ELM VƏ TƏHSİL
Dövlət İqtisad Universitetinin müəllimi Macarıstan universitetində mühazirələr oxuyub
Bakı, 18 noyabr, AZƏRTAC
Azərbaycan Dövlət İqtisad Universitetinin (UNEC) beynəlxalq iqtisadiyyat (ingilisdilli) kafedrasının müəllimi Turan Süleymanov Avropa Komissiyasının “Erasmus+” müəllim mübadilə proqramı çərçivəsində Macarıstanın Dunaujvaros Universitetinin tələbələrinə “Sahibkarlıq strategiyası” mövzusunda mühazirələr oxuyub.
T.Süleymanov, həmçinin Dunaujvaros Universitetində keçirilən iki beynəlxalq elmi konfransda da iştirak edib. “Elm həftəsi” çərçivəsində keçirilən birinci konfransda onun “Azərbaycanda telekommunikasiya şirkətlərinin brend arxitektura strategiyaları” mövzusunda çıxışı dinlənilib. XIII İSBİS Biznes İnformasiya Sistemləri Konfransında isə T.Süleymanov iqtisad elmləri üzrə fəlsəfə doktoru Anar Rzayevlə birgə yazdığı “Azərbaycan dövlət universitetlərində tədrisdə, təhsilin mənimsənilməsində və idarəetmədə İKT-nin tətbiqi (UNEC nümunəsində)” məqaləsinin tezislərini təqdim edib.
Xatırladaq ki, UNEC-lə Dunaujvaros Universiteti arasında birgə elmi tədqiqat işlərinin aparılması və “Erasmus+” müəllim mübadilə proqramı çərçivəsində müqavilə imzalanıb. Proqram çərçivəsində bir müddət əvvəl Dunaujvaros Universitetinin professorları da UNEC-in “SABAH” qrupunun tələbələrinə “Əmək bazarı” mövzusunda mühazirələr oxuyublar.