REGİONLAR
Lənkəranda “Yurdum, yuvam məskənimsən Azərbaycanım” IV Yaradıcılıq Festivalı başa çatıb
Lənkəran, 2 sentyabr, Bağır Əliyev, AZƏRTAC
Lənkəran şəhərində, Milli Qəhrəman Əskər Əliyevin adını daşıyan parkda “Yurdum, yuvam məskənimsən Azərbaycanım” devizi ilə keçirilən IV yaradıcılıq festivalına yekun vurulub.
AZƏRTAC-ın bölgə müxbiri xəbər verir ki, mərasimdə çıxış edən Lənkəran Şəhər Mədəniyyət Mərkəzinin direktoru, festivalının təşkilat komitəsinin sədri Hafiz Mirzə rayonda ənənəvi keçirilən festivalın yekunları barədə məlumat verib.
Qeyd olunub ki, IV yaradıcılıq festivalı M.Kələntərli adına Lənkəran şəhər sənətkarlıq klubu ilə yanaşı, Boladi-1 folklor, Boladi-2 diyarşünaslıq, Vel kənd sənətkarlıq, Veravul kənd ziyalılar, Vilvan kənd folklor, Tütəpeştə kənd sənətkarlıq, Haftoni qəsəbə sənətkarlıq, Havzava kənd sənətkarlıq, Sütəmurdov kənd diyarşünaslıq, Tatova kənd sənətkarlıq, Rvo kənd yaradıcılıq, Ləj kənd sənətkarlıq klublarında, Osaküçə kənd yaradıcılıq, Separadi kənd folklor, Hirkan qəsəbə yaradıcılıq, H.Rzayev adına şəhər yaradıcılıq, Göyşaban kənd yaradıcılıq, Bürcəli kənd yaradıcılıq evlərində və şəhər Mədəniyyət Mərkəzində keçirilib.
Festivalda 67 müğənni, 18 bədii qiraətçi dinlənilib, 8 rəqs kollektivi çıxış edib. Tamaşaçıların sayı 4 mindən çox olub.
Diqqətə çatdırılıb ki, festival çərçivəsində 7 Filial Birliyi və Mədəniyyət Mərkəzinin iştirakı ilə iyun-avqust aylarında 21 konsert təşkil olunub.
Festivalın bütün mərhələlərində sənətkarların əl işlərindən ibarət sərgi təqdim olunub.
Tədbirdə çıxış edən Lənkəran Regional Mədəniyyət İdarəsinin rəisi Vüsal Nəsirli festivalın əhəmiyyətini yüksək dəyərləndirərək Mədəniyyət Nazirliyinin təşkilatçılığı ilə keçirilən “Bölgələrdən bölgələrə” II yaradıcılıq festivalında Lənkəran Regional Mədəniyyət İdarəsini uğurla təmsil etmiş bir qrup klub fəalına idarənin fəxri fərmanlarını təqdim edib.
Festivalın bağlanış mərasimində “Ay Lolo” və “Çölləmə” rəqs qruplarının gözəl ifası, bədii qiraət ustalarının məharəti, tamaşaçıların çoxluğu və fəallığı ilə fərqləniblər.
İfaçılara Mədəniyyət Mərkəzi tərəfindən IV yaradıcılıq festivalının laureat diplomları və hədiyyələr təqdim olunub.