Bakı, 30 may, AZƏRTAC 

Ekologiya və Təbii Sərvətlər Nazirliyi milli parklara direktor vəzifəsinə işə qəbul üzrə müsabiqə elan edib.

Nazirliyin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin direktoru Hikmət Əlizadə müsabiqənin şərtləri, namizədlərə qoyulan tələblər, seçimlər haqqında AZƏRTAC-ın müxbirinin suallarını cavablandırıb.

- Milli parklara direktor vəzifəsinə müsabiqə elan edilməsi hansı məqsədi daşıyır?

- Hamımız bilirik ki, milli parklar xüsusi ekoloji, tarixi, estetik əhəmiyyəti olan təbiət komplekslərinin yerləşdiyi təbiəti mühafizə və elmi-tədqiqat idarəsi statusunda olan ərazilərdən ibarətdir. Artıq bu məfhumun özündən irəli gələrək onların vahid kompleks altında çoxşaxəli istiqamətli fəaliyyətləri yerinə yetirdiyi məlum olur. Təbii ki, bu cür tələblər qoyulduğu halda bu qurumların idarə edilməsi tam hazırlıqlı və səriştəli şəxslər tərəfindən həyata keçirilməlidir.

Azərbaycanın ən nadir və zəngin təbiət ərazilərinin mühafizəsi, idarə edilməsi və onları layiqli şəkildə yerli və xarici qonaqlara tanıdılması üçün bu idarələrə rəhbərlik edən şəxslər özlərində kompleks bacarıqları ehtiva etməlidirlər. Milli parklara hazırda rəhbərlik olunur, əksər milli parkların direktorları təyin olunub. Amma biz sahəni təhlil edərək bu qənaətə gəldik ki, təbiət elmləri, idarəetmə, turizmin təşkili və menecmenti ilə bağlı bilik və təcrübəyə malik daha bacarıqlı kadrların cəlb olunması üçün şəffaf bir müsabiqə təşkil edək.

- Namizədlərdən nələr tələb olunur və onlar hansı meyarlara cavab verməlidirlər?

- Namizədlərdən kompleks bacarıqların olması tələb olunur. İlk növbədə, əlbəttə ki, bu idarələr elmi-tədqiqat statuslu və birbaşa ekoturizmlə bağlı olduğundan, mühafizə komponentini özündə ehtiva etdiyindən rəhbər şəxslər təbiət elmləri, idarəetmə, turizmin təşkili və menecmenti ilə bağlı bilik, bacarıq və təcrübəyə malik olmalıdırlar. Direktorların yüksək natiqlik bacarığının olması Azərbaycanın nadir təbiət ərazilərinin təbliğatının təşkilinə kömək edə bilər. Eyni zamanda, onların həm xarici dil biliyi, həm də zəngin dünyagörüşü olmalıdır ki, milli parkları bacarıqla davamlı idarə edə, həmçinin turizmin inkişafına nail ola və elmi işi apara bilsinlər. Yəni bu ərazilər həm öyrənilməli, həm tədqiq olunmalı və onun nəticəsi ortaya qoyularaq turizmin inkişafına sərf olunaraq sonunda sinerjili bir nəticələrə gətirib çıxarmalıdır.

- Seçim necə aparılacaq və bu proses bütün milli parklar üçün nəzərdə tutulub?

- Biz seçimin tam şəffaf aparılmasında maraqlıyıq. Bildiyiniz kimi bununla bağlı nazirlikdə müsabiqə elan edilib, müsabiqə komissiyası yaradılıb. Müsabiqənin qiymətləndirilməsi üçün komissiyaya nazirliyin, ölkədə təbiəti mühafizə sahəsində mühüm işlər görən IDEA İctimai Birliyinin, Dövlət Turizm Agentliyinin və Azərbaycan Milli Elmlər Akademiyasının Zoologiya İnstitutunun mütəxəssisləri cəlb olunub. Bu qrup tərəfindən kompleks şəkildə namizədlərin bacarıqları qiymətləndiriləcək və seçim aparılacaq. Hazırda Ağgöl Milli Parkının direktor vəzifəsi vakantdır. İlk növbədə təbii ki, Ağgöl Milli Parkı üçün rəhbər seçiləcək, ondan sonra isə uğurlu nəticələr ortaya qoyan namizədlərin sırasından bir baza yaradılacaq. Digər milli parklarımız da mərhələlərlə bu müsabiqəyə açıq elan edildikdə həm o bazada olan namizədlərin içindən seçim aparılacaq, həm də yeni namizədlərin təklif və müraciətlərinə baxılacaq.

- Milli parklara yeni direktorların seçilməsi həmin xüsusi mühafizə olunan təbiət ərazilərinin idarə edilməsində yeniliklərin tətbiqi ilə əlaqədardır?

- Əlbəttə ki, milli parklarımız inkişaf edir. Əgər biz keçmişə nəzər salsaq, bir neçə il əvvəl milli park ərazilərində görülən işlər yalnız mühafizənin təşkilindən ibarət idisə, bu gün artıq biz qapılarımızı turistlərə açmışıq, turizmi inkişaf etdirmək istəyirik. Azərbaycanda xarici mütəxəssislərin iştirakı ilə yeni beynəlxalq turizm konsepsiyası hazırlanır, milli park ərazilərində xarici konsepsiya əsasında marşrutların markalanması aparılır, innovativ üsullardan istifadə olunaraq turistlərə məzmunlu məlumatlar çatdırılır ki, bütün bunlar da yeniliklərin tətbiqidir. Bəli, direktorlardan tələb olunan səriştə və bacarıqlardan biri də həmin innovativ məsələlərdə bacarığın, yeniliklərə meylin olması və bu sahədə yaradıcılıqdır.

- Müraciət edənlər varmı və onların sonrakı mərhələdə seçilməsi prosesi nə vaxt yekunlaşacaq?

- İlkin mərhələdə mayın 31-dək müddət qoyulub. Hazırda maraqlanan və sənəd təqdim edən xeyli namizəd var. Lakin bu tarix də müəyyən mənada şərtidir, çünki dediyimiz kimi ilkin mərhələdə Ağgöl Milli Parkına seçim edəcəyik. Paralel şəkildə digər milli park direktorlarının da bacarığı qiymətləndiriləcək və ehtiyac olduqca daxil olan sənədlər, eləcə də hazırkı müsabiqədə müraciət edənlər bazaya daxil ediləcək və onların müraciətindən istifadə olunacaq.