MƏDƏNİYYƏT


Kiyevdə Müslüm Maqomayevin xatirəsinə həsr olunmuş konsert təşkil edilib

Kiyev, 10 noyabr, AZƏRTAC

Ukraynanın paytaxtı Kiyevdə Azərbaycan Respublikasının Dövlət Bayrağı Günü və dünya şöhrətli opera və estrada müğənnisi, bəstəkar, SSRİ Xalq artisti Müslüm Maqomayevin xatirəsinə həsr olunmuş möhtəşəm konsert proqramı təqdim edilib.

AZƏRTAC xəbər verir ki, Azərbaycanın Ukraynadakı səfirliyi və Ukrayna Azərbaycanlıları Birləşmiş Diasporunun birgə dəstəyi ilə reallaşan konsert Kiyev Opera Teatrında keçirilib.

Konsertdə Ukraynanın vilayətlərində yaşayan azərbaycanlılar da iştirak ediblər. Ukraynanın tanınmış müğənnisi, Xalq artisti, dünya şöhrətli maestro Vladimir Qrişkonun iştirakı ilə keçirilən konsertin açılışında o, azərbaycanlıları bayraq günü münasibətilə təbrik edib.

Konsert M.Maqomayevin “Ey əziz anam Azərbaycan” mahnısı ilə başlayıb. Konsert boyunca M.Maqomayevin repertuarından mahnılar səsləndirilib.

Sonda Azərbaycanın Ukraynadakı səfirliyinin müşaviri Vüsal Süleymanov və Ukrayna Azərbaycanlıları Birləşmiş Diasporunun sədri Hikmət Cavadov çıxış edərək hər iki ölkə arasında mədəni əlaqələrin inkişafındakı xidmətinə görə Vladimir Qrişkoya təşəkkür ediblər.

Qeyd olunub ki, bu gün azərbaycanlılar üçün ikiqat bayramdır. Həm dövlət bayrağımızın 100 illiyidir, həm də dünya şöhrətli sənətkarımız M.Maqomayevin xatirəsi anılır.

Emil Hüseynli

AZƏRTAC-ın xüsusi müxbiri

Kiyev

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.