Bakı, 15 mart, AZƏRTAC

Martın 15-də Azərbaycan Milli Elmlər Akademiyasının (AMEA) Mərkəzi Elmi Kitabxanasında “Elm həftəsi”nin bağlanış mərasimi keçirilib.

AMEA-dan AZƏRTAC-a bildirilib ki, tədbirdə çıxış edən Biologiya və Tibb Elmləri Bölməsinin (BTEB) akademik-katibi, akademik Əhliman Əmiraslanov dövlət başçısının 2018-ci il 9 aprel tarixli Sərəncamı ilə martın 27-nin Azərbaycanda “Elm günü” kimi təsis olunduğunu xatırladıb. O, bu günə həsr olunmuş “Elm həftə”sinin öz işini uğurla başa vurduğunu bildirib. Alimin sözlərinə görə, AMEA-nın həyatında əlamətdar hadisələrdən biri olan “Elm həftə”sində bir çox aktual elmi problemlərə həsr olunmuş məruzələr dinlənilib, geniş müzakirələr aparılıb. Ə.Əmiraslanov bu kimi tədbirlərin gənc tədqiqatçıların əldə etdikləri nailiyyətlərin geniş auditoriyaya təqdim edilməsi və onlarda diskussiya mədəniyyətinin formalaşması baxımından xüsusi əhəmiyyət kəsb etdiyini bildirib. Qeyd edib ki, “Elm həftə”sinin sonuncu günündə BTEB-nin alim və mütəxəssisləri ilə yanaşı, Azərbaycan Tibb Universitetindən olan müəllim və tələbə heyəti də iştirak edib.

AMEA-nın Yüksək Texnologiyalar Parkının (YT Park) direktoru rəhbərlik etdiyi müəssisənin təşkilatçılığı ilə keçirilən “Elm həftəsi” çərçivəsində BTEB-də aparılan araşdırmalara dair təqdimatların nümayiş etdirildiyini deyib. O bildirib ki, “Elm həftəsi”nə həsr olunmuş və YT Park tərəfindən keçirilmiş “Ən yaxşı innovasiyalı ideya”, “Ən yaxşı innovasiyalı layihə” və “Ən yaxşı innovasiya məhsulu” üzrə müsabiqənin nəticələri ictimaiyyətə elan olunacaq və qaliblər mükafatlandırılacaq.

Sonra AMEA-nın vitse-prezidenti, Molekulyar Biologiya və Biotexnologiyalar İnstitutunun direktoru, akademik İradə Hüseynova son zamanlar akademiyada bütün sahələrlə yanaşı, molekulyar biologiya sahəsində də ciddi elmi nailiyyətlərin əldə olunduğunu, “Elm həftəsi”ndə bu nəticələrin təqdim edildiyini diqqətə çatdırıb. Alim tədbirdə mühüm mövzulara həsr olunmuş çıxışları yüksək qiymətləndirib. İ.Hüseynova “Elm həftəsi”nin Azərbaycan elmində bir çox problemlərin həllinə təkan verməklə yanaşı, həm də səmərəli nəticələrlə yadda qalacağına əminliyini ifadə edib.

AMEA-nın Genetik Ehtiyatlar İnstitutunun direktoru, AMEA-nın müxbir üzvü Zeynal Əkpərov isə çıxışında “Elm həftəsi”nin AMEA-nın institut və təşkilatlarında həyata keçirilən layihələrin, aparılan elmi tədqiqatların və əldə olunan nailiyyətlərin geniş ictimaiyyətə çatdırılması, eyni zamanda, gənclərdə elmə marağın formalaşdırılması istiqamətində mühüm töhfələr verdiyini vurğulayıb.

Tədbirdə “Azərbaycanın təbii bitki sərvətlərinin öyrənilməsinin müasir vəziyyəti və istifadə perspektivliyi”, “Uşaqlıq cismi xərçənginin diaqnostikası və proqnozunda elektron mikroskopik müayinənin əhəmiyyəti”, “Şərq tibb zəlisinin kosmetologiyada və tibdə istifadəsi”, “Azərbaycan populyasında insulindən asılı şəkərli diabeti olan uşaqlarda insan leykositar antigen sisteminin II sinfinin nDRB1 geninin təhlili”, “Pambıq bitkisinin yerli sortları və intensiv becərmə texnologiyaları”, “Dənli taxıl və paxlalı bitkilərin yeni sortları” və digər prioritet mövzularda məruzələr dinlənilib.

Daha sonra “Ən yaxşı innovasiyalı ideya”, “Ən yaxşı innovasiyalı layihə” və “Ən yaxşı innovasiya məhsulu” üzrə layihələr təqdim olunub.

Qeyd edək ki, qaliblərin seçilməsi üzrə komissiya və ekspertlər qrupu yaradılıb. Komissiyanın sədri AMEA-nın vitse-prezidenti, akademik İbrahim Quliyev, üzvləri isə akademiklər Nazim Məmmədov və Fəxrəddin Qədirovdur.

Müsabiqənin nəticələrinə görə, “Ən yaxşı innovasiya məhsulu” üzrə Mikrobiologiya İnstitutunun direktor müavini, AMEA-nın müxbir üzvü Pənah Muradovun “Göbələk mənşəli bioloji aktiv maddələr” layihəsi, “Ən yaxşı innovasiyalı layihə” üzrə Milli Aviasiya Akademiyasının tələbəsi Tural Zəkəryəzadənin “Məişət tullantılarının ağıllı yolla idarə olunması və toplanılması” layihəsi, “Ən yaxşı innovasiyalı ideya” üzrə Bakı Ali Neft Məktəbinin tələbəsi Əhməd Mehribanlının “İstehsalat sularından litiumun ayrılması” layihəsi qalib elan edilib. Layihə müəlliflərinə pul mükafatı təqdim olunub.