Bakı, 9 mart, AZƏRTAC

Azərbaycan Tibb Universitetinin (ATU) Tədris Terapevtik Klinikasında süd vəzi xərçənginə həsr olunmuş “Səsimiz olun” elmi-praktik konfrans keçirilib.

AZƏRTAC xəbər verir ki, əvvəlcə tədbirdə universitetin şəhid həkimlərinin xatirəsi anılıb, Azərbaycan Respublikasının Dövlət Himni səsləndirilib.

Konfransa rəhbərlik edən ATU-nun şüa diaqnostikası və terapiyası kafedrasının müdiri, professor Məlahət Sultanova tədbirin məqsəd və məramı haqqında toplantı iştirakçılarına məlumat verib.

Sonra universitetin elmi işlər üzrə prorektoru, dosent Rauf Bəylərov çıxış edərək süd vəzi xərçənginin hazırda dünyada ən aktual problemlərdən biri olduğunu qeyd edib: “Dünyanın bütün ölkələrində süd vəzi xərçəngi bədxassəli şişlər arasında birinci yeri tutur və qadınlarda aşkarlanan onkoloji xəstəliklərin 26 faizini təşkil edir. Həmin göstəricinin son 10 ildə proqressiv artması müşahidə olunur. Azərbaycanda süd vəzi xərçənginə rastgəlmə tezliyi son 15 ildə artıb və bu hələ son hədd deyil. Süd vəzi xərçəngi son illər ərzində ölkəmizdə qadınların bütün bədxassəli yenitörəmələr ilə xəstələnmə halları arasında birinci yeri tutaraq 32,3 faiz təşkil edir. Süd vəzi xərçənginin diaqnostika və müalicəsində əldə olunan nailiyyətlərə baxmayaraq, həmin patologiya ilə ölüm hallarının göstəricisi yüksək olaraq qalır”.

Tədris Terapevtik Klinikanın direktoru, professor Surxay Musayev çıxışında bildirib ki, rəhbərlik etdiyi tibb müəssisəsi yarandığı gündən indiyədək bir sıra böyük konfranslara ev sahibliyi edib. Bu tədbirlərdə ölkəmizin, eləcə də dünya səviyyəli universitetlərin tanınmış tibb mütəxəssisləri, alimlər iştirak ediblər. Bu konfransın da onlardan biri olduğunu vurğulayan direktor, belə aktual mövzuda tədbiri təşkil edənlərə minnətdarlığını bildirib və konfransın işinə uğurlar arzulayıb.

Konfransda çıxış edən Tədris Terapevtik Klinikanın radiologiya şöbəsinin müdiri, mammoloq-radioloq Günel Qəmbərova deyib ki, son illər həyata keçirilən işlərin nəticəsində qadınlar, xüsusilə 35 yaşadək olanlar mütəmadi şəkildə mammoloq konsultasiyasından, ultrasəs müayinədən keçirlər. Bu da həkimlərə xəstəliyə erkən diaqnostika qoymaqda kömək edir: “Dünyada, o cümlədən Azərbaycanda hər 8 qadından birində süd vəzi xərçənginə rast gəlinir. Son dövrlərdə erkən diaqnostikanın aparılmasına nail olmuşuq. Burada maarifləndirmə işləri, televiziya proqramları, sosial media böyük rol oynayır”.

Süd vəzi xəstəliyinin ölkəmizdə daha çox yayıldığını deyən ATU-nun Onkoloji Klinikasının dosenti Nəsimi Qasımov, həmin xəstəliyə dünyada və Azərbaycanda tutulma səviyyəsi, qorunma üsulları, səbəb və nəticələri barədə məlumat verib, xəstəliyin qarşısını almağın onun erkən aşkarlanmasından çox asılı olduğunu söyləyib. Həkim əlavə edib ki, son statistikaya görə, dünyada həmin xəstəliyə düçar olanların sayı 2 milyon 60 min nəfərə çatıb. Onun sözlərinə görə, radioaktiv şüalanma, ağır istehsalat şəraitində işləmək, siqaret çəkmək, gec uşaq dünyaya gətirmək kimi faktorlar süd vəzi xərçənginə daha çox səbəb olur. Həkim qeyd edib ki, 35 yaşdan sonra hər bir qadın ildə bir dəfə həkim müayinəsindən keçməlidir. Çünki xəstəlik aşkarlanarsa, diaqnozun vaxtında və düzgün qoyulması müalicə taktikasının seçilməsinə köməklik göstərmiş olur.

Sonra proqrama uyğun olaraq Türkiyənin İstanbul Florence Nighitinge Klinikasından professor Vahit Özmen videoformatda konfransa qatılıb və “Süd vəzi xərçənginin cərrahiyyəsinin dünəni və bu günü” mövzusunda məruzə təqdim edib. Eləcə də Milli Onkologiya Mərkəzinin həkim-onkoloqu Samir Qurbanov “Süd vəzi xərçənginin rekonstruktiv əməliyyatları”, Azərbaycan Tibb Universitetinin şüa diaqnostikası və terapiyası kafedrasının dosenti Mətanət Pənahova “Süd vəzi xərçəngində elastokiyanın rolu”, Onkoloji Klinikadan tibb üzrə fəlsəfə doktoru Günay Əhmədova “Süd vəzisinin onkoplastikası və alqoritmləri” və digər mütəxəssislər bu sahəyə dair müxtəlif mövzularda təqdimatlarla çıxışlar ediblər. Natiqlər süd vəzi xərçənginin diaqnostikası, profilaktikası, müalicəsinin aktual məqamlarından söhbət açıblar.

Daha sonra süd vəzi xərçəngi diaqnozu qoyulan, o cümlədən əməliyyat olunan bir qrup pasiyentin də fikirləri dinlənilib, onların bu amansız xəstəliklə necə mübarizə apardıqları toplantı iştirakçılarının diqqətinə çatdırılıb.