REGİONLAR
SÜNİ MAYALAMA MÜTƏXƏSSİSLƏRİNİN RESPUBLİKA SEMİNAR-MÜŞAVİRƏSİ
AZƏRTAC-ın müxbiri xəbər verir ki, süni mayalama operatorlarının, rayonların icra hakimiyyətləri başçılarının aqrar məsələlər üzrə müavinlərinin, bu qurumların və ərazi kənd təsərrüfatı idarələrinin zootexniklərinin, bələdiyyələrin nümayəndələrinin, alimlərin və digər əlaqədar şəxslərin iştirak etdiyi seminar-müşavirəni kənd təsərrüfatı naziri vəzifəsini icra edən İrşad Əliyev açaraq xüsusilə 1993-cü ildən sonra aqrar sahədə həyata keçirilən islahatların uğurlu nəticələrindən danışmış, heyvandarlığın inkişafında süni mayalamanın əhəmiyyətini vurğulamışdır.
Nazirliyin Heyvandarlıq, damazlıq işi və otlaqlar şöbəsinin müdiri Çingiz Fərəcov məruzə etmişdir. O, mal-qaranın cins tərkibinin yaxşılaşdırılmasında süni mayalamanın rolundan danışmış, bazar iqtisadiyyatı şəraitində bu işin vacibliyini əsaslandırmışdır. Natiq eyni zamanda bildirmişdir ki, ötən il 5 min 748 baş inək və düyə süni yolla mayalandırılmışdır. O, hazırda respublikanın ayrı-ayrı rayonlarında aparılan süni mayalama işləri barədə geniş məlumat vermiş, fərqlənən mütəxəssisləri sadalamışdır.
Kənd Təsərrüfatı Nazirliyi Elmi Tədqiqat Heyvandarlıq İnstitutunun laboratoriya müdiri Əşrəf Məmmədov qısırlığa qarşı mübarizə tədbirlərindən danışmışdır.
Qabaqcıl süni mayalama mütəxəssislərinin bir qrupuna nazirliyin Fəxri fərmanı verilmişdir.
Seminar-müşavirənin iştirakçıları Abşeron rayonunun Mehdiabad kəndində fermer Zülfüqar Həsənovun fermasında olmuşlar. Onlar yeni sağım aqreqatının işini, mütəxəssislər Nəriman Dünyamalıyevin və İsaq Nəbiyevin nümayiş etdirdikləri süni mayalama prosesini izləmişlər.