Quba, 10 mart, Elxan Yusifli, AZƏRTAC

“Bakı Şəhər Halqası” Əməliyyat Şirkətinin (BŞH) və Azərbaycan Avtomobil Federasiyasının (AAF) birgə təşkilatçılığı ilə avtoidman üzrə maarifləndirmə ayı çərçivəsində simulyatorda Formula 1 (F1) çempionatının Quba mərhələsinin qalibi müəyyənləşib.

AZƏRTAC-ın bölgə müxbiri xəbər verir ki, martın 10-da “Sənin sürət formulan” şüarı altında keçirilən yarışda Quba şəhərindəki tam orta məktəblərin yuxarı sinif şagirdləri mübarizə aparıblar. Yarışda iştirak edənlər arasında şəhər 7 nömrəli tam orta məktəbin 11-ci sinif şagirdi Fərid İslamovun nəticəsi hamıdan irəlidə olub. O, simulyatorda Bakı şəhər halqasını 1 dəqiqə 49,083 saniyəyə dövrə vuraraq iştirakçılar arasında ən yaxşı göstəriciyə imza atıb. Bakıda keçiriləcək final mərhələsində yarışmağa vəsiqə qazanan F.İslamova sertifikat təqdim edilib.

Yarışın qalibi olan F.İslamov bildirib ki, çempionata qatılanda qalib gəlməyi və final mərhələsində iştirak etməyi qarşısına məqsəd qoyub. “Yarışdan qabaq məşqlərdə göstərdiyim nəticə çox yüksək idi. Bundan qabaq digər bölgələrdə əldə olunan nəticələrlə müqayisə etdikdə qalib gələ biləcəyimi təxmin edirdim. Elə də oldu. 200 şagird arasında birinci olduğum üçün çox xoşbəxtəm. Amma bununla kifayətlənmək istəmirəm. Final mərhələsində də qalib olmaq istəyirəm”, - deyə Fərid müsahibəsində bildirib.

“Bakı Şəhər Halqası” Əməliyyat Şirkətinin marketinq və kommunikasiya şöbəsinin əməkdaşı Rüstəm Hacıyev AZƏRTAC-ın bölgə müxbirinə müsahibəsində bildirib ki, layihənin həyata keçirilməsində əsas məqsəd Azərbaycanın bölgələrində gənclər, xüsusilə orta məktəblərin yuxarı sinif şagirdləri arasında Formula 1 yarışları, yol hərəkəti təhlükəsizliyi və avtomobil idmanı haqqında məlumatlılığı artırmaqdır. “İstəyirik ki, bu yarış həyəcanından, festival ab-havasından regionlar da kənarda qalmasın. Bu çempionat vasitəsilə region gəncləri arasında yeni vərdişlər formalaşdırmağa, avtomobil idmanına, xüsusilə də Formula 1 yarışlarına sevgi və maraq yaratmağa çalışırıq. Ümumilikdə 6 bölgəni əhatə edən çempionatın ilk mərhələsində hər region üzrə bir qalib seçilir. Qaliblər Novruz bayramı ərəfəsində Bakıda keçiriləcək final mərhələsində yarışacaqlar. Yarışın sonunda qalibə və final mərhələsinin digər iştirakçılarına sertifikat və hədiyyələr təqdim olunacaq”, - deyə Rüstəm Hacıyev qeyd edib.

Yarışdan bir gün qabaq Formula 1 simulyator oyunlarında iştirak edən şagirdlər üçün Quba şəhərində ictimaiyyətə açıq yol hərəkəti qaydaları ilə bağlı təlim təşkil olunub. Azərbaycan Avtomobil Federasiyası tərəfindən keçirilən “Yol hərəkəti qaydalarını öyrənək” adlı təlimin əvvəlində mövzu ilə bağlı videoçarx göstərilib. Azərbaycan Texniki Universitetinin müəllimi, Azərbaycan Avtomobil Federasiyasının təlimçisi Sahib Əsgərov məktəblilərə yol hərəkətinin təhlükəsizliyi, o cümlədən yol nişanları, işıqfor, piyada keçidi, təhlükəsizlik kəmərindən istifadə və digər zəruri məsələlər barədə ətraflı məlumat verib. Təlimin sonunda şagirdlərə sertifikatlar təqdim olunub.

Qeyd edək ki, Quba bölgələrdə Formula 1 simulyator oyunlarının keçirildiyi sonuncu rayon olub. Çempionatın mərhələləri indiyədək Lənkəranda, Şirvanda, Mingəçevirdə və Qaxda təşkil edilib.