Bakı, 22 iyun, AZƏRTAC

26 İyun - Silahlı Qüvvələr Günü ərəfəsində Azərbaycan Ordusunun əldə etdiyi nailiyyətləri ictimaiyyətə çatdırmaq və ordumuzun geniş təbliği məqsədilə mühəndis-istehkam hərbi hissəsinə mediatur təşkil olunub.

AZƏRTAC xəbər verir ki, mediatur çərçivəsində jurnalistlər üçün mühəndis təminatı barədə treninq keçirilib.

Media nümayəndələri mexaniki mina təmizləmə texnikaları ilə yaxından tanış olublar. Jurnalistlərə azad olunan ərazilərimizdə mühəndis işlərinin daha da sürətli və təhlükəsiz aparılması ilə bağlı ordumuzun ixtiyarında olan müasir hərbi texnikalar nümayiş etdirilib və onlar haqqında ətraflı məlumat verilib.

Baş leytenant Zöhrab Əzizov deyib ki, “MTU-90 M” modernləşdirilmiş körpüdür. Bu körpü vasitəsilə yarğanlardan, ensiz su maneələrindən keçidlərin açılması üçün istifadə olunur. İkinci Qarabağ müharibəsi zamanı bu texnikadan istifadə olunub və bütün döyüş tapşırıqları layiqincə yerinə yetirilib. Texnikanın yük götürmə qabiliyyəti 60 tonadəkdir. Yəni 60 tonadək bütün zirehli texnikalar bu körpünün üzərindən hərəkət edə bilər. Körpünün qurulma müddəti isə təqribən 2-3 dəqiqədir. Həmin müddətdə körpü qurulur və tam istifadəyə verilir.

Körpü qurularkən şəxsi heyət texnikanı tərk etmir və hidroötürücülər vasitəsilə körpü qurulur. Texnikanın heyəti mexanik sürücü və maşın komandiri olmaqla iki nəfərdən ibarətdir. Döyüş tapşırıqlarını layiqincə yerinə yetirən texnikadan Vətən müharibəsində Qubadlı istiqamətində Həkəri çayı üzərində istifadə olunub.

Mayor Nurlan Nəsirov qeyd edib ki, Türkiyədə istehsal edilən mexaniki mina təmizləmə texnikası “MEMATT”ın əsas təyinatı tank və piyada əleyhinə minaların təmizlənməsidir. Mexaniki mina təmizləmə texnikasının uzunluğu 6,8 metr, eni 2,8 metr, hündürlüyü 2,3 metrdir. Ümumi çəkisi 13 ton olan texnikanın mina təmizləmə sürəti saatda 0,5-1 kilometr təşkil edir. Texnika işğaldan azad olunmuş ərazilərdə mühəndis istehkam bölmələri tərəfindən ərazilərin minalardan təmizlənməsi məqsədilə istifadə edilir. O, idarəetmə pultu vasitəsilə uzaqdan idarəetmə qabiliyyətinə malikdir ki, bu da texnikanı 5 min metr məsafədən idarəetmə imkanı yaradır.

Polkovnik Mehman Daşdəmirov bildirib ki, Vətən müharibəsində qələbəyə töhfə verən bölmələrdən biri də mühəndis–istehkam bölmələridir. Ordumuzun bölmələrinin fasiləsiz hərəkəti üçün manevr və təxliyəyə daşımaların hazırlanmasında, düşmən obyektlərinin mühəndis kəşfiyyatında, düşmənin 30 il ərzində qurduğu istehkam qurğularının yarılmasında, istər döyüşlər zamanı, istərsə də müharibədən sonrakı dövrdə ərazilərin minalardan və partlamamış sursatlardan təmizlənməsində mühəndis bölmələrinin böyük rolu var. Vətən müharibəsi bitdikdən sonra da mühəndis təminatını həyata keçirən Azərbaycan Ordusunun Mühəndis Qoşunlarının hissə və bölmələri tərəfindən nəqliyyat vasitələrinin təhlükəsiz hərəkətini təmin etmək məqsədilə yollar minalardan və qar örtüyündən təmizlənir, sıradan çıxmış yollar işlək vəziyyətə gətirilir, dağlıq və çətin keçilən ərazilərdə yerləşən bölmələrimizin mövqelərinə yeni təminat yolları çəkilir.

Mina təmizlənmə işlərində əsas səylər azad olunan ərazilərimizdəki yaşayış məntəqələri, əkin sahələri, yollar və infrastruktur obyektlərinə yönəldilib.

Müharibədən sonra bu günədək 20 min hektardan çox ərazi mina və partlamamış sursatlardan təmizlənib, 18 minə yaxın partlamamış hərbi sursat piyada və tank əleyhinə mina zərərsizləşdirilib. Bununla yanaşı, bölmələrimizin fasiləsiz hərəkəti üçün 800 kilometrə yaxın yeni yol hazırlanıb, döyəclənib və bölmələrin istifadəsinə verilib. Bölmələrimiz tərəfindən düşmənin məhvetmə vasitələrindən qorunmaq üçün fortifikasiya qurğuları hazırlanıb.

Bu hərbi şəhərcikdə sizlərə nümayiş etdirilən texnikalar müharibədən sonra da verilən tapşırıqların icrasında tətbiq olunur.

Treninqdə, eləcə də xüsusi hazırlanmış mühəndis şəhərciyində istehkamçılar tərəfindən ərazinin kəşfi, minaaxtaranlar vasitəsilə minaların və partlamamış döyüş sursatlarının aşkarlanması və zərərsizləşdirilməsi mövzusunda fəaliyyətlərin praktiki olaraq icra edilməsi mətbuat nümayəndələri tərəfindən maraqla qarşılanıb.

Sonra hərbi hissənin təlim poliqonunda mühəndis-istehkamçılar təlim-məşq nümunələri təqdim ediblər.

Hərbi mühəndislər taktiki-xüsusi məşqlər zamanı qarşıya qoyulan tapşırıqları müvəffəqiyyətlə yerinə yetiriblər.

Media təmsilçiləri hərbi hissədə, həmçinin əsgərlər üçün yaradılmış şəraitlə, o cümlədən yeməkxana, hamam, yataqxana və tibb bölməsi ilə də tanış olublar.