Azərbaycan şahmat məktəbinin nümayəndələri 2007-ci ildə beynəlxalq yarışlarda yüksək nailiyyətlər qazanmışlar. Bu sırada ən böyük uğur Yunanıstanda Avropa çempionatının komanda birinciliyində bürünc medal qazanılması sayılmalıdır. Gənc və yeniyetmə şahmatçılarımız Çingiz Qasımov və Günay Məmmədzadə Türkiyədə keçirilən dünya birinciliyində öz yaş qruplarında gümüş medala layiq görülmüşlər.

AZƏRTAC-ın müxbiri Şahmat Federasiyasının vitse-prezidenti Faiq Həsənovla görüşüb, ondan bu barədə danışmağı xahiş etmişdir.

Faiq Həsənov demişdir: Yunanıstan və Türkiyə uğurlarımızdan xəbərdarsınız. Xorvatiyada keçirilən Avropa birinciliyində Vüqar Rəsulov daha inamlı çıxış edərək qitə çempionu adını qazanmışdır. Gənclərdən Ülvi Bacarani gümüş, Ülviyyə Fətəliyeva bürünc medallara yiyələnmişlər.

Rusiyada M.Çiqorinin xatirəsinə həsr olunmuş turnirdə isə Rauf Məmmədov 3-cü yeri tutmuşdur. Digər beynəlxalq yarışlarda qazandığımız nəticələr də sevindiricidir.

Ona görə də hesab edirəm ki, yola saldığımız 2007-ci il Azərbaycan şahmatçıları üçün uğurlu olmuşdur. Əlbəttə, idmançılarımızın beynəlxalq yarışlarda göstərdikləri yüksək nəticələr ölkədə şahmata dövlət səviyyəsində göstərilən qayğı və diqqət sayəsində mümkün olmuşdur.

Təəssüf ki, Dünya kuboku yarışlarındakı çıxışımız o qədər də uğurlu olmadı. Xantı-Mansidə artıq ikinci dəfə idi ki, Dünya Kuboku uğrunda yarışlar keçirilirdi. Qeyd edim ki, Xantı-Mansi şəhəri 2009–cu ildə də Dünya Kubokunu keçirməklə bağlı FİDE-yə müraciət etmişdir. Nəhayət, 2010-cu ildə nəzərdə tutulan və 150 ölkənin iştirak edəcəyi Ümumdünya Şahmat Olimpiadası da həmin şəhərdə baş tutacaqdır. Xantı-Mansi buna Turin Olimpiadası zamanı keçirilən müsabiqədə nail olmuşdur. Ümid edirik ki, şahmatçılarımız bu dəfə oradan qalib kimi qayıdacaqlar.

Bunu deməyə çox ciddi əsaslarım var. Bilirsiniz ki, müvafiq proqrama uyğun olaraq Şahmat Federasiyası, Gənclər və İdman, Təhsil nazirlikləri 2008-2013-cü illər üçün bir sıra layihə və təkliflər hazırlamışlar. Təəssüf ki, maliyyə məsələləri tam həll olunmadığından nəzərdə tutulan bir çox layihələrin reallaşdırılması ləngiyir.

Azərbaycan dünyada şahmat ölkəsi kimi tanınır. Bu intellektual oyunu inkişaf etdirmək üçün respublikanın hər cür imkanları vardır. Dövlətin qayğısı ilə bu imkanlardan istifadə olunur. Biz Bakıda “Şahmat sarayı” tikilməsini təklif etmişik. İnanırıq ki, maliyyə məsələləri həll edildikdən sonra bu arzumuz reallaşacaq, şahmatın inkişaf və populyarlaşması üçün digər tədbirlər görüləcəkdir.

Bir neçə kəlmə də növbəti ildə keçiriləcək turnirlər barədə demək istərdim. İlin başlıca yarışı Drezden şəhərində start götürəcək ümumdünya şahmat Olimpiadasıdır. İl boyu isə idmançılarımız Qran-Pri yarışlarında, 8 yaşdan 18 yaşadək uşaqların dünya və Avropa çempionatında, Bolqarıstanın Plovdiv şəhərində qadınlar və kişilər arasında şəxsi birincilik yarışlarında iştirak edəcəklər.