Məlum olduğu kimi, bu yaxınlarda Azərbaycanda “Ukrayna elmi-texnoloji mərkəzinin yaradılması haqqında” sazişə qoşulmaq barədə qanun qəbul edilmişdir. Beləliklə, Azərbaycan 1993-cü il oktyabrın 25-də Kiyevdə imzalanmış Sazişin daha bir iştirakçısı olmuşdur. AZƏRTAC-ın xüsusi müxbiri Ukrayna Elmi-Texnoloji Mərkəzinin (UETM) ofisində olmuşdur. Ofisin önündə başqa ölkələrin bayraqları ilə yanaşı, Azərbaycanın da bayrağı dalğalanırdı. UETM-in icraçı direktoru, Kanada vətəndaşı İv Karmelin dediyi kimi, Kiyev ofisi 1995-ci ildə yaradılmışdır. Konversiya müəssisələri alimlərinin elmi layihələrinin maliyyələşdirilməsinin 70 faizi ABŞ, Kanada və Avropa Birliyindən dövlət səviyyəsində həyata keçirilir. Qalan 30 faiz qeyri-dövlət, kommersiya qurumları tərəfindən maliyyələşdirilir. Kiyev ofisinin fəaliyyəti Brüsseldən, Ottava və Vaşinqtondan əlaqələndirilir. Bu təşkilata keçmiş İttifaq ölkələrindən Ukrayna ilə yanaşı, Gürcüstan və Özbəkistan da daxildir. Azərbaycanın UETM-in fəaliyyətinə qoşulması ölkəmizin Ukraynadakı səfirliyinin və Azərbaycan Milli Elmlər Akademiyasının birgə apardığı səmərəli işi sayəsində mümkün olmuşdur. İv Karmel bu yaxınlarda Bakıda olmuş və ölkənin rəsmi şəxsləri ilə görüşmüşdür. O, böyük ruh yüksəkliyi ilə qeyd etmişdir ki, onu Bakıda nəinki səmimi qarşılamış, həm də gələcək əməkdaşlığı hərarətlə dəstəklənmişlər. Respublika MEA Fizika İnstitutunda ofis ayrılmış və indi burada təmir işləri aparılır. İv Karmel axırda bildirmişdir ki, bu il maraqlı elmi layihələrin maliyyələşdirilməsi üçün 100 milyon dollar ayrılacaqdır. O demişdir: Bununla əlaqədar ümidvarıq ki, Şuranın bu ilin dekabrında keçiriləcək iclasında Azərbaycan tərəfi bir sıra layihələr təqdim edəcəkdir. UETM-in birinci mərtəbəsində Elmi-Texnoloji Mərkəzin üzvü olan ölkələrin dövlət başçılarının, tanınmış alimlərinin portretləri asılmışdır. Tezliklə Azərbaycan Respublikasının Prezidenti Heydər Əliyevin portreti də onların sırasında olacaqdır.