REGİONLAR


Qırmızı qəsəbədəki tarixi sinaqoq təmirdən sonra muzey kimi fəaliyyət göstərəcək

Quba, 13 oktyabr, Elxan Yusifli, AZƏRTAC

Qubada dağ yəhudilərinin yığcam yaşadıqları Qırmızı qəsəbədə azsaylı xalqın tarixini, adət-ənənələrini, mədəniyyətini əks etdirən eksponatların toplandığı muzey yaradılır.

AZƏRTAC xəbər verir ki, muzey Qırmızı qəsəbədəki tarixi Karçoqi sinaqoqunda fəaliyyət göstərəcək. Sinaqoq sovet dövründə bağlanaraq təyinatı üzrə istifadəyə icazə verilməyib və dini məbəd kənd təsərrüfatı məhsullarının saxlanıldığı anbara çevrilib.

Quba Rayon İcra Hakimiyyəti başçısının Qırmızı qəsəbə inzibati dairəsi üzrə nümayəndəsi Pisax İsakov bildirib ki, sinaqoq qəsəbədən olan xeyriyyəçilərin maliyyə vəsaiti ilə yenidən qurulur. Sinaqoqun bərpası ilə yanaşı, buranın muzey kimi fəaliyyət göstərməsi üçün də paralel iş aparılır. Muzeyin bədii tərtibatı ilə məşğul olan Dağ Yəhudiləri Beynəlxalq Xeyriyyə Fondu evlərdə qorunub saxlanılmış qədim, dəyərli əşyaların muzeyə verilməsi üçün əhaliyə müraciət edib.

XIX əsrin sonu - XX əsrin əvvəllərinə aid sinaqoqun təmiri zamanı tarixi görünüşü qorunub saxlanılacaq. Təmir işlərində həmin dövrün tikinti materiallarından istifadə olunacaq.

Təmir işləri başa çatdıqdan sonra sinaqoqun zirzəmi hissəsində konfrans zalı, kitabxana və muzeyin ehtiyat fondu fəaliyyət göstərəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.