REGİONLAR
Salyanda taxıl biçini ilə bağlı maarifləndirici görüşlər keçirilib
Bakı, 3 iyun, AZƏRTAC
“Aqrolizinq” ASC cari ildə taxıl biçininin itkisiz və mütəşəkkil həyata keçirilməsi üçün fermer, mexanizator və kənd sakinlərinin maarifləndirilməsi ilə bağlı regionlarda görüşləri davam etdirir.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildiriblər ki, “Aqrolizinq” ASC-nin sədri Elmin Rəhmanov bu dəfə Salyanın Qızılağac və Neftçalanın Boyat kəndində taxıl sahələrində fermerlər və kənd sakinləri ilə görüşüb. Görüşün keçirilməsində əsas məqsəd taxıl biçininin vaxtında və itkisiz həyata keçirilməsinə nail olmaqdır. Həmçinin fermer və kənd sakinləri ilə daha yaxın ünsiyyətin qurulması, onların problem və şikayətlərinin yerindəcə aradan qaldırılması və ya həlli istiqamətində tədbirlərin görülməsi, eləcə də maarifləndirmə işlərinin aparılması da görüşün əsas məqsədlərindəndir.
Görüş zamanı Elmin Rəhmanov fermer və kənd sakinlərinin səsləndirdikləri problem və şikayətləri dinləyib, onların həlli istiqamətində tədbirlərin görüləcəyini bildirib, biçini həyata keçirən mexanizatorlara lazımi tövsiyə və tapşırıqlarını verib.
Regionlarda taxıl biçininə hazırlıqla bağlı görüşlər davam etdirilir. Biçin prosesinin sonuna qədər mütəmadi olaraq belə görüşlər keçiriləcək.