REGİONLAR
Muxtar respublika əhalisinin həyat səviyyəsi yüksəlib
Naxçıvan, 17 oktyabr, AZƏRTAC
Naxçıvan Muxtar Respublikasında həyata keçirilən davamlı iqtisadi islahatlar iqtisadiyyatın dinamik inkişafına, makroiqtisadi göstəricilərin artımına, əhalinin rifah halının əhəmiyyətli dərəcədə yaxşılaşmasına səbəb olub.
AZƏRTAC-ın Naxçıvan bürosu xəbər verir ki, Naxçıvan Muxtar Respublikası Аli Məclisi Sədrinin 2019-cu il 29 mart tarixli Sərəncamı ilə təsdiq edilmiş “Naxçıvan Muxtar Respublikasının 2019-2023-cü illərdə sosial-iqtisadi inkişafı Dövlət Proqramı”nın icrası bu sahədə görülən işlərin davamlılığını təmin edib, muxtar respublikanın iqtisadi cəhətdən daha da qüdrətlənməsinə yeni imkanlar yaradıb.
Son 10 ildə 33 min 617 yeni iş yeri açılıb
Naxçıvan Muxtar Respublikası Ali Məclisi Sədrinin 2021-ci il 28 yanvar tarixli Sərəncamı ilə təsdiq edilmiş “2021-2025-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı” isə muxtar respublikada məşğulluq siyasətinin əsaslarını müəyyən etməklə, bu istiqamətdə həyata keçirilən tədbirlərin davamlılığının təmin edilməsində, müasir iqtisadi reallıqlar nəzərə alınmaqla əmək ehtiyatlarının əmək bazarına uyğunlaşdırılmasında və işaxtaranların, o cümlədən sosial müdafiəyə xüsusi ehtiyacı olan şəxslərin məşğulluğunun artırılmasında mühüm əhəmiyyətə malikdir. Dövlət Proqramının icrası ilə bağlı muxtar respublikanın əmək bazarında tələb və təklifin müəyyənləşdirilməsi məqsədilə mütəmadi təhlillər aparılır, müxtəlif peşə istiqaməti üzrə kadrlara olan tələbatı öyrənmək məqsədilə müəssisələrdə sorğular keçirilir. Bununla yanaşı, kompleks məşğulluq tədbirləri, o cümlədən əmək yarmarkaları, əmək bazarının tələblərinə uyğun peşə hazırlığı kursları təşkil olunur.
Muxtar respublikada son 10 ildə sahibkarlıq fəaliyyəti genişlənib, yeni istehsal müəssisələri fəaliyyətə başlayıb, sənaye sahəsində 1,6, kənd təsərrüfatında 1,9, əsas kapitala yönəldilən investisiyalarda 1,3, informasiya və rabitə sektorunda 1,5 dəfə artım olub. Bu dövrdə 33 min 617 yeni iş yeri açılıb, orta aylıq əməkhaqqı 1,6 dəfə artıb.
1941-1945-ci illər müharibəsi iştirakçıları və onlara bərabər tutulan şəxslərdən 570 nəfəri minik avtomobili, 288 nəfəri isə mənzil və fərdi yaşayış evləri ilə təmin olunub
Sosial-iqtisadi sahədə həyata keçirilən islahatlar nəticəsində sosial müdafiəyə ehtiyacı olan insanlara, o cümlədən sağlamlıq imkanları məhdud şəxslərə, şəhid ailələrinə, tənha ahıllara, habelə sağlamlıq imkanları məhdud uşaqlara göstərilən sosial xidmətlərin həcmi və keyfiyyəti əhəmiyyətli dərəcədə yüksəlib, bu istiqamətdə həyata keçirilən tədbirlər davamlı xarakter alıb. Cari ilin 9 ayında 459 sağlamlıq imkanları məhdud şəxsə sanatoriya və müalicə pansionatlarına göndəriş və putyovkalar verilib, 557 nəfər reabilitasiya vasitələri ilə təmin edilib, 12 nəfərin sоsiаl-məişət şərаitinin yахşılаşdırılmаsına köməklik olunub, 227 nəfərə isə protez-ortopedik xidmət göstərilib.
Ötən dövrdə müharibə iştirakçılarının sosial müdafiəsinin gücləndirilməsi də diqqətdə saxlanılıb. Azərbaycan Respublikasının suverenliyi və ərazi bütövlüyünün müdafiəsi zamanı sağlamlıq imkanları məhdudlaşan, 1941-1945-ci illər müharibəsi iştirakçıları və onlara bərabər tutulan şəxslərdən 570 nəfəri minik avtomobili, 288 müvafiq kateqoriyadan olan şəxs isə mənzil və fərdi yaşayış evləri ilə təmin olunub.
Aztəminatlı ailələrin sosial problemlərinin həlli, onların yaşayış səviyyəsinin yaxşılaşdırılması məqsədilə 2006-cı ildən ötən dövr ərzində aylıq gəlirləri ehtiyac meyarından aşağı olan ailələrə ünvanlı dövlət sosial yardımı ödənişi həyata keçirilib. Ehtiyac meyarının davamlı olaraq artmasına baxmayaraq, sosial yardım alan əhalinin sayı ilbəil azalıb. Buna səbəb muxtar respublikada yaradılan yeni iş yerləri hesabına sosial qayğıya ehtiyacı olan ailələrin əmək qabiliyyətli üzvlərinin fəal əməyə və özünüməşğulluq proqramına cəlb olunmasıdır. Ümumilikdə, muxtar respublikada həyata keçirilən məşğulluq tədbirləri zamanı işaxtaranların fərdi sahibkarlıq imkanlarının artırılması əsas hədəflərdən biri olub. Bu mənada, ötən dövrdə özünüməşğulluq proqramının icrasına xüsusi diqqət göstərilib. Proqrama əsasən əmək bazarında iş qabiliyyəti olan, lakin özünə iş tapmaqda çətinlik çəkən xüsusi qayğıya ehtiyacı olan vətəndaşların cəlbi həyata keçirilib, bu baxımdan sosial ədalət prinsipinin qorunmasına xüsusi önəm verilib.
1269 ailənin özünüməşğulluğu təmin edilib
Proqramın icrası həm də sağlamlıq imkanları məhdud şəxslərin məşğulluq imkanlarının artırılmasına və bu kateqoriyadan olan şəxslərin əmək bazarına sərbəst çıxış imkanları qazanmalarına səbəb olub. Bu günədək, ümumilikdə, 5899 nəfər ailə üzvü olan 1269 ailənin özünüməşğulluğu təmin edilib, 673 ailəyə verilən aktivlər müqavilədə göstərilən müddət bitdiyi üçün akt əsasında onların mülkiyyətinə keçirilib. Son dövrlərdə muxtar respublikada fəaliyyət göstərən banklar, sahibkarlıq subyektləri, o cümlədən “Nəqşicahan Holdinq Şirkətlər Qrupu” Məhdud Məsuliyyətli Cəmiyyəti də bu prosesdə sosial tərəfdaş qismində iştirak edib.
Muxtar respublikada iqtisadi və sosial əhəmiyyətli infrastruktur layihələrinin icrası, məşğulluq səviyyəsinin yüksəldilməsi, sosial xidmətlərin həcminin və keyfiyyətinin artması, makroiqtisadi sabitliyin ilbəil qorunub saxlanması bütün sahələrin davamlı inkişafını bundan sonra da təmin edəcək.