CƏMİYYƏT


İranlı nazir: Əlilliyi olan şəxslərin sağlamlıqlarının bərpası sahəsində Azərbaycanla əməkdaşlığa hazırıq

Bakı, 13 iyul, AZƏRTAC

Əmək və Əhalinin Sosial Müdafiəsi Nazirliyində İran İslam Respublikasının səhiyyə, müalicə və tibbi təhsil naziri Həsən Qazizadə Haşiminin başçılıq etdiyi nümayəndə heyəti ilə görüş olub.

Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, görüşdə əmək və əhalinin sosial müdafiəsi naziri Sahil Babayev Azərbaycan və İran arasında qədim tarixə malik əlaqələrin bu gün yüksək səviyyədə olduğunu vurğulayıb. O, Prezident İlham Əliyevin milli inkişaf siyasətinin mərkəzində vətəndaş amilinin dayandığını, ölkəmizdə iqtisadi inkişaf proseslərinin sosial firavanlığın təminatına yönələn siyasətə söykəndiyini diqqətə çatdırıb.

Nazir qeyd edib ki, əlilliyi olan şəxslərin sağlamlığının bərpası, onların peşə və sosial reabilitasiyası Azərbaycanda aparılan sosial siyasətin əsas istiqamətlərindən biridir. Hazırda nazirliyin respublikanın bütün bölgələrini əhatə edən bərpa mərkəzləri şəbəkəsi fəaliyyət göstərir. Dövlət başçısının tapşırığına əsasən, reabilitasiya sisteminin müasir tələblərə uyğun yenidən qurulması üçün mühüm addımlar atılır. Artıq nazirliyin bir çox bərpa mərkəzlərində yüksək standartlar səviyyəsində bərpa-müalicə şəraiti yaradılıb. Hazırda BMT-nin “Əlilliyi olan şəxslərin hüquqlarına dair Konvensiya”sının tələblərinə uyğun olaraq əlilliyi olan şəxslərin reabilitasiyasında sosial modelin tətbiqi prinsipləri əsasında “Fərdi reabilitasiya proqramın”ın hazırlanması işləri davam etdirilir. Əsas məqsəd əlilliyi olanların tibbi reabilitasiyasından sosial reabilitasiyasına və daha sonra peşə reabilitasiyasına, nəticədə onların yenidən cəmiyyətə qazandırılmasına nail olmaqdır.

Nazir bu sahədə İranla əməkdaşlıq müstəvisində fəal təcrübə mübadilələrinin hər iki tərəf üçün faydalı ola biləcəyini, eyni zamanda, tibbi-sosial reabilitasiya sahəsində yüksək səviyyəli kadr potensialının formalaşdırılması üzrə qarşılıqlı təcrübə mübadiləsi aparılmasının əhəmiyyətini diqqətə çatdırıb.

İranlı nazir ölkəsi ilə Azərbaycan arasında bütün sahələrdə əməkdaşlıq əlaqələrinin inkişafının məmnunluq doğurduğunu vurğulayıb. O, İranda səhiyyənin, reabilitasiya sisteminin inkişafı sahəsində görülən işlər barədə məlumat verib. Nazir tibbi-sosial reabilitasiya sisteminin səmərəli təşkili, əlilliyi olan şəxslərin sağlamlıqlarının bərpası sahəsində ikitərəfli əməkdaşlığa hazır olduqlarını qeyd edib.

Görüşdə əlilliyin qarşısının alınması və əlilliyi olan şəxslərin reabilitasiyası sahəsində əməkdaşlıq imkanları müzakirə olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.