ELM VƏ TƏHSİL
Radiasiya Problemləri İnstitutunda aparılan tədqiqatlara dair hesabatlar təqdim olunub
Bakı, 21 oktyabr, AZƏRTAC
Azərbaycan Milli Elmlər Akademiyasının (AMEA) Radiasiya Problemləri İnstitutunda (RPİ) 2019-cu ildə aparılmış elmi-tədqiqat işlərinin yekunlarına dair laboratoriya və şöbələrin hesabat iclasları davam edir.
RPİ-dən AZƏRTAC-a bildiriblər ki, iclasda Bərpa olunan enerji növlərinin çevrilmələri laboratoriyasının aparıcı elmi işçisi, fizika üzrə fəlsəfə doktoru, dosent Oktay Salamov cari ildə görülən işlər haqqında məlumat verib. Qeyd edib ki, laboratoriyada 13 nəticə əldə olunub. Hesabat ilində laboratoriyanın əməkdaşları tərəfindən 4-ü xaricdə olmaqla, ümumilikdə 7 məqalə dərc etdirilib, 3 patent alınıb, “Külək elektrik mühərriki üçün üçpilləli multiplikator” adlı bir ədəd Avrasiya patentinə aid qurğunun işlək modeli hazırlanıb, habelə 1 patentə müsbət rəy verilib və 1 patent üçün sənədlər təqdim olunub.
Yarımkeçiricilərin radiasiya fizikası laboratoriyasının rəhbəri, fizika-riyaziyyat üzrə elmlər doktoru, professor Rəhim Mədətov bildirib ki, hesabat ilində 3 nəticə əldə edilib. Bununla yanaşı, 11 tezis və 8 məqalə dərc etdirilib, laboratoriyanın əməkdaşı Müslüm Məmmədovun həmmüəllifliyi ilə 3 dərslik nəşr olunub.
Enerjitutumlu proseslərin radiasiya kimyası laboratoriyasının rəhbəri, kimya üzrə fəlsəfə doktoru Hökmən Mahmudov cari ildə 1 mövzu üzrə tədqiqat işi aparıldığını deyib. Diqqətə çatdırıb ki, laboratoriyanın əməkdaşı Səidə Hüseynovanın müəllif və həmmüəllifliyi ilə 1 kitab, 1 test toplusu, VII-XI siniflər üçün 1 dərs vəsaiti və test tapşırıqları dərc olunub. Hesabat ilində əməkdaşlar tərəfindən 2 nəticə əldə edilib, 2-si xaricdə olmaqla 3 məqalə və 8-i xaricdə olmaqla 9 tezis çap olunub.
Enerjiqənaətedici radiasiya prosesləri laboratoriyasının rəhbəri, AMEA-nın müxbir üzvü İslam Mustafayev bildirib ki, hesabat ilində 4 nəticə əldə edilib, 6-sı xaricdə olmaqla 7 məqalə və 11-i xaricdə olmaqla 16 tezis çap olunub.
Radiokimya laboratoriyasının rəhbəri, kimya elmləri doktoru Xaqani Məmmədov cari ildə 12 məqalə və 12 tezisin dərc edildiyini bildirib.