Bakı, 8 may, AZƏRTAC

Prezident İlham Əliyevin təşəbbüsü və rəhbərliyi ilə ölkəmizdə aparılan kompleks islahatlar, işğaldan azad edilmiş ərazilərdə bərpa-yenidənqurma işlərinin, “ağıllı” kənd və s. tipli yeni infrastruktur layihələrinin reallaşdırılması Azərbaycan alimlərinin, o cümlədən AMEA-nın qarşısında bir sıra mühüm vəzifələr qoyur. Həmin vəzifələrin icrası elmi fəaliyyətin müasir dövrün çağırışlarına və milli maraqlara müvafiq həyata keçirilməsini, bu sahədə də geniş islahatların aparılmasını zəruri edir.

İnformasiya Texnologiyaları İnstitutundan AZƏRTAC-a bildirilib ki, bunu AMEA Fizika-Riyaziyyat və Texnika Elmləri Bölməsinin (FRTEB) Ümumi yığıncağında FRTEB-in rəhbəri, akademik Rasim Əliquliyev prioritet istiqamətlər barədə danışarkən söyləyib.

Akademik, həmçinin son zamanlar dünya elmində gedən proseslərə, müasir çağırışlara adekvat olaraq elm və innovasiya, elm və təhsil, eləcə də elmin digər sahələr ilə inteqrasiyasının müşahidə olunduğunu və onun artıq qapalı sosial institut kimi deyil, açıq bir mühit kimi bütün proseslərə təsir etdiyini söyləyib.

Alim hazırda dünya dövlətlərinin strateji gücünün onların elmi, intellektual potensialları ilə qiymətləndirildiyini, aparıcı ölkələrin öz görkəmli alimləri, elmi-tədqiqat institutları və innovasiya mərkəzləri ilə nüfuz qazandığını deyib. Akademikin fikrincə, cəmiyyətin bütün sferalarında yüksək texnologiyaların tətbiqinin genişləndirilməsi və innovativ fəaliyyətin təşkili dövlət siyasətində mühüm yer tutur. Həyatın istənilən sahəsində qabaqcıl elmin tətbiqi, milli intellektual məhsulun formalaşması, daxili bazarın iqtisadi təhlükəsizliyinin qorunması və xaricdən asılılığın azalması, qlobal dünyaya inteqrasiya, eyni zamanda, inkişaf etmiş ölkələrlə əməkdaşlığın təşkili Azərbaycanın regionda lider dövlətə çevrilməsinə rəvac verir.

Akademik Rasim Əliquliyev tədbir iştirakçılarının diqqətini müasir dövrün çağırışları və ölkəmizin sosial-iqtisadi, mədəni-mənəvi inkişafından irəli gələn vəzifələr kontekstində AMEA FRTEB-in Ümumi yığıncaq iclaslarında müzakirəsi vacib olan prioritet məsələlərə yönəldib. Onun sözlərinə görə, elmi müəssisələrdə araşdırılan aktual elmi-nəzəri və praktiki problemlər, dövlət siyasətinin icrası istiqamətində görülən işlər, tətbiqi və innovativ sahədə həyata keçirilən fəaliyyət daim FRTEB-in Ümumi yığıncağının diqqət mərkəzində olmalıdır. Bunlarla yanaşı, elmlə təhsilin inteqrasiyası, elektron elmin formalaşması və “AzScienceNet” şəbəkəsinin resurslarından istifadə FRTEB-in və onun elmi müəssisələrinin fəaliyyətində mühüm mövqe tutur.

Alim onu da qeyd edib ki, beynəlxalq əməkdaşlığın, icra olunan qrant layihələrinin, ictimaiyyətlə əlaqələrin və elmi biliklərin populyarlaşdırılmasının, dərc olunan elmi jurnalların keyfiyyətinin, gənc alimlərin əldə etdikləri elmi nailiyyətlərin diqqət mərkəzində saxlanılması, müzakirə olunaraq müvafiq hesabatların hazırlanması da Ümumi yığıncaq qarşısında duran olduqca vacib məsələlərdir.