SİYASƏT


Deputat: Brüssel görüşü göstərdi ki, Ermənistan rəhbərliyi Azərbaycanın yaratdığı yeni reallığı qəbul edib

Bakı, 23 may, AZƏRTAC

Mayın 22-də Belçika Krallığının paytaxtı Brüsseldə Azərbaycan Respublikasının Prezidenti İlham Əliyev, Avropa İttifaqı (Aİ) Şurasının Prezidenti Şarl Mişel və Ermənistan Respublikasının baş naziri Nikol Paşinyan arasında növbəti gərgin və uğurlu görüş baş tutub. Görüş əvvəlcədən iki saat planlaşdırılsa da, 5 saatdan çox davam edib və bir çox məsələlər müzakirə olunaraq növbəti mərhələdə icrası üçün razılaşdırılıb.

Otuz il düşmənçilik şəraitində yaşayan iki milləti barışdırmaq və sivil normalara uyğun qonşuluq münasibətləri yaratmaq heç də asan məsələ deyil. N.Paşinyan razılaşdırılan məsələlərin icrasını müəyyən olunmuş müddətlərdə icra etmək istəsə də, Ermənistana kənardan təzyiqlər göstərilir, keçmiş hökumət nümayəndələri öz tərəfdarları vasitəsilə insanlara pul paylayaraq icazəsiz aksiyalar təşkil edir, yaranmış vəziyyətdən yararlanaraq hakimiyyəti yenidən ələ keçirməyə çalışırlar. Bütün bunlara baxmayaraq, Ermənistanda daxili vəziyyət çətin olsa da, sadə ermənilər N.Paşinyanı dəstəkləyir və Brüsseldə keçirilən üçtərəfli görüşlərdə Prezident İlham Əliyevin fikri ilə razı olduqlarını bilavasitə bildirirlər.

Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.

Deputat qeyd edib ki, görüş zamanı nəzərəçarpan məqamlardan birincisi növbəti dəfə “Dağlıq Qarabağın statusu” məsələsinin müzakirə olunmaması idi. Bu, o deməkdir ki, 44 günlük Vətən müharibəsində “cəhənnəmə” göndərdiyimiz status məsələsi bir daha gündəmə gəlməyəcək və heç vaxt müzakirə predmeti olmayacaq. Dövlət başçıları Qarabağda yaşayan erməni əhalinin hüquqları barədə də danışıblar. Ölkəmiz çoxmillətli və etnik müxtəlifliyə malik olan tolerantlıq siyasətini yürüdən dövlət olduğu üçün bu məsələni müharibənin əvvəlində də deyib və onların təhlükəsizliyinə təminat verəcəyini bəyan edib. Biz Ermənistanın monoetnik ölkə olduğunu hər zaman deyirik və bütün dünyanı tolerantlıq və multikulturalizm ətrafında sıx birləşməyə də çağırırıq. Bu səbəbdəndir ki, Azərbaycanda yaşayan bütün millətlər özlərini çox rahat hiss edirlər. O cümlədən digər ərazilərimizdə yaşayan 10 minlərlə erməni bu gün də Azərbaycan vətəndaşlarıdırlar və heç bir ayrıseçkiliyə məruz qalmayıblar. Bu, onu göstərir ki, digər ərazilərimizdəki ermənilər çox sərbəst və azad şəkildə yaşayıblarsa, Qarabağdakı ermənilər də yaşaya bilərlər. Təbii ki, Avropa İttifaqı da Azərbaycanın bu siyasəti ilə razıdır və ölkəmizin ərazi bütövlüyü çərçivəsində iki dövlət arasında qonşuluq münasibətlərinin formalaşmasını dəstəkləyir.

“Müzakirə olunan digər bir məsələ işğaldan azad olunmuş ərazilərin minalardan təmizlənməsi və itkin düşmüş şəxslərin taleyi ilə bağlı idi. İkinci Qarabağ müharibəsinin bitməsindən keçən dövr ərzində 200-dən çox vətəndaşımız ermənilərin ərazimizdə yerləşdirdiyi minaların partlaması nəticəsində həlak olub və ya ciddi xəsarətlər alıb. Beynəlxalq hüququn normalarına əsasən, məğlub dövlət qalib tərəfə minalanmış ərazilərin xəritələrini təqdim etməlidir ki, postmüharibə dövründə dinc sakinlər xəsarət almasın. Təəssüf ki, Ermənistanın təqdim etdiyi xəritələrin dəqiqliyi cəmi 20 faiz olduğundan Azərbaycan minatəmizlənmə əməliyyatlarını tam həcmdə keçirməyə məcburdur. Bu səbəbdəndir ki, Ermənistanın məsuliyyətsizliyinə görə bu dövrdə dinc insanlar da minaya düşərək xəsarət almaqda davam edir. Ermənistan həm də beynəlxalq hüququn normalarını kobud şəkildə pozaraq Birinci Qarabağ müharibəsində itkin düşmüş 4 min vətəndaşımızın taleyi haqqında bu gün də heç bir məlumat vermir. Bu məsələləri Prezident İlham Əliyev görüş iştirakçılarının diqqətinə bir daha çatdırdı”, - deyə Azər Badamov vurğulayıb.

Milli Məclisin deputatı əlavə edib ki, görüşdə Azərbaycanla Ermənistan sərhədində sərhəd komissiyalarının birgə iclaslarının keçirilməsi, delimitasiya və demarkasiya prosesinin təşkili, kommunikasiyaların açılması, Zəngəzur dəhlizinin reallaşdırılması məsələləri də müzakirə predmeti olub. Eyni zamanda, dövlət sərhədlərindən keçid və tranzit daşımalar beynəlxalq normalar çərçivəsində təşkil edilməsi, iqtisadi inkişafın təmin olunması üçün İqtisadi Məsləhət Qrupunun işinin davam etdirilməsi və yekun sülh müqaviləsinin imzalanması məsələləri də Brüssel görüşündə diqqət mərkəzində olub. Görüşün nəticəsi kimi qeyd etmək olar ki, Ermənistan rəhbərliyi Azərbaycanın yaratdığı yeni reallığı qəbul edib və təqdim edilən məsələlərin həllinin alternativinin olmadığını anlayıb. Belə ki, razılaşdırılmış məsələlərin icrası üçün zamana ehtiyac var. 44 günlük Vətən müharibəsindən ötən müddət ərzində keçirilən üçtərəfli və ikitərəfli görüşlər Azərbaycanla Ermənistan arasındakı münasibətləri beynəlxalq hüququn prinsipləri əsasında ölkələrin qarşılıqlı olaraq ərazi bütövlüyünü tanınması ilə başa çatacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.