Azərbaycan hökumətinin başçısı ümidvar olduğunu bildirmişdir ki, Finlandiya nazirinin səfəri ikitərəfli münasibətlərin genişlənməsinə təkan verəcəkdir. Azərbaycan-Finlandiya iqtisadi əlaqələrinin istənilən səviyyədə olmadığını xatırladan Baş nazir qeyri-neft sektorunun inkişafında ölkəmizin Finlandiyanın təcrübəsinə maraq göstərdiyini vurğulamışdır. O demişdir ki, Finlandiya “Şimal-Cənub” və TRASEKA kimi iri nəqliyyat layihələrində daha fəal iştirak edə bilərdi.

Baş nazir ölkəmizdə aparılan iqtisadi islahatlardan, ictimai-siyasi sabitliyin bərqərar edilməsindən danışaraq, eyni zamanda vurğulamışdır ki, Ermənistan-Azərbaycan, Dağlıq Qarabağ münaqişəsinin nizama salınmaması respublikamız üçün başlıca problem olaraq qalır.

Erkki Tuomioyya Finlandiyanın müxtəlif sahələrdə, o cümlədən informasiya texnologiyaları və kommunikasiyalar sahəsində Azərbaycanla əlaqələri genişləndirməkdə maraqlı olduğunu bildirmişdir. O demişdir ki, indiki səfər zamanı Azərbaycanda sərmayə qoyuluşunun perspektivlərini öyrənmək üçün Finlandiyanın iş adamlarından ibarət nümayəndə heyətinin Bakıya gəlməsi barədə razılaşma əldə olunmuşdur.

Görüşdə qarşılıqlı maraq doğuran məsələlər müzakirə edilmişdir.