DÜNYA
Ümumdünya Təbiəti Mühafizə Fondu meşələrin məhvinə dair yeni hesabatını açıqlayıb
Vyana, 15 aprel, AZƏRTAC
Tropik meşə örtüyünün məhv edilməsində əsas səbəbkarların Qərb ölkələri olduğu tez-tez ictimailəşdirilir. Ümumdünya Təbiəti Mühafizə Fondu (WWF) bununla bağlı yeni araşdırmalar əsasında hesabatını açıqlayıb.
AZƏRTAC xəbər verir ki, beynəlxalq qurum meşələrin məhvinə görə dünyada Çindən sonra ikinci yerdə Avropa İttifaqının dayandığını müəyyən edib. Bununla da Aİ xoşagəlməz reytinqdə Hindistan və ABŞ-dan öndə mövqe tutub.
Hesabata əsasən, 2017-ci ildə bütün dünya üzrə məhv edilən tropik meşələrin 16 faizinin yerində Avropa İttifaqı ölkələrinə ixrac ediləcək məhsulların yetişdirildiyi plantasiyalar salınıb. 2005-2017-ci illərin statistik məlumatlarını analiz edən beynəlxalq qurum “meşələri məhv edənlərin dünya reytinqi”ndə Avropanı Çindən (24 faiz) sonra ikinci yerə “layiq görüb”. Bu reytinqdə məhv edilmiş meşələrin 9 faizinə görə Hindistan, 7 faizinə görə isə ABŞ məsuliyyət daşıyır. Hesabat müəlliflərinə görə Aİ ilə ticarət üçün ən çox meşə örtüyü Braziliya, İndoneziya və Paraqvayda məhv edilir.
Məhv edilən meşə örtüyünün ərazisi isə soya bitkiləri (31 faiz), palma yağı (24 faiz), heyvandarlıq (10 faiz), ağac məmulatları (8 faiz), kakao (6 faiz) və kofe (5 faiz) plantasiya və təsərrüfatları üçün istifadə edilir.
Hesabatda həmçinin Avropanın ən böyük xalq təsərrüfatına malik Almaniyanın tropik meşələrin məhvində böyük payı olduğu diqqətə çatdırılır. Belə ki, hər il Almaniyaya ixrac edilən məhsullar üçün orta hesabla 43,7 min hektar meşə sahəsi qırılır. Meşələrin qırılması nəticəsində Aİ üçün istehsal olunan məhsulların 80 faizi səkkiz ölkəyə (Almaniya, İtaliya, İspaniya, keçmiş Aİ üzvü Böyük Britaniya, Niderland Krallığı, Fransa, Belçika və Polşa) ixrac olunur.
Hesabat müəlliflərinə görə, ittifaq ölkələrində meşələrin və yaşıl örtüyün qorunması prioritet istiqamətlər arasında yer alsa da, Aİ dünyanın müxtəlif bölgələrində meşələrin məhvinə görə dolayısı ilə cavabdehlik daşıyır və 2017-ci ildə meşələrin məhvi 116 milyon ton CO2 emissiyasının yaranmasına səbəb olub. Ümumilikdə isə həmin il beynəlxalq ticarət üçün 1,3 milyon hektar tropik meşə məhv edilib və onun 203 min hektarı Aİ-yə ixracat üçün istifadə edilib.
WWF təmsilçisi Kristine Şoll hesabatın təqdimatında bildirib ki, təbiətin məhvi erası başa çatmalıdır, çünki meşələr kimi təbii ekoloji sistemlər bizim gələcək həyatımızı və sağlamlığımızın təminatçısıdır. Ona görə də Avropa bazarlarına çıxarılan məhsulların istehsalı təbiət və insan haqlarının məhvi əsasında baş verməməlidir.
Elgün Niftəli
AZƏRTAC-ın xüsusi müxbiri
Vyana