Məlum olduğu kimi, “Müxalifətin Əlaqələndirmə Mərkəzi” deyilən qurum martın 16-da razılaşdırılımış yürüş-mitinq keçirmişdir. Mitinqin təşkilatçıları olan partiyaların nümayəndələri aksiyaya hazırlıq dövründə “ənənəvi üsullar”dan istifadə edərək qaçqınların, tələbələrin məskunlaşdığı yataqxanalara getmiş və mitinqə gələnlərə 10-15 min manat veriləcəyini bildirmişlər. Rayonlardan gətirilən muzdlu mitinqçilərin nəqliyyat xərcləri ödənilmiş və hər birinə 10-15 min manat pul verilmişdir. Mitinq qurtardıqdan sonra orada baş verənlər bunu bir daha sübut edir. 

Hüquq-mühafizə orqanlarının əməkdaşları müxalifət fəallarından bir neçəsini iştirakçılara pul paylayarkən saxlamış və Yasamal Rayon Polis İdarəsinə aparmışlar.

Yasamal Rayon Polis İdarəsinin cinayət axtarışı şöbəsi rəisinin müavini İlham Əsgərov deyir ki, müxalifətin mitinqi qətnamənin oxunması ilə başa çatandan sonra biz camaatın dağılıb getməsini gözləyirdik. O vaxt gördüm ki, Dövlət Film Fondunun qarşısında adamlar yığışıbdır. Orada dayanmış VAZ 21-07 markalı ağ rəngli maşının içərisində sürücü, yaşlı bir şəxs və arxada iki nəfər oturmuşdular, əllərində də bir siyahı var idi. Həmin siyahı ilə onlar pul paylayırdılar və qeydiyyat aparırdılar. Mən işçilərə göstəriş verdim, həmin maşın və vətəndaşlar rayon polis idarəsinə gətirildilər.

İdarədə həmin vətəndaşların üstlərinə baxış keçirilən zaman onlardakı siyahı, pullar və sənədlər maddi sübut kimi götürüldü və tərtib olunan protokola əlavə edildi.

Siyahıda vətəndaşların adları yazılıb və göstərilib ki, mitinqə kim neçə nəfər adam gətirməlidir. Orada 5 nəfər, 10 nəfər gətirənlər olubdur. Hər bir vətəndaşa beş min manat məbləğində pul paylanılıb və siyahıda müvafiq qeydiyyat aparılıbdır. Pul alanlardan saxlanılanlar da var və onlar pul aldıqlarını etiraf edirlər. Pulu paylayan vətəndaş Sumqayıt şəhərində yaşayır. O təsdiq edir ki, həmin siyahını və pulları Azərbaycan Xalq Cəbhəsi Partiyası Sumqayıt şəhər şöbəsinin sədri verib ki, mitinqə gələn iştirakçılara paylasın. Siyahıda adları olanlar Sumqayıtdandır, təxminən 100 nəfərə yaxındır.

Saxlanılan şəxslərdən biri, AXCP-nin üzvü Elmar Sadıqlı bildirir ki, pullar partiyanın Sumqayıt şöbəsindən verilibdir. Mitinqə gəlib-qayıtmaq üçün adambaşına 2 min manat paylamalı idik. Lakin o, adamlara pulun nə üçün əvvəlcədən yox, yalnız mitinq qurtarandan sonra paylanması barədə suala cavab verə bilməmişdir.

Rayon polis idarəsinin rəisi Şahmar Paşayev deyir ki, paylamaq üçün pulu verən Azərbaycan Xalq Cəbhəsi Partiyası Sumqayıt şəhər şöbəsinin sədri, şəhər bələdiyyəsinin üzvü Yusif Salmanovdur. Siyahıdan məlum olur ki, Sumqayıtdan 245 nəfər adam gətirməli idilər. Yusif Salmanovun özü də deyir ki, 1 milyon 200 min manat paylamalı idilər. 600 min manat qalmışdı, lakin polis tutduğuna görə paylaya bilməyiblər.

Ş.Paşayev daha sonra deyir ki, yaxşı, pulu verirdilərsə, əvvəldən hamısını verəydilər?! Nəyə görə pulun bir hissəsini Sumqayıtda, bir hissəsini də Bakıda, yəni mitinq qurtarandan sonra verirlər?! Mitinq başlayanda xeyli adam var idi. Təxminən 20 dəqiqədən sonra hamı pullarını aldı və mitinqin sonunda adam az qaldı. Bu, nəyə görə idi? Ona görə ki, adamları küçələrdən, müəyyən yerlərdən gətiriblər. Hətta özləri etiraf edirlər ki, bilirdik ki, hansısa partiya pul paylayırdı, lakin buna gülməyimiz gəlirdi. Amma bu gün biz də bunu etdik. Biz nə bilirdik ki, bunlar pul gətiriblər. Bax, bu da siyahıları. Elmar Sadıqlı deyir ki, pullar üzvlük haqqındandır. Xeyr, bu pulların hamısı Yusif Salmanov tərəfindən verilən pullardır.

Yusif Salmanov bildirir ki, pul paylamaq barədə Elmar Sadıqlıya o göstəriş vermişdir. Verilən pulun məbləği də siyahıda göstərilibdir, biz heç vaxt belə eləməmişdik, ancaq bu dəfə elədik. Hər adama təxminən 5 min manat verilməli idi. Pulları da əvvəldən verəndə, batır. Axı bilmirik, nə qədər adam gələcək, nə qədər gəlməyəcəkdir.

Qaradağ rayonundakı 16 nömrəli peşə məktəbinin tələbəsi Ramin Musayev isə deyir ki, Azərneft meydanında dayanmışdıq, ADP-nin üzvləri dedilər ki, gəlin bizimlə gedək, pul verəcəklər. Gələndə gördük ki, mitinqdir. Sonra bizi də tutub buraya gətirdilər. Bizə pul çatmadı, dedilər ki, gecikmisiniz.

Sahil qəsəbəsinin sakini Teymur Qədirovun da sözlərinə görə, onlara deyiblər ki, mitinqdən sonra getməyin, axırı yaxşı olacaqdır. Söhbət puldan gedirdi. Mitinqdən sonra bir oğlan da gəldi dedi ki, bəs, pul çatmadı. Belə olanda, mən Ramini də götürüb evə getmək istəyirdim. Dedim ki, heç nə lazım deyil, gedək . Bizə vəd verən Asif adında bir oğlandır, ADP-nin üzvüdür. O da Sahil qəsəbəsində yaşayır.

Bütün bunlar bir daha göstərir ki, hər yerdə xalqın adından danışan, camaatın onları dəstəklədiyini iddia edən müxalifətin, əslində, olan-qalan sosial bazası da tükənir. İndi onlar aludə olduqları mitinqlərə adam da yığa bilmir və buna görə də belə rüsvayçı üsullara əl atırlar.