CƏMİYYƏT


Məişət zorakılığına məruz qalmış əlillərə dəstək üçün təlimat hazırlanıb

Bakı, 7 dekabr, AZƏRTAC

Dekabrın 7-də Ailə, Qadın və Uşaq Problemləri üzrə Dövlət Komitəsi və Avropa İttifaqının təşkilatçılığı ilə “Məişət zorakılığından zərər çəkmiş həssas qrupdan olan şəxslərin müdafiəsi” mövzusunda konfrans keçirilib.

AZƏRTAC xəbər verir ki, Ailə, Qadın və Uşaq Problemləri üzrə Dövlət Komitəsinin sədri Bahar Muradova həssas qrupların insan hüquqları gündəliyinin ən vacib istiqamətlərindən biri olduğunu diqqətə çatdırıb. O, diqqətdən kənar qalan bu istiqamətə nəzərlərin yönəldilməsinin vacibliyini qeyd edib. Bildirib ki, konfransın əsas məqsədi bu sahədə mövcud olan tədbirlər proqramı, nəticələr və perspektivləri müzakirə etməkdir.

B.Muradova qeyd edib ki, 2020-ci ildə Dövlət Komitəsinə məişət zorakılığı ilə bağlı 242, 2021-ci ildə isə 364, cari ilin 11 ayı ərzində isə 435 müraciət daxil olub. Ötən illərlə müqayisədə müraciətlərin sayında artım var.

Konfransda çıxış edən Avropa İttifaqının Azərbaycandakı nümayəndəliyinin siyasi məsələlər üzrə məsul şəxsi xanım Annalisa Giansanti deyib ki, bu cür tədbirlərin keçirilməsinin əsas məqsədi həssas qrupları qorumaq və onlara səlahiyyət verməkdir. Hazırda aparılan kampaniya çərçivəsində işlər əsasən qadınlar, onların məişət zorakılığından qorunmasına fokuslanıb. Lakin bu sahədə fəaliyyətin xüsusilə ahilları və həssas qruplara daxil olan insanları əhatə etməsi olduqca vacibdir. Yaşlı və əlilliyi olan insanlar üçün sistemli keyfiyyətli xidmətlərin yaradılmasının, eyni zamanda, bu istiqamətdə maarifləndirmə tədbirlərinin aparılmasının əhəmiyyətli olduğunu söyləyib.

Milli Məclisin deputatı Fazil Mustafa çıxışında bildirib ki, 2010-cu ildə ölkəmizdə “Məişət zorakılığının qarşısının alınması haqqında” Qanun qəbul edilib. Bu istiqamət üzrə Azərbaycanda qanunvericilik kifayət qədər məqbuldur.

Digər çıxış edənlər - Əmək və əhalinin sosial müdafiəsi nazirinin müavini Hidayət Abdullayev və Vəkillər Kollegiyasının Rəyasət Heyətinin sədr müavini Şahmar Məmmədov tədbirin əhəmiyyətindən, mövzunun aktuallığından bəhs edib, ölkəmizdə belə şəxslərin hüquqlarının təmini istiqamətində görülən işlərdən danışıblar.

Sonra Avropa İttifaqı Gender Bərabərliyi Naminə İslahata Yardım Xidmətinin layihə eksperti Günel Mehdiyeva “Avropa İttifaqı Gender Bərabərliyi Naminə: İslahata Yardım Xidməti” layihəsini, Gender bərabərliyi, qadınların səlahiyyətləndirilməsi üzrə ekspert Xalisə Şahverdiyeva isə Məişət zorakılığına məruz qalmış ahıllar və əlilliyi olan şəxslərə xüsusi dəstək proqramlarının həyata keçirilməsinə dair Təlimatı təqdim ediblər.

Bildirilib ki, təlimat və xüsusi dəstək proqramı Avropa İttifaqının dəstəyi ilə İsveçin “NİRAS” şirkəti tərəfindən icra olunan “Avropa İttifaqı Gender Bərabərliyi Naminə: İslahata Yardım Xidməti” layihəsi çərçivəsində hazırlanıb. Təlimat məişət zorakılığının qurbanı olan əlilliyi olan şəxslər və ahıllara dəstək xidmətlərinə dair beynəlxalq standartlar, təcrübələr və modelləri, həmçinin Azərbaycanda məişət zorakılığına məruz qalan əlilliyi olan şəxslərin və ahılların dəstək xidmətlərinə olan ehtiyaclarının qiymətləndirilməsini özündə ehtiva edir.

Konfrans işini müzakirələrlə davam etdirib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.