MƏDƏNİYYƏT
Müəllimlər və şagirdlər “Qırmızıpapaq”ı birlikdə izləyəcək
Bakı, 26 sentyabr, AZƏRTAC
Mütəmadi olaraq təşkil etdiyi sosial-mədəni aksiyalarla diqqəti cəlb edən A. Şaiq adına Azərbaycan Dövlət Kukla Teatrı nəzdindəki “Oyuq” teatr-studiyası yeni mövsümün ilk tamaşasını da maraqlı ideyaya həsr edib.
Teatrın mətbuat xidmətindən AZƏRTAC-a bildirilib ki, ideyaya əsasən, müəllimlərlə şagirdlər teatrın tamaşa salonunda oktyabrın 3-də bir araya gələrək “Qırmızıpapaq” tamaşasını izləyəcəklər.
Studiyanın son premyeralarından olan tamaşa fransız şair-tənqidçisi Şarl Perronun məşhur “Qırmızıpapaq” nağılı əsasında səhnələşdirilib.
Teatrın baş rejissoru Qurban Məsimov və studiyanın rəhbəri Səidə Haqverdiyevanın səhnələşdirdiyi tamaşanın quruluşçu rejissoru Günay Səttar, quruluşçu rəssamı İqbal Əliyev, bəstəkarı Vüqar Camalzadədir.
Səhnə nümunəsində rolları istedadlı “Oyuq”çular Selcan Müseyibova, Arif Əliyev, Murad Əlizadə, Həcər Abdullayeva, Aysu və Uğur Cəbrayılovlar, Nazan Qafarova, Mehriban Hüseynli, İnci Mustafalı, Atilla İbrahimli, İsmayıl Əliyev, Nuray və Aysu Abdullayevalar ifa edəcək.