Samux, 18 aprel, Rauf Hacıyev, AZƏRTAC

Samux rayonunda ilk modul tipli məktəbin açılışı olub.

AZƏRTAC-ın bölgə müxbiri xəbər verir ki, yeni modul tipli bina rayon mərkəzindən 70 kilometr aralıda yerləşən, Gürcüstan ilə həmsərhəd ucqar yaşayış məntəqələrindən olan Burunqovaq kənd ümumi orta məktəbi üçün nəzərdə tutulub.

Açılış mərasimində Samux Rayon İcra Hakimiyyətinin başçısı Alı Qocayev, rayon təhsil şöbəsinin müdiri Gülağa Hüseynov, məktəbin müəllim və şagird kollektivi, valideynlər və ictimaiyyət nümayəndələri iştirak ediblər.

Tədbiri açan rayon icra hakimiyyətinin başçısı Alı Qocayev Azərbaycanda elmin və təhsilin inkişafı istiqamətində görülmüş işlərdən danışıb. Bildirilib ki, Prezident İlham Əliyevin diqqət və qayğısı sayəsində respublikamızın bütün bölgələrində olduğu kimi, Samux rayonunda da təhsilin inkişafı ilə bağlı mühüm layihələr həyata keçirilib.

Hazırda rayonda 35 ümumi təhsil məktəbinin fəaliyyət göstərdiyini deyən Alı Qocayev qeyd edib ki, son 5 ildə rayon üzrə 10 məktəb binası əsaslı təmir edilib, digər məktəblər isə lazımi inventarla təchiz olunub.

Çıxışında yeni modul tipli məktəblər haqqında məlumat verən Təhsil Şöbəsinin müdiri Gülağa Hüseynov deyib ki, bu tip məktəblərin üstünlüyü onların azməsrəfli olması, qısa müddət ərzində istənilən relyefdə quraşdırılması, asan daşınması, ən əsası isə sinif otaqlarının sayının şagirdlərin sayına uyğun olaraq rahatlıqla azaldılıb-artırılmasıdır.

Qeyd edilib ki, 80 şagird yerlik olan Burunqovaq ümumi orta məktəbi 3 korpusdan ibarətdir. Məktəbdə tədris üçün 8 sinif otağı, 1 müəllimlər otağı və qarderob yaradılıb. Həmçinin məktəb lazımi inventar və tədris vasitələri ilə təchiz edilib. Hazırda məktəbdə 54 şagird təhsil alır.

Sonda çıxış edən müəllimlər və şagirdlərin valideynləri sərhədyanı ucqar kənd məktəbində yaradılan şəraitə görə Prezident İlham Əliyevə minnətdarlıqlarını ifadə ediblər.