Bakı, 20 yanvar, AZƏRTAC

Ümumxalq Hüzn Günü olan qanlı Yanvar faciəsindən 31 il keçsə də, xalqımız o dəhşətli günləri unuda bilmir, Vətənin azadlığı, müstəqilliyi uğrunda canından keçən əziz şəhidlərimizin xatirəsini yad etmək üçün Şəhidlər xiyabanına gəlir. Burada 20 Yanvar şəhidlərinin xatirəsini yad edərkən ürəyimizdə dərin hüznlə yanaşı, sonsuz iftixar, böyük bir qürur hissi də var. Bu gün Azərbaycan öz gücü, qüdrəti ilə düşmən üzərində böyük qələbə qazanaraq ərazisinin bütövlüyünü təmin etmiş qalib ölkədir. Şəhidlərimizin qisası düşməndən layiqincə alındı.

Bu sözləri Vətənin azadlığı və suverenliyi uğrunda canlarından keçmiş Azərbaycanın qəhrəman övladlarının əziz xatirəsini yad etmək üçün Şəhidlər xiyabanına gələn Bakı sakini Gülbala Tağıyev AZƏRTAC-a müsahibəsində bildirib.

Paytaxt sakini həmin müdhiş gecədə baş verən hadisələrin iştirakçısı kimi, keçirdiyi hissləri sözlə ifadə etməkdə çətinlik çəkdiyini vurğulayaraq deyib: “Üstündən 31 il keçməsinə baxmayaraq, bu hadisələri xatırlamaq indi də mənim üçün çox ağırdır. Həmin dövrdə sovet imperiyasının Azərbaycana qarşı qərəzli, ermənipərəst siyasətinə, əzəli torpaqlarımıza iddia edən Ermənistanı açıq-aşkar dəstəkləməsinə qarşı çıxan xalqımıza divan tutuldu. Biz həmin günlər xalqımızın böyük təlatümlər qarşısında olduğunu başa düşürdük və çalışırdıq ki, ədalət, azadlıq tələb edən günahsız insanların qanı axıdılmasın, onları evə səsləyirdik. Amma hamı bir nəfər kimi, gözlərini belə qırpmadan təpədən-dırnağadək silahlanmış ordunun qarşısına əliyalın çıxdı. Azərbaycanın vətənpərvər övladları həmin müdhiş gecədə qəhrəmancasına şəhidlik zirvəsinə yüksəldilər”.

20 Yanvar faciəsinin Azərbaycanın müasir tarixində həm də xalqımızın yenilməz iradəsinin rəmzinə çevrildiyini bildirən G.Tağıyev mənfur ermənilərin fitvası ilə törədilmiş bu qanlı faciənin nəinki Azərbaycan xalqını qorxutmadığını və mübarizədən çəkindirmədiyini, əksinə bizi daha güclü və yenilməz edərək azadlıq və müstəqilliyə qovuşdurduğunu bildirib: “Həmin günlər nümayiş etdirilən birlik xalqımızın mübarizliyinin, ədalətsizliklə barışmayacağının bariz nümunəsi idi. Bu gün mübariz Ali Baş Komandan İlham Əliyevin rəhbərliyi ilə xalqımızın sarsılmaz birliyi, şəhidlərimizin canı-qanı bahasına, qəhrəman oğullarımızın şücaəti və vətənpərvərliyi hesabına doğma Qarabağımızı azad etmişik. Müstəqil dövlət kimi çox böyük və şərəfli yol keçən Azərbaycanın zəfərlərlə dolu tarixi bu gün hər birimizin qürur mənbəyidir”.