REGİONLAR
Qarabağ Zəfəri yeni inkişaf mərhələsi üçün zəmin yaradıb
Gəncə, 24 sentyabr, Elcan Məmmədov, AZƏRTAC
Dini Qurumlarla İş üzrə Dövlət Komitəsinin (DQİDK) Gəncə bölgəsi üzrə şöbəsinin təşkilatçılığı ilə “Vətən müharibəsindəki Qələbəmizdə milli-mənəvi dəyərlərimizin rolu” mövzusunda seminar-müşavirə keçirilib.
Karantin qaydalarına əməl olunmaqla təşkil edilən tədbirdə deputatlar, ziyalılar, şəhər ictimaiyyətinin nümayəndələri, şəhid ailələri və qazilər, din xadimləri, dini icma sədrləri iştirak ediblər.
AZƏRTAC-ın bölgə müxbiri xəbər verir ki, əvvəlcə Vətən müharibəsi zamanı həlak olan şəhidlərin xatirəsi bir dəqiqəlik sükutla anılıb.
Tədbiri açan DQİDK-nın Gəncə bölgəsi üzrə şöbəsinin müdiri Həsən Məmmədov bildirib ki, 44 günlük Vətən müharibəsində əldə olunmuş şanlı Zəfər Azərbaycan dövləti və xalqı üçün yeni bir gələcək, yeni bir inkişaf mərhələsi üçün zəmin yaradıb. Qələbəmizin təmin olunmasında xalqımızın birliyi, həmrəyliyi, milli-mənəvi dəyərlərimiz, multikultural cəmiyyətimiz böyük əhəmiyyət daşıyıb.
Deputatlar Pərvin Kərimzadə və Müşfiq Cəfərov çıxışlarında Azərbaycan xalqının sərvəti olan milli-mənəvi dəyərlərdən söhbət açıblar. Qeyd ediblər ki, düşmənə qarşı səngərdə birləşən və Azərbaycanın bütövlüyü uğrunda canını fəda edən oğullarımız məhz milli-mənəvi dəyərlərimizin bizə verdiyi gücün, qüvvənin sayəsində Prezidentimizin “Mən hər bir azərbaycanlının Prezidentiyəm”, “Biz birlikdə güclüyük” və “Qarabağ Azərbaycandır!” şüarlarını özləri üçün həyat fəlsəfəsinə çeviriblər. Belə bir gücün qarşısında isə heç bir düşmən davam gətirə bilməzdi, elə gətirmədi də. Bu birlik, bu inam Azərbaycanın qəti və şanlı Zəfəri ilə nəticələndi.
Çıxış edən Dövlət Komitəsinin əməkdaşı Elmar Fətəliyev tədbir iştirakçılarına Vətən müharibəsi zəfərində milli-mənəvi dəyərlərin rolu haqqında geniş məlumat verib. Bildirib ki, düşmənlərimiz ötən 30 ilə yaxın müddətdə Azərbaycan xalqının milli dəyərlərinə qarşı vandal münasibət bəsləyib, milli keçmişimizi özündə əks etdirən tarixi-dini abidələrimizə qarşı soyqırımı həyata keçiriblər. 28 il düşmən işğalında qalan, Prezident İlham Əliyevin diplomatik səyi nəticəsində qan tökülmədən düşməndən azad olunan Ağdam rayonu “Qafqazın Hirosiması” adlandırılır. 1990-cı illərin əvvəlinə kimi nəinki respublikamızda, hətta ümumittifaq səviyyəsində mədəniyyəti, tarixi, sənayenin inkişafı, abadlığı ilə göz oxşayan Ağdam rayonu ermənilər tərəfindən yerlə-yeksan edilib. Ermənilər ötən 30 il ərzində İslam dininə mənsub tarixi abidələrlə yanaşı, həm də xristian-alban məbədlərini də ya yerlə-yeksan etməyə, ya da özününküləşdirməyə çalışıblar. Həmin tarixi abidələrdən Azərbaycanın izini silməyə çalışanlar elə dərk ediblər ki, bununla da özlərinə saxta tarix düzəldə bilərlər. Amma bu, mümkün deyil. Çünki həmin ərazilər, orada olan abidələr və o abidələrin xüsusiyyətləri, tikilişləri birmənalı şəkildə Azərbaycan tarixinin bir hissəsidir. Hazırda Azərbaycanın qəlbi Qarabağla, Vətən müharibəsinin Zəfəri ilə döyünür. Necə ki, 2020-ci ilin sentyabrında hər bir azərbaycanlı Prezident İlham Əliyevin bir çağırışı ilə müsəlləh əsgərə çevrilərək torpaqlarımızı işğaldan azad etmək üçün əlinə silah aldı, bu gün də hər birimiz bu qələbənin möhkəmlənməsi üçün çalışmalıyıq.
44 günlük Vətən müharibəsi zamanı qəhrəmancasına şəhid olan Amal Əhmədovun anası Fəridə xanım çıxışında şəhidliyin uca zirvə olduğunu qeyd edib. Amal Əhmədovun milli ruhda böyüdüyünü və döyüşlərə könüllü olaraq qatılaraq şəhidlik zirvəsinə ucaldığını söyləyən şəhid anası övladı ilə fəxr etdiyini vurğulayıb.
Sonra şəhid analarına Qurani-Kərim kitabı hədiyyə edilib.
Sonda DQİDK-nın tabeliyində fəaliyyət göstərən Mənəvi Dəyərlərin Təbliği Fondu tərəfindən nəşr edilən kitablar tədbir iştirakçılarına təqdim olunub.