SİYASƏT
Milli Məclisin növbəti plenar iclası keçirilib
Bakı, 3 aprel, AZƏRTAC
Aprelin 3-də Milli Məclisin növbəti plenar iclası keçirilib.
AZƏRTAC xəbər verir ki, Milli Məclisin sədri Oqtay Əsədov iclası açdıqdan sonra gündəlik təsdiq olunub.
Sonra cari məsələlərin müzakirəsinə başlanılıb.
Deputatlar Bakıda keçiriləcək birinci Avropa Oyunları ərəfəsində bəzi qüvvələr tərəfindən Azərbaycana qarşı böhtan və şər kampaniyası həyata keçirildiyini söyləyiblər. Bildirilib ki, belə çirkin əməllər bu mötəbər tədbirin uğurla keçirilməsinə maneə törətmək gücündə deyil. Azərbaycan bu cür mötəbər beynəlxalq yarışları keçirməyə qadirdir. Ölkəmiz bunu dəfələrlə sübut edib. Deputatlar, həmçinin bir neçə gün öncə erməni hərbi qulluqçusu Andranik Qriqoryanın könüllü olaraq Azərbaycan tərəfə keçməsinin Ermənistan ordusunda baş verən özbaşınalığın göstəricisi olduğunu qeyd ediblər. Müzakirələr zamanı deputatlar bir sıra təkliflər də səsləndiriblər.
Sonra Azərbaycan Respublikası Mərkəzi Bankı İdarə Heyətinin üzvlərinin təyin edilməsi haqqında qanun layihəsinə baxılıb. Milli Məclisin iqtisadi siyasət komitəsinin sədri Ziyad Səmədzadə qanun layihəsi haqqında məlumat verib. Qeyd edilib ki, qanun layihəsinə Mərkəzi Bankın sədri Elman Rüstəmovun və sədrin müavini Xəqani Abdullayevin Mərkəzi Bankın İdarə Heyətinin üzvü vəzifəsinə namizədliyi məsələsi daxildir. Bildirilib ki, hər bir dövlətin aktiv pul-kredit siyasəti ölkənin iqtisadi inkişafı, iqtisadi təhlükəsizliyinin təmini üçün çox vacibdir. Bu məsələ iqtisadi siyasət komitəsinin iclasında müzakirə olunub və hər iki namizədin bank sistemindəki fəaliyyəti yüksək qiymətləndirilib.
Qanun layihəsi səsə qoyularaq qəbul edilib.
Deputatlar Etibar Nəbiyevin Bakı Apellyasiya Məhkəməsinin hakimi təyin olunması haqqında qanun layihəsini də təsdiqləyiblər.
Daha sonra iclasda insan alverinə qarşı mübarizə üzrə milli koordinatorun illik məlumatı dinlənilib.
Milli koordinator, daxili işlər nazirinin müavini Vilayət Eyvazov bildirib ki, hər bir şəxsin hüquq və azadlıqlarının təmin edilməsini dövlət siyasətinin əsas istiqamətlərindən biri elan etmiş Azərbaycan tərəfdar çıxdığı beynəlxalq müqavilələri rəhbər tutaraq insan alverinə qarşı mübarizədə qanunvericiliyin və onun tətbiqi praktikasının təkmilləşdirilməsi, aidiyyəti dövlət qurumlarının səmərəli qarşılıqlı fəaliyyətinin təmin olunması, maarifləndirmə tədbirlərini və vətəndaş cəmiyyəti institutları ilə əməkdaşlığı yüksək səviyyədə təşkil etməkdə israrlı mövqeyini 2014-cü ildə də ortaya qoyub.
Bunun əyani təsdiqi olaraq dövlət başçısının Sərəncamı ilə 2014-2018-ci illər üzrə sayca üçüncü Milli Fəaliyyət Planı qəbul edilib. Milli qanunvericiliyin, beynəlxalq konvensiyaların tələblərinin, aidiyyəti nazirlik, komitə və xidmətlərin rəy və təkliflərinin, eləcə də qeyri-hökumət təşkilatlarının tövsiyələrinin əksini tapdığı bu konseptual sənədin 2014-cü ili əhatə edən bütün tədbirləri yerinə yetirilib. Avropa Şurasının İnsan Alverinə Qarşı Mübarizə üzrə Ekspertlər Qrupunun (GRETA) müvafiq Konvensiyadan irəli gələn öhdəliklərin icrasına dair hökumətə təqdim etdiyi hesabatda əksini tapan, o cümlədən cinayət təqibi, qurbanlara yardım, kompensasiya və reabilitasiya məsələlərinə dair tövsiyələri də planlı surətdə icra olunub.
Nazir müavini deyib ki, insan alverinə qarşı mübarizədə mühüm əhəmiyyət kəsb etməsi baxımından xarici dövlətlərin, o cümlədən təyinat və mənbə ölkələrin aidiyyəti orqanları və müvafiq beynəlxalq təşkilatlar ilə sözügedən problemin öyrənilməsi, məlumat toplanılması, səmərəli təcrübə mübadiləsi, ümumən əməkdaşlığın gücləndirilməsi məsələləri də diqqət mərkəzində saxlanılıb.
2014-cü ildə Qətər Dövləti ilə təhlükəsizlik məsələləri üzrə əməkdaşlığa dair Saziş imzalanıb, Mərakeş və Birləşmiş Ərəb Əmirlikləri ilə insan alverinə qarşı mübarizənin müqavilə-hüquq bazasının möhkəmləndirilməsi üzrə müvafiq tədbirlər görülüb.
Diqqətə çatdırılıb ki, sosial və iqtisadi səbəblərin doğurduğu məcburi əməyin qarşısının alınması, onun qurbanlarının müəyyən edilməsi də əsas vəzifələrdən olub. Daxili İşlər, Əmək və Əhalinin Sosial Müdafiəsi nazirlikləri və Dövlət Miqrasiya Xidməti tərəfindən paytaxtın və respublikanın ayrı-ayrı rayonlarında yerləşən tikinti sahələrində və istehsal müəssisələrində əmək miqrasiyasına nəzarət çərçivəsində keçirilmiş tədbirlərlə 4 məcburi əmək cinayəti, 164 inzibati xəta aşkarlanıb, qanunsuz əmək fəaliyyəti ilə məşğul olan 2543 əcnəbi deportasiya edilib.
Qeyd edilib ki, potensial qurbanların insan alveri riskindən müdafiəsində Heydər Əliyev Fondunun böyük əməyi və əhəmiyyətli töhfələri olub. Yetkinlik yaşına çatmış kimsəsiz qızlar üçün Fond tərəfindən 50 nəfərlik 25 mənzilli bina tikilib, eləcə də valideyn himayəsindən məhrum olmuş və yaşayış yeri olmayan uşaq evlərinin məzunları üçün 120 mənzilli bina inşa edilərək istismara verilib. İnsan alveri, xarici ölkələrdə işə və təhsilə düzəltmə halları, əcnəbilərlə nikahdan ortaya çıxan problemlər və sair məsələlərə dair “Qaynar xətt”ə daxil olan 13 mindən çox müraciətə baxılıb və hər biri üzrə qanunvericiliyə uyğun tədbir görülüb.
Vurğulanıb ki, 10 ildən çoxdur Azərbaycan beynəlxalq səviyyədə insan alverinə qarşı mübarizəyə öz töhfəsini verir. Milli maraqlar baxımından bu işə daim həssaslıqla yanaşılıb, qarşıda duran vəzifələr sistemli şəkildə yerinə yetirilib.
Deputatlar görülən işləri müsbət qiymətləndiriblər.
Məruzə səsvermə ilə nəzərə alınıb.
Deputatlar Seçki Məcəlləsində, “Azərbaycan Respublikasının 2001-ci il 29 iyun 168-IIQ nömrəli Qanunu ilə təsdiq edilmiş “Azərbaycan Respublikasının daxili işlər orqanlarında xidmət keçmə haqqında”, Azərbaycan Respublikasının 1999-cu il 8 dekabr tarixli 773-IQ nömrəli Qanunu ilə təsdiq edilmiş “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun tətbiqi haqqında əsasnamələrdə, “Məhkəmələr və hakimlər haqqında”, “Uşaq hüquqları haqqında”, “Bələdiyyələrin statusu haqqında”, “Polis haqqında”, “Notariat haqqında”, “Dövlət qulluğu haqqında”, “Konstitusiya Məhkəməsi haqqında”, “Dövlət sirri haqqında”, “İctimai televiziya və radio yayımı haqqında”, “Əmək pensiyaları haqqında”, “Azərbaycan Respublikası Əhalisinin Dövlət Reyestri haqqında”, “Hərbi vəzifə və hərbi xidmət haqqında”, “Antiinhisar fəaliyyəti haqqında”, “Haqsız rəqabət haqqında”, “Təbii inhisarlar haqqında”, “Yaşayış yeri və olduğu yer üzrə qeydiyyat haqqında” qanunlarda dəyişiklik edilməsi barədə qanun layihələrini də təsdiqləyiblər.
Həmçinin “Kənd təsərrüfatı informasiya-məsləhət xidməti haqqında” Azərbaycan Respublikası Qanununun layihəsi də birinci oxunuşda müzakirə olunub. 3 fəsil, 24 maddədən ibarət qanun Azərbaycan Respublikası Konstitusiyasının 94-cü maddəsinin I hissəsinin 20-ci bəndinə əsasən ölkə əhalisinin ərzaq təhlükəsizliyinin təmin edilməsi üçün həyata keçirilən aqrar siyasətin tərkib hissəsi olan kənd təsərrüfatı informasiya-məsləhət xidmətinin hüquqi, iqtisadi və təşkilatı əsaslarını müəyyən edəcək, kənd təsərrüfatı informasiya-məsləhət xidməti subyektləri ilə məhsul istehsalçıları, dövlət və yerli özünüidarə orqanları, digər fiziki və hüquqi şəxslər arasında yaranan münasibətləri tənzimləyəcək.
İclasda “Reklam haqqında” Azərbaycan Respublikasının qanun layihəsi ikinci oxunuşda müzakirə olunub.
Bildirilib ki, Milli Məclisin plenar iclasında birinci oxunuşda qəbul olunmuş qanun layihəsində təklif edilən dəyişikliklər diqqətdə saxlanılıb. Qanun layihəsində Azərbaycan dilinin normalarına uyğunluq tələbi əsas götürülən məsələlərdən biridir. Eyni zamanda, qanun layihəsində sosial reklam anlayışına, onun hazırlanması və yayımlanması qaydalarına aydınlıq gətirilib. Belə ki, Azərbaycanda bütün reklam yayımçıları ümumi reklam vaxtının, nəşrlərdəki reklam yerlərinin, reklam qurğularının ən azı 8 faizini sosial reklamlar üçün ayırmağa məcbur ediləcək. Qanun layihəsinə əsasən teleradioda sosial reklamların vaxtı saat 9:00-dan saat 24:00-a qədər müəyyən edilib.
Qanun layihəsində, həmçinin tərkibində 5 faizdən yuxarı alkoqol olan içkilərin reklamının yayımlanma vaxtına da məhdudiyyət qoyulub və dövrü nəşrlərin üz, arxa qapağında belə reklamların yerləşdirilməsi qadağan edilib.
Müzakirələrdən sonra qanun layihəsi ikinci oxunuşda qəbul olunub.