REGİONLAR


Gəncə “IMAGINE Avro” tolerantlıq festivalına ev sahibliyi edib

Gəncə, 13 may, Rauf Hacıyev, AZƏRTAC

Gəncədə şəhərində “IMAGINE Avro” tolerantlıq festivalı çərçivəsində silsilə mədəni tədbirlər keçirilib.

AZƏRTAC-ın bölgə müxbiri xəbər verir ki, əvvəlcə Məhsəti Mərkəzində fotoqraf Nikolas Landemardın sərgisi açılıb.

Tədbirdə şəhər rəhbərliyi, Avropa İttifaqının Azərbaycandakı nümayəndəliyinin rəhbərinin birinci müşaviri Denis Daniilidis, Milli Məclisin deputatı Pərvin Kərimzadə və ictimaiyyət nümayəndələri iştirak ediblər.

Məlumat verilib ki, “IMAGINE Avro” Tolerantlıq Festivalı Azərbaycan Respublikası Mədəniyyət Nazirliyi, “Cinema Plus”, “Landmark” Biznes Mərkəzi, Nizami Kino Mərkəzi, Bakı Metropoliteni, “Salaam Cinema”, Məhsəti Gəncəvi Mərkəzi, "Yarat" Müasir İncəsənət Mərkəzi, İbrahim Əbilov adına Mədəniyyət Mərkəzi, Azərbaycan Dövlət Mədəniyyət və İncəsənət Universiteti, ADA Universiteti, Venesiyanın Ka Foskari Universiteti tərəfindən dəstəklənir.

İlk dəfə olaraq, bu il “IMAGINE Avro” Tolerantlıq Festivalının paytaxtdan kənarda, Gəncə şəhərində keçirildiyini qeyd edən çıxışçılar bu cür festivalların təşkilinin böyük əhəmiyyət kəsb etdiyini deyiblər. Həmçinin tolerantlıq ənənələrinin Azərbaycanda hələ əsrlər öncə formalaşdığı və zaman keçdikcə bu coğrafiyada yaşayan insanların başlıca keyfiyyətinə çevrildiyi vurğulanıb. “IMAGINE Avro” tolerantlıq festivalının mədəniyyətlərarası dialoqun inkişafına müsbət təsir göstərəcəyinə əminlik ifadə olunub.

Avropa İttifaqının Azərbaycandakı nümayəndəliyinin rəhbərinin birinci müşaviri Denis Daniilidis çıxışında bildirib ki, Azərbaycanda müxtəlif dinlərə mənsub olan insanlar daim sülh və mehribanlıq içərisində yaşayıblar. “IMAGINE Avro” tolerantlıq festivalını Azərbaycanda təqdim etməklə bu ölkənin tolerant dövlət olduğunu bir daha nümayiş etdiririk. Bu, həm də digər ölkələr üçün bir nümunədir. Bu festival çox fərqlidir, mədəniyyətləri görüşdürür. Festivalın məqsədi körpülər qurmaqdır. Tolerant ölkə olan Azərbaycanla bu cür əlaqələrin qurulması qürurvericidir”, – deyə Denis Daniildis vurğulayıb.

Çıxışlardan sonra sərgiyə baxış keçirilib.

Üç hissədən ibarət olan sərgidə fotoqraf Nikolas Landemardın Fransada yaşayarkən lentə aldığı siyasi liderlərin, teatr iştirakçılarının və Brüssel məhəllələrinin fotoları nümayiş etdirilib.

Məlumat verilib ki, sərginin birinci hissəsi “Fransa teatrında qaçqınların çıxışı” adlanır. Bu fotolarda Fransanın Leon şəhərindəki teatrda çıxış edən miqrantlar və qaçqınların şəkilləri yer alır. Fotoqraf teatrda çəkilişlər apararkən həm də ustad dərsləri verib. Bu teatrın özəlliyi ondan ibarətdir ki, burada səs yoxdur. Onlar fransız dilini bilmədikləri üçün ünsiyyətlərini işarələrlə qururlar.

İkinci hissənin mövzusu “Avropa siyasətçiləri” adlanır. Fotoqraf bu ad altında Avropa Komissiyası və Parlamentindəki siyasi liderlərin şəkillərini nümayiş etdirir.

Üçüncü hissənin mövzusu isə “Brüsseldə yerləşən Avropa məhəllələri”dir. Belçikalılar bu ərazini batmış məhəllə adlandırırlar. Orada vaxtilə köhnə binalar olub, ancaq onlar sökülərək yerində zövqsüz, müasir binaların tikintisinə başlanılıb. Yerli camaat da bu məhəllədə aparılan işləri uğursuz layihə adlandırıb. Get-gedə böyüyən belə məhəllələrə belçikalılar Brüsselizasiya adını verib.

Sonra Gəncə Dövlət Universitetində “IMAGINE Avro” tolerantlıq festivalı çərçivəsində kinorejissor Andres Lübbertin "El Color del Camaleon" filminin nümayişi olub. Çıxışlarda bildirilib ki, builki festivalda tolerantlıq və müxtəliflik mövzusunda 30-dan çox sənədli və bədii film təqdim edilib.

Fransa, Finlandiya, Latviya, Hollandiya və Belçikanın tanınmış rejissorları öz filmlərini təqdim etmək üçün festivala qatılıb və müxtəliflik mövzusundakı müzakirələrdə iştirak ediblər. Həmçinin universitetlərdə sənədli filmlərin çəkilməsi haqqında tələbələrə və yerli gənc rejissorlara ustad dərsləri keçirilib.

Gənc kinorejissor Andres Lübbertin "El Color del Camaleon" filminin mövzusu, ideyası və süjet xətti haqqında kinosevərlərə məlumat verib. Bildirilib ki, dramatik səhnələrin yer aldığı filmin əsas ideyasını multikulturalizm və tolerantlıq təşkil edir. Filmin mövzusu gənc rejissorun öz atasının həyatında yaşadığı çətinliklərdən təsirlənərək ekranlaşdırılıb.

Sonra filmə baxış olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.