SİYASƏT
SVETLANA ÇİNGİZ QIZI QASIMOVA
Azərbaycan ictimaiyyətinə ağır itki üz vermişdir. Tanınmış ictimai-siyasi xadim, Azərbaycan Respublikası Mərkəzi Seçki Komissiyasının sədr müavini Svetlana Çingiz qızı Qasımova 2009-cu il noyabrın 29-da ömrünün 72-ci ilində vəfat etmişdir.
Svetlana Qasımova 1938-ci il iyun ayının 11-də Gəncə şəhərində anadan olmuşdur. 1955-ci ildə Gəncədə orta məktəbi bitirdikdən sonra o, Azərbaycan Dövlət Universitetinin fizika-riyaziyyat fakültəsinə daxil olaraq, 1960-cı ildə universiteti riyaziyyat ixtisası üzrə bitirmişdir. Svetlana Qasımova 1981-1984-cü illərdə Sovet İttifaqı Kommunist Partiyası Mərkəzi Komitəsi nəzdində İctimai Elmlər Akademiyasında təhsil almışdır.
Hələ tələbəlik illərindən ictimai fəaliyyətə başlayan Svetlana Qasımova 1958-1960-cı illərdə Azərbaycan Dövlət Universitetində komsomol komitəsi katibinin müavini, 1960-1963-cü illərdə isə Bakı Şəhər Komsomol Komitəsinin katibi vəzifələrində çalışmışdır. 1963-cü ildən etibarən partiya işinə irəli çəkilən Svetlana Qasımova 1969-cu ilədək Bakı Şəhər Partiya Komitəsində təlimatçı, 1969-1971-ci illərdə şöbə müdiri, 1971-1976-cı illərdə isə Bakı Şəhər İcraiyyə Komitəsində sədr müavini olmuşdur. O, 1976-1979-cu illərdə Azərbaycan Respublikasının ticarət nazirinin müavini, 1979-1983-cü illərdə ticarət naziri vəzifələrini tutmuşdur.
Svetlana Qasımova 1983-1988-ci illərdə Azərbaycan Kommunist Partiyası Mərkəzi Komitəsinin katibi, 1988-1990-cı illərdə Bakı Şəhər Partiya Komitəsinin katibi seçilmişdir. O, 1990-1992-ci illərdə Azərbaycan Respublikasının Dövlət Əmək və Sosial Məsələlər üzrə Komitəsi sədrinin birinci müavini və sədri vəzifələrində çalışmışdır. Əmək fəaliyyətini Bakı Sosial İdarəetmə və Politologiya İnstitutunda davam etdirən Svetlana Qasımova ömrünün sonunadək burada yüksək ixtisaslı kadrların yetişdirilməsi işinə öz layiqli töhfəsini vermişdir. O, 1998-ci ildən Mərkəzi Seçki Komissiyasında çalışmağa başlayaraq burada şöbə müdiri, 2000-ci ildən etibarən Mərkəzi Seçki Komissiyası sədrinin müavini işləmişdir.
Svetlana Qasımova müxtəlif sahələrdə uzun illər ərzində göstərdiyi səmərəli fəaliyyəti ilə ictimaiyyətin dərin hörmətini qazanmışdır. O, dövlət idarəçiliyi, iqtisadiyyat, təhsil və digər sahələrdə yüksək təşkilatçılıq qabiliyyəti, dərin peşəkarlıq, Vətənə və xalqa sədaqət nümayiş etdirmişdir. Ölkəmizdə seçki sisteminin təkmilləşdirilməsi və seçkilərin daha mütəşəkkil keçirilməsində, ayrı-ayrı dövlətlərlə Mərkəzi Seçki Komissiyasının səmərəli işbirliyinin qurulmasında Svetlana Qasımovanın da xidmətləri təqdirəlayiqdir.
Svetlana Qasımova zəngin ictimai-siyasi fəaliyyəti ilə yanaşı pedaqoji sahədə uğurla çalışaraq, Azərbaycan Respublikasının Prezidenti yanında Dövlət İdarəçilik Akademiyasının müəllimi kimi öz təcrübə və bacarığını gənc nəslə çatdırmışdır.
Svetlana Qasımova Azərbaycan qadınları üçün örnək təşkil edərək, müstəqilliyimizin bərpasından sonrakı illərdə qadın hərəkatının fəal iştirakçısı olmuş və ölkəmizdə yaradılmış ilk qadın təşkilatlarından birinə başçılıq etmişdir. Üzərinə düşən vəzifələrin miqyasından asılı olmayaraq o, ömrü boyu əsl vətəndaşlıq mövqeyi nümayiş etdirən və daim öz əqidəsinə sadiq qalan şəxsiyyətlərdən idi.
Svetlana Qasımova bir neçə çağırış Azərbaycan Respublikasının Ali Sovetinə və Bakı şəhər Sovetinə deputat seçilmişdir.
Svetlana Qasımovanın respublikamızın ictimai-siyasi həyatında göstərdiyi xidmətlər dövlət tərəfindən lazımınca qiymətləndirilmişdir. O, bir sıra orden və medallara layiq görülmüş, müstəqil Azərbaycan Respublikasının ali mükafatı - “Şöhrət” ordeni ilə təltif edilmişdir.
Tanınmış ictimai-siyasi xadim, təcrübəli pedaqoq və səmimi insan Svetlana Çingiz qızı Qasımovanın əziz xatirəsi onu tanıyanların qəlbində həmişə yaşayacaqdır.
Allah rəhmət eləsin!
İlham Əliyev
Artur Rasizadə
Oqtay Əsədov
Ramiz Mehdiyev
Hacıbala Abutalıbov
Fatma Abdullazadə
Misir Mərdanov
Fikrət Məmmədov
Şahin Mustafayev
Füzuli Ələkbərov
Hicran Hüseynova
Məzahir Pənahov
Elmira Süleymanova
Seyfəddin Qəndilov
Lidiya Rəsulova
Ziya Yusifzadə
Musa Məmmədov