itirən Paşinyan “Facebook” sosial şəbəkəsində xalqına müraciət edərək artıq Qarabağda diplomatik tənzimlənmənin mümkün olmadığını və hər kəsin silah götürməli olduğunu bildirdi. Paşinyan bir tərəfdən qapı-qapı gəzərək sülh dilənir, digər tərəfdən xalqını silaha sarılmağa çağırır. Bütün bunların fonunda isə Azərbaycan Ordusu irəliləyir, ermənilərin 30 il ərzində qurduğu dayaq məntəqələrini qısa vaxtda məhv edir, torpaqlarını işğaldan qurtarır”, - deyən deputat vurğulayıb ki, 30 il ərzində münaqişənin həllinə məsul olan ATƏT-in Minsk qrupunun həmsədr ölkələrindən birtərəfli qaydada Ermənistana dəstək gəlir, əvəzində isə Azərbaycana təzyiqlər göstərilir.

“Siz kimə, nəyə görə dəstək göstərirsiniz? Bunun fərqindəsiniz? Prezident İlham Əliyev də dediyi kimi, nə onun, nə də Azərbaycan xalqının daha 30 il gözləmək üçün səbri yoxdur. Münaqişənin çox sadə həlli var. İşğal olunan bütün torpaqlar işğaldan azad edilməlidir. Lakin BMT Təhlükəsizlik Şurasında müzakirələr zamanı Azərbaycana qarşı növbəti təzyiq cəhdinin şahidi olduq. İllər ərzində aparılan uğurlu xarici siyasət öz nəticəsini verdi və bu təxribatın qarşısı alındı. Qoşulmama Hərəkatına üzv ölkələr Azərbaycanın mövqelərini ciddi şəkildə dəstəklədi. Cəbhədə gedən döyüşlər diplomatik sahədə də davam edir”, - deyə Ş.Seyidzadə bildirib.

Deputat diqqətə çatdırıb ki, Azərbaycan hər iki istiqamətdə güclü dövlətdir və şərtləri o diktə edir. Görünür “başsız” baş nazir Paşinyan vəziyyətin onun və Ermənistan dövləti üçün acı nəticələrini başa düşüb, indi də ABŞ-a yalvarmağa başlayıb. Azərbaycan beynəlxalq öhdəliklərə və verdiyi sözə hər zaman sadiq olub. Bu dəfə də humanitar atəşkəsə sadiq qalacaqdır. Lakin görünən odur ki, Azərbaycana qarşı ənənəvi düşmənçiliyindən əl çəkə bilməyən Ermənistan yenidən yaşayış məntəqələrimizi atəşə tutmağa davam edir. Bu halda isə bizim başqa yolumuz qalmır. Torpaqlarımızı şanlı Azərbaycan Ordusu işğaldan azad edəcək!