Bakı, 21 yanvar, AZƏRTAC

Yanvarın 21-də Ədliyyə Nazirliyi Penitensiar Xidmətinin Baş idarəsində 2021-ci ildəki fəaliyyətin yekunlarına dair videokonfrans formatında əməliyyat müşavirəsi keçirilib.

AZƏRTAC xəbər verir ki, müşavirədə Xidmətin Baş idarəsinin, eləcə də tabe qurumlarının rəhbər heyəti və Ədliyyə Nazirliyinin məsul əməkdaşları iştirak ediblər.

Ədliyyə nazirinin müavini - Penitensiar Xidmətin rəisi ədliyyə general-leytenantı Ceyhun Həsənov müşavirəni açaraq hesabat dövründə əldə olunmuş nailiyyətlər, həyata keçirilmiş mühüm yeniliklər və qarşıda duran hədəflər barədə məlumat verib.

Qeyd olunub ki, Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılan parlaq Qələbə ilə torpaqlarımız işğaldan azad olundu və tarixi ədalət bərpa edildi. Prezident İlham Əliyevin müdrik siyasəti nəticəsində ölkəmizin beynəlxalq nüfuzu daha da güclənib və qarşıya qoyulan əsas hədəflərə nail olunub. İşğaldan azad edilmiş ərazilərdə genişmiqyaslı və sürətli bərpa işlərinə başlanılıb. Zəfər yolunun, Füzuli Beynəlxalq Hava Limanının açılışı olub, Ağdam şəhərinin, Zəngilan və Laçın Beynəlxalq Hava limanlarının təməli qoyulub. Birinci vitse-prezident Mehriban xanım Əliyevanın təşəbbüsü ilə bu istiqamətdə mühüm işlər görülüb, mədəni-tarixi irsimizin təbliği, şəhid ailələrinə dəstək və qazilərimizin xaricdə müalicəsi yüksək səviyyədə təşkil olunub. Bütün bu müddətdə dövlətimizin başçısının işğaldan azad olunmuş ərazilərə müntəzəm səfərləri böyük dirçəlişin və qayıdışın təminatıdır.

Sonra Penitensiar Xidmətin rəis müavini, ədliyyə general-mayoru Oqtay Məmmədov Xidmətin 2021-ci il ərzindəki fəaliyyətinin yekunlarına dair hesabat məruzəsi ilə çıxış edib.

Məruzəçi bildirib ki, ötən dövrdə Penitensiar Xidmət tərəfindən dövlətimizin başçısının müvafiq fərman və sərəncamları, nazirliyin kollegiya qərarları, nazirlik üzrə əmr və göstərişlər rəhbər tutularaq fəaliyyət istiqamətləri üzrə penitensiar sistemin inkişafına, kadr potensialının gücləndirilməsinə, həbs edilmiş şəxslərin, məhkumların saxlanma şəraitinin yaxşılaşdırılmasına, onların hüquqlarının etibarlı qorunmasına yönəlmiş ardıcıl və məqsədyönlü tədbirlər həyata keçirilib. Ölkədə tətbiq olunmuş xüsusi karantin rejiminin tələblərinə ciddi riayət olunmaqla Operativ Qərargahın, nazirlik və Xidmət üzrə verilmiş əmr və sərəncamların tələbləri rəhbər tutulmaqla penitensiar müəssisələrdə davamlı olaraq dezinfeksiya işləri və profilaktiki tədbirlər davam etdirilib, yaş qrupları üzrə işçi heyətin və məhkumların COVID-19 infeksiyası əleyhinə vaksinasiyası həyata keçirilib.

Azərbaycan Respublikası Prezidentinin humanist siyasətinin davamı olan 2021-ci il 18 mart tarixli, 625 məhkuma şamil olunan Əfv Sərəncamı vaxtında və qüsursuz icra edilib. Azadlıqdan məhrumetmə cəzasına məhkum edilmiş 425 nəfər cəzanın çəkilməmiş hissəsindən azad olunub, 98 nəfərin cəzasının çəkilməmiş hissəsi yarıyadək azaldılıb, ömürlük azadlıqdan məhrum edilmiş 3 nəfərin cəzası 25 il müddətə azadlıqdan məhrumetmə cəzası ilə əvəzlənib.

Dövlətimizin başçısının təşəbbüsü ilə 2021-ci il noyabrın 5-də Milli Məclis tərəfindən “8 Noyabr – Zəfər Günü münasibətilə amnistiya elan edilməsi haqqında” Qərar qəbul edilib. Amnistiya aktı məhkumlardan 3411 nəfərinə və ya 60 faizinə tətbiq edilib. Onlardan 2704 məhkum azad edilib, 707 məhkumun cəza müddəti azaldılıb.

Bildirilib ki, 2020-ci il mayın 1-də Cinayət Məcəlləsinə edilmiş dəyişikliklərlə bağlı qəbul olunmuş qanunun icrası davam etdirilib. Bu dövrdə qanunun təsiri altına düşən məhkumların müvafiq sənədləri məhkəmələrə təqdim edilib. Məhkəmələr tərəfindən 63 nəfər azad edilib, 4 nəfərin cəza çəkdiyi rejim dəyişdirilib, 730 nəfərin cəza müddəti azaldılıb, 237 nəfərin cəza müddəti dəyişdirilmədən saxlanılıb, 643 nəfərin ərizəsi təmin olunmayıb.

Cəzadan şərti olaraq vaxtından əvvəl azad olunma, cəzaçəkmə müəssisəsinin növünün dəyişdirilməsi sahəsində fəaliyyətin təkmilləşdirilməsi, sənədləşmənin aparılmasında mövcud olmuş nöqsanların aradan qaldırılması üzrə tədbirlər davam etdirilib. Virtual qaydada keçirilən 240 iclasda xüsusi komissiya tərəfindən məhkəməyə 2214 müraciətin göndərilməsi tövsiyə olunub. Məhkəməyə göndərilmiş müraciətlərdən 1907-si (86,1 faiz) təmin edilib.

Keçirilən kompleks əməliyyat-rejim tədbirləri nəticəsində həbs olunmuş şəxslər və məhkumlar tərəfindən törədilməsi ehtimal olunan 753 cinayət hadisəsinin qarşısı alınıb.

Hesabat dövründə məhkum və həbs edilmiş şəxslər, görüşə gəlmiş, sovqat gətirmiş vətəndaşların üzərindən ümumilikdə 193 min 371 qram narkotik və psixotrop maddələr, 47 mobil telefon aşkarlanaraq götürülüb və qanunvericilikdə nəzərdə tutulmuş tədbirlər görülüb.

Cinayətkarlıqla mübarizədə digər hüquq-mühafizə orqanları ilə qarşılıqlı əlaqələr səmərəli şəkildə təşkil olunub. Xidmətin Əməliyyat aparatının Daxili İşlər Nazirliyinin müvafiq qurumları ilə birgə keçirdiyi əməliyyat tədbirləri nəticəsində Abşeron, Cəlilabad və Yasamal rayonlarında 43 kiloqramdan çox müxtəlif növ narkotik vasitə aşkarlanaraq götürülüb. Həmçinin 39 epizod üzrə cibgirlik etmiş şəxs və quldurluqla məşğul olan cinayətkar dəstənin üzvləri saxlanılaraq cinayət məsuliyyətinə cəlb olunub. 2003-cü ildə paytaxtın Əmircan qəsəbəsində qətl hadisəsi törətmiş şəxs Penitensiar Xidmətin əməliyyat aparatının məlumatı əsasında müəyyən edilib və həmin cinayət hadisəsinin üstü açılıb. Cinayətkarlıqla mübarizədə ölkənin hüquq-mühafizə orqanları ilə birgə keçirilmiş əməliyyat tədbirləri nəticəsində həbs edilmiş şəxslər və məhkumlar tərəfindən könüllü olaraq təqdim olunmuş 1 tapança və 2 tüfəng ərazi polis orqanlarına təhvil verilib.

Ədliyyə orqanlarına işə qəbul üzrə Müsabiqə Komissiyasının şəffaf və səmərəli fəaliyyəti, vakant vəzifələrin vaxtında komplektləşdirilməsi nəticəsində Penitensiar Xidmətə 187 nəfər işə qəbul edilib və onların sayı 2020-ci illə müqayisədə 5,6 faiz artıb.

Xidmətin Vətən müharibəsinin iştirakçısı olmuş, dövlət mükafatlarına layiq görülmüş 5 mülki işçisi nazirliyin rəhbərliyi tərəfindən qəbul edilərək dəfələrlə mükafatlandırılıb. Onlardan iki nəfəri kiçik rəis heyətinə qulluğa qəbul edilib. Ümumilikdə Vətən müharibəsində iştirak etmiş 19 nəfər kiçik rəis heyətinə, 2 nəfər isə mülki vəzifələrə işə qəbul olunub.

Cəzaçəkmə müəssisələrində fəaliyyət göstərən 8 peşə məktəbi, 11 peşə filialı və qruplarında 17 ixtisas üzrə 62 qrupda 1220 məhkum peşə təhsilinə cəlb olunub. Onlardan 946 məhkum təhsillərini başa vuraraq müvafiq diplomlara yiyələnib.

Müşavirədə Penitensiar Xidmətin cəzaçəkmə müəssisələrinin rəhbərlərinin çıxışları dinlənilib.