Lənkəran-Masallı-Cəlilabad-Lerik, Bağır Əliyev, AZƏRTAC

Oktyabrın 18-də ölkəmizin cənub bölgəsində Dövlət Müstəqilliyi günü bayram sevinci ilə qeyd olunub.

AZƏRTAC xəbər verir ki, Lənkəran şəhərindəki Heydər Əliyev Mərkəzində “Dövlət müstəqilliyi Azərbaycan xalqının milli iftixarıdır” mövzusunda tədbir keçirilib.

Tədbirdə çıxış edən Lənkəran Şəhər İcra Hakimiyyətinin başçısı Taleh Qaraşov rayon sakinlərini əlamətdar gün münasibətilə təbrik edərək bildirib ki, Azərbaycan xalqı özünün tarixi nailiyyəti olan dövlət müstəqilliyinin bərpasının 25-ci ildönümünü təntənə ilə bayram edir.

1991-ci il avqustun 30-da Azərbaycan parlamentində müstəqillik haqqında Bəyannamənin, oktyabrın 18-də isə Konstitusiya Aktının qəbul edildiyini vurğulayan T.Qaraşov 1918-ci ildə olduğu kimi, 1991-1993-cü illərdə də müstəqilliyimizin ciddi təhlükələrə məruz qaldığını diqqətə çatdırıb.

Qeyd olunub ki, çıxılmaz vəziyyətdə olan Azərbaycan xalqı nicat yolunu dahi rəhbər Heydər Əliyevin siyasi hakimiyyətə qayıdışında gördü. Xalq özünün xilaskarına üz tutaraq, onu təkidlə yenidən siyasi rəhbərliyə qayıtmağa çağırdı. Doğma xalqına qəlbən bağlı olan Ulu Öndər ömrünün qalan hissəsini də xalqına bağışladı. Heydər Əliyev ölkəni düşdüyü ağır vəziyyətdən çıxardı, milli dövlətçiliyimizi yox olmaq təhlükəsindən qurtardı.

Bildirilib ki, ulu öndər Heydər Əliyevin siyasi kursunu layiqincə davam etdirən Prezident İlham Əliyevin müdrik daxili və xarici siyasəti nəticəsində ölkəmiz tərəqqi yolundadır. Müstəqil Azərbaycan Respublikasının beynəlxalq nüfuzu ildən-ilə artır. Bölgələrimiz inkişaf edir. Regionların sosial-iqtisadi inkişafına dair Dövlət proqramları bu işdə mühüm rol oynayır. Bunu Lənkəran rayonunun timsalında da görmək mümkündür.

Tədbirdə şəhər icra hakimiyyəti başçısının birinci müavini İlqar Dadaşovun mövzu ilə bağlı məruzəsi dinlənilib.

Şəhər mədəniyyət və turizm şöbəsinin müdiri Vüsal Nəsirli, Lənkəran Dövlət Universitetinin tələbə-gənclər təşkilatının sədri Ramil Niftullayev, rayon ağsaqqallar şurasının üzvü Ramazan Quliyev, gənclər və idman idarəsinin rəis müavini Elbəy Fətəliyev və başqaları çıxışlarında Azərbaycanın dövlət müstəqilliyinin xalqımıza bəxş etdiyi töhfələrdən, 25 illik müstəqillik dövründə ölkəmizin daxili və xarici siyasətində qazanılmış uğurlardan bəhs ediblər.

X X X

Dövlət müstəqilliyinin 25 illiyi ilə əlaqədar Masallı şəhərindəki Heydər Əliyev Mərkəzində keçirilən toplantıda çıxış edən rayon icra hakimiyyəti başçısının müavini Nəsir Muxtarlı rayon sakinlərini əlamətdar gün münasibətilə təbrik edib.

Xalqın illər boyu özündə yaşatdığı istiqlal ideyasını gerçəkləşdirən tarixi şəraitdən, müstəqillik uğrunda aparılan mübarizədən və bu müstəqilliyin qorunub möhkəmlənməsində ümummilli lider Heydər Əliyevin tarixi rolundan danışan N.Muxtarlı bildirib ki, XX əsrin sonlarında qlobal miqyasda cərəyan edən proseslər Azərbaycan üçün də yeni üfüqlər açdı, xalqımız ən yeni tarixində bir daha müstəqil və azad yaşamaq hüququ qazandı.

Bildirilib ki, Prezident İlham Əliyevin rəhbərliyi ilə həyata keçirilən uğurlu daxili və xarici siyasət sayəsində respublikamızın regional və qlobal miqyasda nüfuzu əhəmiyyətli dərəcədə artıb, beynəlxalq aləmdə etibarlı tərəfdaş imici qazanıb, Azərbaycan mötəbər beynəlxalq tədbirlərin, nüfuzlu idman yarışlarının keçirildiyi məkana çevrilib.

Toplantıda çıxış edən Mahmudavar kənd orta məktəbinin tarix müəllimi, Əməkdar Müəllim Musarza Mirzəyev, rayon veteranlar şurasının sədri Məmmədağa Şiriyev, Böyük Xocavar kənd tam orta məktəbinin tarix müəllimi Həlimə Əhmədova, aprel döyüşlərinin iştirakçısı, rayonun Xırmandalı kəndindən olan Mansur Quliyev və Kalinovka kənd tam orta məktəbinin tarix müəllimi Raqil Babayev müstəqillik yolunda Azərbaycan xalqının çoxillik mübarizə tarixindən və onun qorunmasında ümummilli lider Heydər Əliyevin müstəsna rolundan danışıblar.

X X X

Cəlilabadda keçirilən bayram tədbirinin iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, böyük rəhbərin zəngin və mənalı ömür yolunu əks etdirən eksponatlar və fotoşəkillərlə tanış olublar.

AZƏRTAC xəbər verir ki, Cəlilabad şəhərindəki Heydər Əliyev Mərkəzində keçirilən toplantıda çıxış edən rayon icra hakimiyyətinin başçısı Əziz Əzizov rayon sakinlərini əlamətdar gün münasibətilə təbrik edib.

1991-ci il oktyabrın 18-nin respublikamızın tarixində yeni mərhələnin başlanğıcı olduğunu vurğulayan Ə.Əzizov müstəqilliyin qorunub saxlanılmasında əvəzsiz rolu olan, Azərbaycanın gündən-günə güclənən siyasi və iqtisadi potensialının formalaşmasının əsasını qoyan ulu öndər Heydər Əliyevin xidmətlərini xüsusi vurğulayıb.

Qeyd olunub ki, Azərbaycan dövlətinin qurucusu və memarı Ulu Öndərin siyasi kursu bu gün uğurla davam etdirilir. Prezident İlham Əliyevin regionların sosial-iqtisadi inkişafına diqqət və qayğısı nəticəsində respublikanın hər bir guşəsində olduğu kimi, Cəlilabadda da böyük tikinti-quruculuq işləri həyata keçirilir.

Çıxış edənlər ötən əsrin 90-cı illərində dövlət müstəqilliyinin bərpa edilməsini mühüm tarixi hadisə kimi qiymətləndirərək, ümummilli lider Heydər Əliyevin müstəqilliyimizin möhkəmləndirilməsində və ölkəmizin dünyaya tanıdılmasındakı əvəzsiz xidmətlərindən danışıblar. Bildirilib ki, Ulu Öndərin hakimiyyətə qayıdışı müstəqilliyimizə yeni nəfəs verdi, respublikamız özünün inkişaf yoluna çıxdı, beynəlxalq aləmdə söz-nüfuz sahibinə çevrildi.

X X X

Lerik Rayon Mədəniyyət Mərkəzində Azərbaycan Respublikasının dövlət müstəqilliyinin bərpasının 25 illiyinə həsr olunmuş elmi-praktiki konfrans keçirilib.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək, xatirəsini ehtiramla yad ediblər.

Konfransda Lerik Rayon İcra Hakimiyyətinin başçısı Rövşən Bağırovun “Müstəqil Azərbaycanın 25 il ərzində keçdiyi tarixi yol” mövzusunda məruzəsi dinlənilib.

Rayon sakinlərini əlamətdar gün münasibətilə təbrik edən R.Bağırov deyib ki, Azərbaycan Respublikası 1991-ci il oktyabrın 18-də Azərbaycan Xalq Cümhuriyyətinin varisi olduğunu bəyan edərək, öz dövlət müstəqilliyini və suverenliyini beynəlxalq aləmə bildirib.

Dövlət müstəqilliyimizin qorunmasında ümummilli lider Heydər Əliyevin xidmətlərini yüksək dəyərləndirən R.Bağırov Ulu Öndərin demokratik, hüquqi və dünyəvi dövlət quruculuğu yolunda atdığı addımlardan, beynəlxalq standartlara əsaslanan köklü hüquq islahatlarından, insan hüquq və azadlıqlarının təminatı sahəsində həyata keçirilən tədbirlərdən danışıb.

Diqqətə çatdırılıb ki, keçid dövrünü başa vuran respublikamız bu gün özünün uzunmüddətli inkişaf strategiyasının istiqamətlərini müəyyən edən bir ölkədir. Azərbaycan dünya miqyasında iqtisadi artım sürətinə görə ön sıralarda gedərək islahatçı ölkə kimi tanınır.

R.Bağırov çıxışında Prezident İlham Əliyevin rəhbərliyi ilə Azərbaycan dövlətçiliyinin daha da möhkəmləndirildiyini, ölkədə ictimai-siyasi sabitliyin hökm sürdüyünü, əhalinin rifah halının gündən-günə yaxşılaşdığını diqqətə çatdırıb.

Elmi-praktik konfransda rayon polis şöbəsinin rəisi Hüseynəli Məlikov “Müstəqil Azərbaycanın hüquqi dövlət quruculuğu”, Lerik şəhər 2 nömrəli tam orta məktəbin müəllimi Hüseynbala Əliyev “Təhsilimizə 25 ilin zirvəsindən baxış”, gənclər və idman idarəsinin rəisi Natiq İsaqov “Müstəqil Azərbaycan cəmiyyətinin qurulmasında gənclərin rolu”, Lerik şəhər 2 nömrəli tam orta məktəbin müəllimi Şəhla Məmiyeva “Müstəqilliyin möhkəmləndirilməsində Azərbaycan qadınının rolu”, Lerik Rayon Veteranlar Təşkilatının sədri Hidayət Bəşirov “Müstəqilliyimiz əbədidir” mövzularında çıxış ediblər.