REGİONLAR
“SAY: Solidarity” layihəsində 100-dən çox gənc iştirak edib
Bakı, 10 iyul, AZƏRTAC
Gənclərin iştirak etdiyi “SAY: Solidarity” layihəsi başa çatıb.
“İrəli” İctimai Birliyindən AZƏRTAC-a bildiriblər ki, Prezident İlham Əliyevin Sərəncamına əsasən, 2017-ci il Azərbaycanda “İslam Həmrəyliyi İli” elan olunub. Məhz bu səbəbdən İctimai Birlik gəncləri Balakəndə “həmrəylik” adı altında toplayıb. “SAY: Solidarity” (Gənclərin Həmrəylik Düşərgəsi) layihəsi Azərbaycanda İslam həmrəyliyinin möhkəmləndirilməsində gənclərin rolunun artırılmasını, tolerantlıq prinsiplərinin və “yaşıl düşüncə”nin formalaşdırılmasını, mədəniyyətlərarası təbliğatda gənclərin aktiv iştirakını təmin etməklə, ümumillikdə, gənclər şəbəkəsinin inkişafına nail olmaq məqsədi daşıyıb. Reallaşdırılan layihədə 100-dən artıq gənc iştirak edib.
Bağlanış mərasimi Balakən rayon Heydər Əliyev adına parkda keçirilib. “SAY: Solidarity” layihəsinin iştirakçıları Ulu Öndərin abidəsi üzərinə gül dəstələri düzüblər. Daha sonra gənclər Balakən Rayon İcra Hakimiyyəti tərəfindən hazırlanmış konsert proqramında layihə haqqında fikirlərini bölüşüb, təşkilatçılara təşəkkürlərini bildiriblər.
Çıxış edən “İrəli” İctimai Birliyin sədri Mirhəsən Seyidov Azərbaycan gəncliyinin hər zaman dövlət siyasətini dəstəklədiyini bildirib. O, “İrəli”nin gənclər paytaxtı seçilən Balakəndə böyük layihələr həyata keçirməsindən, gənclər arasında əlaqələrin genişlənməsindən və bunun gələcəkdə verəcəyi müsbət nəticələrdən danışıb.
Balakən rayon Gənclər və İdman İdarəsinin rəisi Rasim Pacalov rayonda gənclər sahəsində görülən işlərdən bəhs edib.
Qeyd edək ki, “Support of Azerbaijan Youth” (SAY): Gənclərin Həmrəylik Düşərgəsi layihəsi, “İrəli” İctimai Birliyinin SAY hərəkatı adı altında reallaşdırdığı 5-ci layihədir.
Layihə Azərbaycan Respublikasının Gənclər və İdman Nazirliyinin dəstəyi, “İrəli” İctimai Birliyinin təşkilatçılığı, “Azərsun Holdinq” MMC-nin təşkilati, AZƏRTAC, Trend.az, Milli.az, Day.az xəbər portallarının informasiya dəstəyi ilə keçirilib.