ELM VƏ TƏHSİL
Narkomaniya insanın şəxsiyyət kimi formalaşmasında ciddi problemlər yaradır
Bakı, 20 noyabr, AZƏRTAC
Narkomaniya təkcə insanın fiziki sağlamlığına mənfi təsir göstərmir, həm də onun mənəviyyat aləmində, şəxsiyyət kimi formalaşmasında ciddi problemlər yaradır.
Bu fikri noyabrın 20-də Bakı Slavyan Universitetində (BSU) bu ali məktəbin tələbələri ilə Daxili İşlər Nazirliyinin nümayəndələrinin görüşündə tədris işləri üzrə prorektor, professor Telman Cəfərov səsləndirib.
BSU-dan AZƏRTAC-a bildirilib ki, görüşün mahiyyəti barədə danışan T.Cəfərov təhsil müəssisələrində mütəmadi olaraq belə maarifləndirici tədbirlərin keçirilməsini gənclərin sağlam cəmiyyətə inteqrasiya etməsində mühüm addım olduğunu bildirib.
Nəsimi Rayon Polis İdarəsinin rəis müavini Vüsal Rüstəmov narkomaniya ilə bağlı xəstəliklər və bu bəla ilə mübarizə aparmağın yolları barədə məlumat verib. Orta və ali təhsil müəssisələrində narkomaniyaya qarşı vaxtaşırı maarifləndirici tədbirlərin keçirildiyini deyən rəis müavini bu sosial problem barədə gənc nəslin məlumatlı olmasının vacibliyini diqqətə çatdırıb. V.Rüstəmov qeyd edib ki, ölkəmizdə narkomanlığa qarşı mübarizənin gücləndirilməsi, antinarkotik təbliğat, narkomanlığa düçar olanların sağlam həyata qaytarılması və digər məsələlərlə bağlı qarşıya ciddi vəzifələr qoyulub. Narkomanlıq insan cəmiyyətinin mənəvi və əxlaqi dəyərlərinə ciddi zərbə vuran, sosial-iqtisadi inkişafa mənfi təsir göstərən, insanların həyat və sağlamlığına böyük təhlükə yaradan, həmçinin cinayətkarlığın artmasına səbəb olan əsas amillərdən biridir.
Tədbirin davamında yol hərəkəti qaydalarına düzgün riayət etməklə bağlı gənclərə məlumat verilib.
Bakı Şəhər Dövlət Yol Polisi İdarəsinin bölmə rəisi, polis polkovniki Vaqif Əsədov çıxışında bildirib ki, sürücü və piyadaların, uşaqların yol hərəkəti qaydalarına dair bilik və bacarıqlarının artırılması, onlara təhlükəsiz davranış vərdişlərinin aşılanması istiqamətində Daxili İşlər Nazirliyi tərəfindən mütəmadi olaraq maarifləndirici tədbirlər keçirilir. Ölkəmizdə son illərdə yol nəqliyyat hadisələrinin, avtomobil idarə edərkən diqqətsizlik və qaydalara düzgün riayət olunmaması üzündən baş verən qəzaların, insan ölümlərinin sayının azalmağa doğru getdiyini deyən V.Əsədov bunu yol polislərinin xidməti vəzifələrini uğurla yerinə yetirilməsinin nəticəsi kimi dəyərləndirib. O bildirib ki, yol hərəkəti təhlükəsizliyinin təmin edilməsi sahəsində keçirilən zəruri tədbirlərdən ən vacibi Bakı şəhəri ərazisindəki avtomobil yollarında piyada keçidlərinin sayının artması olub. V.Əsədov piyada və sürücülər tərəfindən törədilən inzibati xətalardan danışaraq deyib ki, foto-video qeydiyyat funksiyalı texniki vasitələrlə yol hərəkətinə nəzarət sahəsi genişləndirilib. Yol hərəkəti təhlükəsizliyinin təmini sahəsində əhalinin maarifləndirilməsi məsələsinə xüsusi diqqət yetirilməsinin vacibliyindən danışan polis polkovniki gənclərə yol hərəkəti qaydalarının kobud şəkildə pozulmasının səbəb ola biləcəyi ağır fəsadlar, qayda pozuntusunun insan həyatı üçün yaratdığı təhlükələr barədə xəbərdarlıq edib.