Paris, 26 noyabr, AZƏRTAC

Müasir dövrün ən çox ifa olunan bəstəkarlarından biri Dmitri Şostakoviçdir. Müxtəlif ölkələrdə sırf XX əsrin bu böyük simfoniyaçısının musiqisinə həsr olunmuş onlarca beynəlxalq musiqi festivalı keçirilir. Bütün Avropa ölkələrinin paytaxtlarında artıq uzun illərdir ki, Şostakoviç mərkəzləri bir-biri ilə fəal əməkdaşlıq edir. Onlar öz çoxşaxəli fəaliyyətini bəstəkarın müəlliflik hüquqlarından əldə edilən milyonlarla vəsait üzərində qururlar.

Ən fəal belə mərkəzlərdən biri - “Association Internationale Dimitri Chostakovitch” Parisdə yerləşir və bəstəkarın dul xanımı İrina Antonovna Şostakoviç tərəfindən dəstəklənir. Hər il Parisdə “Şostakoviç və onun şagirdləri” rubrikası ilə konsertlər təşkil etmək ideyası da məhz ona məxsusdur. Belə konsertlər Boris Tişşenkonun, Qalina Ustvolskayanın, Meçislav Vaynberqin və s. bəstəkarların yaradıcılığına həsr olunub.

AZƏRTAC xəbər verir ki, Mərkəzin Şostakoviç məktəbi ənənələrinin aktuallığı, onların daim yenilənməsi və zənginləşməsi üzərində qurulmuş “Şostakoviç-Qarayev-Əlizadə” layihəsi Parisdə xüsusi maraq doğurub. “Şostakoviç-Qarayev-Əlizadə” konsertləri 2005-ci ildən başlayaraq Mərkəzin himayəsi ilə Sorbonnada “Salle Adyar” kimi böyük konsert salonlarında, habelə Mərkəzin özündə keçirilir.

Noyabrın 25-də bu rubrikadan olan növbəti konsert müasir musiqi xiridarlarını bir araya gətirib. Firəngiz Əlizadə “Music for Piano” əsərini ifa edib. Sonra bəstəkar D.Şostakoviç ilə Azərbaycan musiqi mədəniyyəti arasında uzun illər mövcud olmuş möhkəm əlaqələrdən danışıb. Beynəlxalq müsabiqələrin laureatları Ümidə Abbasova (skripka) və Səidə Tağızadənin (fortepiano) ifasında Qara Qarayevin və Dmitri Şostakoviçin əsərləri səslənib. Hazırda Parisdə məşhur Rəna Şereşevskayanın sinfində təhsil alan Vurğun Vəkilov konsertdə iştirak edib. O, Qara Qarayevin “İnsan məskən salır” filminə yazdığı kompozisiyanı ifa edib.

2005-ci ildə violonçelçalanların M.Rostropoviç adına Beynəlxalq müsabiqəsində iştirak etmiş fransız violonçelçalan Metyu Lejenin konsertdə iştirakı dinləyicilər üçün xoş sürpriz olub. Təsadüfi deyil ki, Firəngiz Əlizadənin violonçel üçün əsərləri, o cümlədən məxsusi olaraq müsabiqə üçün yazılmış “Oyan!” adlı pyesi onun repertuarında böyük yer tutur. Firəngiz Əlizadənin musiqisini ifa edən Metyu Leje gecənin proqramını zənginləşdirib. Onun çıxışı sürəkli alqışlarla qarşılanıb.

Gecənin sonunda iştirakçılar dinləyicilərin çoxsaylı suallarına cavab veriblər. Dinləyicilər konsertdə yeni musiqi təəssüratları qazanmaqla bərabər, Azərbaycan musiqi mədəniyyəti xadimlərinin Dmitri Şostakoviç ilə əlaqələri barədə maraqlı informasiya əldə ediblər.

Şəhla Ağalarova

AZƏRTAC-ın xüsusi müxbiri

Paris