CƏMİYYƏT


Ermənistanın Azərbaycan ərazilərinə və mülki əhaliyə hərbi təcavüzü ilə əlaqədar UNICEF-in regional direktoruna müraciət ünvanlanıb

Bakı, 14 oktyabr, AZƏRTAC

Sentyabrın 27-dən Ermənistan silahlı qüvvələri tərəfindən Azərbaycanın mülki əhalinin sıx məskunlaşdığı yaşayış məntəqələri, təhsil, sosial, mədəni və strateji əhəmiyyətli obyektlər ağır artilleriya qurğularından, xüsusi raket sistemlərindən və qadağan olunmuş silahlardan istifadə edilməklə intensiv şəkildə atəşə tutulmaqda davam edir. Nəticədə mülki əhali arasında çoxsaylı ölüm və yaralanma halları baş verib, yaşayış məntəqələrinə, tarixi və mədəni abidələrə, inzibati binalara, ictimai və digər sosial obyektlərə ciddi ziyan dəyib. Bu məqsədlə Ombudsman Səbinə Əliyeva BMT-nin Uşaq Fondunun (UNICEF) Avropa və Mərkəzi Asiya üzrə regional direktoru xanım Əfşan Xana müraciət ünvanlayıb.

Bu barədə AZƏRTAC-a Ombudsman Aparatından məlumat verilib.

Diqqətə çatdırılıb ki, müraciətdə Ermənistanın hərbi təcavüzünün insan tələfatı ilə nəticələndiyi, ölən və yaralananlar arasında uşaqların və qadınların sayının çox olduğu vurğulanıb.

Təəssüf hissi ilə bildirilib ki, cəbhə bölgəsindən kənarda yerləşən və mülki əhalinin sıx yaşadığı ərazilərə atılan mərmilər nəticəsində indiyədək 3 uşaq həlak olub, 23 uşaq isə yaralanıb.

Gəncə şəhərinin mərkəzi hissəsində çoxmənzilli yaşayış binalarının Ermənistan silahlı qüvvələri tərəfindən növbəti dəfə raket atəşinə tutulması nəticəsində 10-u məktəbli uşaq olmaqla, 34 nəfərin yaralandığı, 3 uşağın hər iki valideynini itirdiyi qeyd edilib.

Ombudsman çoxsaylı təhsil müəssisələrinin də Ermənistan silahlı qüvvələri tərəfindən dağıdıldığını qeyd edib. Bu isə o deməkdir ki, əgər COVID-19 pandemiyası ilə bağlı həmin məktəblərdə distant təhsil tətbiq olunmasaydı, minlərlə uşağın həyat və sağlamlığına ciddi təhlükə yaranmaqla böyük insan tələfatı baş verə bilərdi.

Müraciətdə Ermənistanın iştirakçısı olduğu beynəlxalq müqavilələrin, xüsusilə də BMT-nin Uşaq hüquqları haqqında Konvensiyasının müddəalarını kobud şəkildə pozduğu bildirilməklə BMT-nin Uşaq Hüquqları Komitəsi çərçivəsində işğalçıya qarşı xüsusi prosedurun başlanması tələb olunub.

Ombudsman Səbinə Əliyeva Azərbaycanın UNICEF-lə səmərəli əməkdaşlığına diqqəti yönəldərək, regional direktoru Ermənistanın ölkəmizə qarşı hərbi təcavüzündən əziyyət çəkən uşaqların ən ümdə maraqlarının və pozulmuş fundamental hüquqlarının təmini məqsədilə BMT-nin Uşaq Hüquqları Komitəsi və təşkilat səviyyəsində qətiyyətli addımlar atmağa çağırıb.

Qeyd edək ki, beynəlxalq təşkilatlar tərəfindən Ermənistanın Azərbaycan ərazilərinə hərbi təcavüzünün və mülki əhaliyə yönəlmiş terror aktlarının qarşısının alınması ilə bağlı konkret hüquqi məsuliyyət müəyyən edən təsirli tədbirlər hələ də görülməyib.

Ermənistanın insanlığa sığmayan bu kimi müharibə cinayətləri əhalinin həyat və sağlamlığı üçün ciddi təhlükədir. Bu təcavüz aktları beynəlxalq təşkilatları narahat etməli, işğalçı Ermənistana qarşı hüquqi məsuliyyət müəyyən edən tədbirlər görülməlidir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.