REGİONLAR


Naxçıvanda Beynəlxalq Müəllimlər Günü qeyd olunub

Naxçıvan, 6 oktyabr, AZƏRTAC

Azərbaycan xalqının milli təfəkküründə müəllim adı həmişə uca tutulub və onlara böyük ehtiram göstərilib. Azərbaycan müəllimləri də hər zaman ölkəmizin inkişafı və intibahı naminə fəaliyyət göstərib, xalqımızın maariflənməsi və tərəqqisi yolunda yorulmadan çalışıblar.

AZƏRTAC-ın Naxçıvan bürosu xəbər verir ki, bu sözləri “Naxçıvan” Universitetinin konfrans zalında keçirilən tədbirdə ali təhsil ocağının rektoru, professor İsmayıl Əliyev deyib.

Rektor müəllimləri bayram münasibətilə təbrik edib, ölkəmizdə bu şərəfli peşə sahiblərinə göstərilən qayğıdan danışıb. Bildirib ki, ümummilli liderimiz Heydər Əliyev müəllim əməyini həmişə yüksək qiymətləndirib, elmin, təhsilin inkişafını, geniş dünyagörüşə malik, savadlı və intellektual gənc nəslin yetişdirilməsini dövlət siyasətinin prioritet istiqaməti kimi müəyyənləşdirib. Ulu Öndərimizin layiqli davamçısı, Azərbaycan Respublikasının Prezidenti İlham Əliyev də təhsilin inkişafını dövlətin qarşısında duran ümdə vəzifə kimi qəbul edərək müəllimlərə qayğıkeş münasibət göstərir. Dövlət başçısının rəhbərliyi ilə ölkəmizdə ixtisaslı müəllim kadrlarının hazırlanması, müəllimlərin sosial vəziyyətinin yaxşılaşdırılması istiqamətində ardıcıl tədbirlər görülür.

Rektor diqqətə çatdırıb ki, Naxçıvan Muxtar Respublikasında öz peşəsini dərindən sevən peşəkar müəllim ordusu formalaşdırılıb. Cəmiyyətin maariflənməsi, bilikli, vətənpərvər, çalışqan və sağlam gəncliyin yetişdirilməsi yolunda yorulmadan çalışan muxtar respublika müəllimlərinin əməyi layiqincə qiymətləndirilir.

Sonra tədbirin bədii hissəsi olub. Tədbir iştirakçıları universitetin tələbəsi Pünhan Məmmədlinin hazırladığı videoçarxa baxıblar.

X   X   X

Yeni Azərbaycan Partiyası Naxçıvan Müəllimlər İnstitutunun ərazi ilk partiya təşkilatı və institutun ictimai tələbə təşkilatlarının iştirakı ilə Beynəlxalq Müəllimlər Günü münasibətilə tədbir keçirib.

Naxçıvan Müəllimlər İnstitutunda keçirilən tədbirdə ali təhsil ocağının rektoru, tarix üzrə fəlsəfə doktoru, dosent Elbrus İsayev çıxış edərək bildirib ki, ulu öndər Heydər Əliyev həmişə milli təhsilimizin müasir tələblər səviyyəsində qurulmasına diqqətlə yanaşırdı. Dahi rəhbərin təhsil siyasətinin uğurlu bəhrələridir ki, bu gün milli təhsilimizin məzmunca təkmilləşdirilməsi, müasir dünya təcrübəsi və milli ənənələr əsasında inkişafı təmin edilib, azərbaycançılıq ideologiyasını özündə əks etdirən tədris proqramları, çoxsaylı dərsliklər hazırlanıb, ayrı-ayrı sahələr və fənlər üzrə yeni standartlar tətbiq edilib.

Vurğulanıb ki, bu gün ölkəmizdə və muxtar respublikamızda təhsil quruculuğu uğurla həyata keçirilir. Naxçıvan Müəllimlər İnstitutunun ən müasir infrastrukturla, maddi-texniki baza ilə təchiz edilməsi bunu bir daha təsdiqləyir. Bütün bunlar müəllimləri sevindirir, onların məsuliyyətini daha da artırır və yeni uğurlara ruhlandırır.

Sonra digər çıxışlar olub.

Tədbirdə Beynəlxalq Müəllimlər Günü ilə bağlı videoçarx nümayiş etdirilib, tələbələrin ifasında musiqilər səsləndirilib, rəqs nömrələri göstərilib, şeirlər oxunub.

Sonda tədbir iştirakçıları ali təhsil ocağının tələbələrinin əlamətdar günlə bağlı hazırladıqları sərgiyə baxıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.