Gəncə, 22 noyabr, Rauf Hacıyev, AZƏRTAC

Ədliyyə işçilərinin peşə bayramı Gəncə və Daşkəsəndə də qeyd olunub.

AZƏRTAC xəbər verir ki, Gəncənin ədliyyə işçiləri əvvəlcə şəhərin mərkəzi meydanında ulu öndər Heydər Əliyevin abidəsini ziyarət edib, önünə gül-çiçək dəstələri düzüblər.

Sonra Mərkəzi Qan Bankının Gəncə bölməsinə gələn Gəncə Regional Ədliyyə şöbəsinin əməkdaşları tibbi yoxlanışdan keçərək, talassemiya və hemofiliyalı xəstələrə yardım məqsədilə qan veriblər.

Qeyd edək ki, Gəncə Regional Ədliyyə Şöbəsi Gəncənin Kəpəz və Nizami rayonları ilə yanaşı, ətraf yeddi rayona da xidmət göstərir.

 X   X   X

Daşkəsən rayonunda Ədliyyə işçilərinin peşə bayramı münasibətilə təşkil olunan tədbirdə rayon icra hakimiyyətinin başçısı Əhəd Abıyev, hüquq-mühafizə orqanlarının rəhbərləri, məhkəmə işçiləri, ədliyyə qulluqçuları, ziyalılar və rayon ictimaiyyətinin nümayəndələri iştirak ediblər.

AZƏRTAC xəbər verir ki, tədbir iştirakçıları əvvəlcə rayon mərkəzində ümummilli lider Heydər Əliyevin abidəsini ziyarət edərək önünə gül dəstələri qoyub, Ulu Öndərin əziz xatirəsini ehtiramla anıblar.

Peşə bayramlarını qeyd edən ədliyyə işçiləri rayonun Şəhidlər xiyabanında xalqımızın azadlığı və ölkəmizin ərazi bütövlüyü uğrunda canlarından keçən qəhrəman Vətən övladlarının da əziz xatirəsini anıb, şəhid məzarları üzərinə gül dəstələri düzüblər.

Rayonun Heydər Əliyev Mərkəzində keçirilən tədbirdə Daşkəsən Rayon İcra Hakimiyyətinin başçısı Əhəd Abıyev çıxış edərək bildirib ki, ümummilli lider Heydər Əliyevin 11 noyabr 2000-ci il tarixli Sərəncamı ilə 22 noyabr Ədliyyə işçilərinin peşə bayramı günü kimi təsis olunub. Respublikamız müstəqilliyini bərpa etdikdən sonra ulu öndər Heydər Əliyevin rəhbərliyi ilə bütün sahələrdə olduğu kimi, zəngin ənənələrə malik Azərbaycanın ədliyyə orqanlarında da əsaslı islahatlar aparılmağa başlanılıb. Həmin dövrdə Ulu Öndərin sədrliyi ilə Hüquqi İslahat Komissiyası yaradılıb və qısa müddətdə hüquq sistemi demokratik prinsiplər əsasında tamamilə yenidən qurulub. Beynəlxalq hüquq normalarının tələbləri nəzərə alınmaqla, ölkəmizdə yeni hüquqi qanunvericilik bazası yaradılıb.

Qeyd edilib ki, Ümummilli Liderin dövlət quruculuğu xəttini uğurla davam etdirən Prezident İlham Əliyev tərəfindən həyata keçirilən məqsədyönlü tədbirlər nəticəsində ədliyyə və məhkəmə sisteminin müasirləşdirilməsi üzrə mühüm qərarlar qəbul olunub. Dövlətimizin başçısının insan hüquqlarının etibarlı qorunması, hüquqi xidmətin yaxşılaşdırılması, ədalət mühakiməsinin səmərəliliyinin artırılması barədə tapşırıqlarının icrası üzrə görülmüş tədbirlər nəticəsində Ədliyyə Nazirliyi öz inkişafının müasir mərhələsinə qədəm qoyub, məhkəmə-hüquq islahatları prosesi keyfiyyətcə yeni səviyyəyə qalxıb, ədliyyə və məhkəmə infrastrukturu əhəmiyyətli dərəcədə yeniləşdirilib.

Sonra Daşkəsən Rayon Məhkəməsinin sədri Azad Əliyev çıxış edərək bildirib ki, məhkəmə hakimiyyətinin yüksək statusu nəzərə alınaraq məhkəmə infrastrukturunun müasirləşdirilməsi və elektronlaşdırılması istiqamətində son illər böyük işlər görülüb. Ədliyyə işçiləri öz vəzifələrini layiqincə yerinə yetirmək, Prezidentin ətrafında sıx birləşərək demokratik-hüquqi dövlət quruculuğu, Azərbaycan Ədliyyəsinin davamlı inkişafı üçün bundan sonra da fədakarlıqla çalışmaq əzmindədirlər.